ប្រធានាធិបតីចិន៖ ចិននិងតៃវ៉ាន់ជាគ្រួសារតែមួយ
ជាជំនួបដោយកម្រ ប៉ុន្តែ វាបានកើតឡើងរួចហើយ។ នៅថ្ងៃអាទិត្យទី ៦ តុលា លោកប្រធានាធិបតីចិន ស៊ី ជីនពីង បានជួបជាមួយមន្រ្តីជាន់ខ្ពស់របស់តៃវ៉ាន់ នៅមុនកិច្ចប្រជុំកំពូលសេដ្ឋកិច្ច អាស៊ី ប៉ាស៊ីហ្វិក APEC ដែលត្រូវបើកធ្វើ នៅថ្ងៃចន្ទ ទី ៧ តុលា ក្នុងប្រទេសឥណ្ឌូណេស៊ី។ តាមកាសែតស្រុកចិន ជំនួបដ៏កម្រនេះបញ្ជាក់ពីទំនាក់ទំនងដ៏កក់ក្តៅ រវាងប្រទេសចិន និងកោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:២៥
ជំនួបចុងក្រោយរវាងប្រមុខដឹកនាំចិន ជាមួយតៃវ៉ាន់ កើតមាននៅឆ្នាំ ២០០៨ នៅកិច្ចប្រជុំ APEC បន្ទាប់ពីភាពតានតឹងរវាងចិន និងតៃវ៉ាន់បានថយចុះមកវិញ។ លើកនេះវិញ ប្រធានាធិបតីចិនថ្មី លោកស៊ី ជីនពីង បានជួបលោកស៊ូ វ៉ាំងសង់ អតីតអនុប្រធានាធិបតីតៃវ៉ាន់។ ប្រមុខដឹកនាំចិនមិនបានជួបលោកស៊ូ ក្នុងនាមជាមន្រ្តីជាន់ខ្ពស់រដ្ឋាភិបាលតៃវ៉ាន់ទេ ប៉ុន្តែ ក្នុងនាមលោកជាទីប្រឹក្សាសេដ្ឋកិច្ច ដែលជាអ្នកដឹកនាំក្រុមពាណិជ្ជករតៃវ៉ាន់ មកកិច្ចប្រជុំ APEC។
ដោយសារតែការប្រឆាំងរបស់ប៉េកាំងដែលថា មានចិនតែមួយ ហើយតៃវ៉ាន់ ជាកោះរបស់ខ្លួន មន្រ្តីប្រធានាធិបតីតៃវ៉ាន់ ឬមន្រ្តីជាន់ខ្ពស់រដ្ឋាភិបាលតៃវ៉ាន់ត្រូវបានហាមមិនឲ្យចូលរួម នៅក្នុងជំនួបកំពូល APECទេ។ អ្នកដែលមកចូលរួម ភាគច្រើន ជាពាណិជ្ជករតៃវ៉ាន់តែប៉ុណ្ណោះ។
ក្នុងជំនួប នៅថ្ងៃនេះទៀត ជាមួយលោកស៊ូ វ៉ាំងសង់ អ្នកតំណាងតៃវ៉ាន់ លោកប្រធានាធិបតីចិន បានលើកឡើងថា គេគួរជំរុញឲ្យមានគំនិតបង្រួបង្រួមជាគ្រួសារតែមួយ រវាងចិន និងតៃវ៉ាន់។ លោកស៊ី ជីនពីងបានបញ្ជាក់ផងដែរថា ភាគីទាំងពីរគួរពង្រឹងទំនាក់ទំនង និងសហប្រតិបត្តិការឲ្យកាន់តែខ្លាំងដើម្បីចម្រើនប្រជាជាតិចិនតែមួយ។
លោកស៊ី ជីនពីងគ្រាន់តែអាចនិយាយពីជំហររបស់ចិន ប៉ុន្តែ មិនប្រាកដថាតៃវ៉ាន់នឹងព្រមធ្វើតាមនោះទេ។ កាលពីថ្ងៃអង្គារកន្លងទៅ លោកស៊ូ វ៉ាំងសង់ ដែលជាបេសកជនពិសេសរបស់មូលនិធិពាណិជ្ជកម្មតៃវ៉ាន់បាននិយាយ រួចហើយថា លោកនឹងមិននាំសារអ្វីពីលោកប្រធានាធិបតីតៃវ៉ាន់ ម៉ា យីងចូវ ទៅលើស៊ី ជីនពីងទេ ហើយការពិភាក្សាជាមួយលោកប្រធានាធិបតីចិន នឹងមិនផ្តោតទៅលើអ្វីដែលកើតមាន នៅពេលអនាគតទេ។ មានន័យថា តៃវ៉ាន់ នឹងមិននិយាយដល់ការបង្រួបបង្រួមទឹកដីជាមួយចិនដីគោកទេ ប៉ុន្តែ តៃវ៉ាន់ក៏មិនបោះបង់ចោលសហប្រតិបត្តិការសេដ្ឋកិច្ចជាមួយទីក្រុងប៉េកាំង។
ទំនាក់ទំនងចិន និងតៃវ៉ាន់បានល្អប្រសើរឡើង តែក្នុងផ្នែកសេដ្ឋកិច្ច បន្ទាប់ពីលោកម៉ា យីងចូវ ស្និទ្ធនឹងទីក្រុងប៉េកាំងបានឈ្នះឆ្នោតពីរអាណត្តិជាប់គ្នា ធ្វើជាប្រធានាធិបតីតៃវ៉ាន់។ លោកម៉ា មាននយោបាយជំរុញការធ្វើពាណិជ្ជកម្ម និងផ្សះផ្សារជាមួយចិនដីគោក។ កាលពីឆ្នាំ ២០១០ ចិន និងតៃវ៉ាន់បានចុះកិច្ចព្រមព្រៀងបង្កើតបណ្តាញសហប្រតិបត្តិការសេដ្ឋកិច្ចជាមួយគ្នា។ បច្ចុប្បន្ននេះ តៃវ៉ាន់មានចំនួនវិនិយោគច្រើនជាងគេនៅប្រទេសចិន ក្នុងតម្លៃ ១០០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ