មេដឹកនាំតាលីបង់ម្នាក់បានត្រូវបាញ់ស្លាប់ដោយយន្តហោះគ្មានមនុស្សបើកនៅប៉ាគីស្ថាន
ការវាយប្រហារមួយដោយយន្តហោះគ្មានមនុស្សបើករបស់អាមេរិកាំងនៅខេត្ត Waziristan ឋិតនៅប៉ែកខាងជើងនៃប្រទេសប៉ាគីស្ថាន បានសម្លាប់មនុស្សប្រាំនាក់នៅថ្ងៃព្រហស្បតិ៍ម្សិលមិញ ដែលក្នុងនោះមានមេដឹកនាំតាលីបង់ជាន់ខ្ពស់ម្នាក់ដែលជាអ្នកស្និទ្ធនឹងពួកអាល់កៃដា។ នេះបើយោងតាមប្រភពនៃអ្នកទទួលខុសត្រូវខាងសន្តិសុខតាលីបង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ការវាយប្រហារដោយយន្តហោះគ្មានមនុស្សបើករបស់អាមេរិកាំងនេះគឺបាញ់សំដៅទៅលើគេហដ្ឋានមួយដែលជាទីកន្លែងពួនលាក់ខ្លួនរបស់ពួកអ៊ីស្លាមនិយមតាលីបង់ គេហដ្ឋាននេះឋិតនៅជិតទីផ្សារនៃទីក្រុង Miranshah ដែលជាទីក្រុងធំមួយនៃខេត្ត Waziristan ។
មេតាលីបង់ជាន់ខ្ពស់ដែលស្លាប់នោះឈ្មោះ Badar Mansoor ជាអ្នកដឹកនាំតាលីបង់ម្នាក់ដ៏សំខាន់នៅប្រទេសប៉ាគីស្ថាន ហើយក៏ជាអ្នកស្និទ្ធនឹងពួកអាល់កៃដា។ មេតាលីបង់ Badar Mansoor រស់នៅក្នុងផ្ទះនេះជាមួយប្រពន្ធនិងកូនជាច្រើននាក់នៅទីក្រុង Miranshah ។ “ Badar Mansoor ប្រពន្ធរបស់ Badar Mansoor និងសមាជិកគ្រួសារពីរនាក់ទៀតបានត្រូវបាញ់ស្លាប់ភ្លាមនៅនឹងកន្លែង”។ នេះជាការថ្លែងប្រាប់ភ្នាក់ងារ Reuters ដោយមេដឹកនាំតាលីបង់ប៉ាគីស្ថានម្នាក់ទៀតដែលពុំបញ្ចេញអត្តសញ្ញាណ។
នេះជាការវាយប្រហារលើកទីពីរហើយក្នុងរយៈពេលពីរថ្ងៃចុងក្រោយនេះ។ លើកទីមួយបានកើតមាននៅថ្ងៃពុធម្សិលមួយថ្ងៃ ដែលបានសម្លាប់អ្នកអ៊ីស្លាមនិយមប្រមាណដប់នាក់នៅភូមិឈ្មោះ “ថាពី” ឋិតនៅចម្ងាយប្រមាណ១៥គ.ម.ពី ទីក្រុង Miranshah ។
គួរបញ្ជាក់ថា ការវាយប្រហារដោយយន្តហោះគ្មានមនុស្សបើករបស់អាមេរិកាំងនេះ ឋិតនៅក្រោមការដឹកនាំរបស់ក្រសួងយកការណ៍សម្ងាត់ CIA ដែលបានផ្អាកបញ្ឈប់សកម្មភាពមួយរយៈក្រោយពីមានការវាយប្រហាររបស់បក្សសម្ព័ន្ធអូតង់ទៅលើតំបន់ព្រំដែនអាហ្វហ្កានីស្ថាននិងប៉ាគីស្ថាននៅខែវិច្ឆិកាកន្លងទៅដែលបានបណ្តាលឲ្យមានទាហានប៉ាគីស្ថានស្លាប់២៤នាក់។
ហើយការវាយប្រហារបានចាប់មានឡើងវិញនៅថ្ងៃទី១០មករាទៅលើតំបន់ pachtounes ដែលឋិតនៅប៉ែកពាយ័ព្យនៃប្រទេសប៉ាគីស្ថាន ដែលជាមូលដ្ឋានរបស់ពួកតាលីបង់ជាច្រើនក្រុមដែលមានសកម្មភាពនៅប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ