ទណ្ឌកម្មអឺរ៉ុបពុំទិញប្រេងពីអ៊ីរ៉ង់នឹងពុំធ្វើឲ្យតេហេរ៉ង់ទន់ជង្គង់ឡើយ
រដ្ឋមន្ត្រីក្រសួងការបរទេសអឺរ៉ុបបានសម្រេចបន្ថែមសម្ពាធដាក់ទៅលើទីក្រុងតេហេរ៉ង់ ដោយបានធ្វើការហាមឃាត់ពុំឲ្យទិញប្រេងផលិតដោយអ៊ីរ៉ង់និងដាក់ទណ្ឌកម្មទៅលើធនាគារកណ្តាលអ៉ីរ៉ង់ ដោយឃាត់ផ្អាប់ទុកប្រាក់ហើយនិងផ្តាច់ទំនាក់ទំនងក្នុងវិស័យហិរញ្ញវត្ថុ។ ទាំងនេះក្នុងគោលបំណងដើម្បីកុំឲ្យទីក្រុងតេហេរ៉ង់មានកម្លាំងហិរញ្ញវត្ថុគ្រប់គ្រាន់ សម្រាប់បន្តកម្មវិធីនុយក្លេអ៊ែរយោធារបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០៥
ពិតមែនតែទណ្ឌកម្មរបស់សហភាពអឺរ៉ុបដែលមានជាអាទិ៍ការហាមឃាត់ពុំឲ្យទិញប្រេងកាតផលិតដោយអ៊ីរ៉ង់និងការដាក់ទណ្ឌកម្មទៅលើធនាគារកណ្តាលអ៉ីរ៉ង់ ធ្វើឲ្យប៉ះពាល់ដល់បេះដូងនៃសកម្មភាពសេដ្ឋកិច្ចរបស់ប្រទេសអ៊ីរ៉ង់ក៏ដោយ ក៏ទណ្ឌកម្មទាំងនេះនឹងពុំធ្វើឲ្យទីក្រុងតេហេរ៉ង់ទន់ជង្គង់ឡើយ។
មូលហេតុដែលពុំធ្វើឲ្យទីក្រុងតេហេរ៉ង់ទន់ជង្គង់មានច្រើន៖
ទី១ -ពិតមែនតែការនាំប្រេងកាតអ៊ីរ៉ង់ចូលសហភាពអឺរ៉ុបមានដល់ទៅ៧៥%ដែលលក់ទៅឲ្យប្រទេសអ៊ីតាលី អេស្ប៉ាញ និងប្រទេសក្រិក ក៏ប៉ុន្តែប្រេងដែលលក់ទៅឲ្យប្រទេសអ៊ីតាលីតំណាងតែ៧%ប៉ុណ្ណោះនៃការនាំចេញសរុបរបស់ប្រទេសអ៊ីរ៉ង់ អេស្ប៉ាញតំណាង៦% ហើយប្រទេសក្រិកតំណាង៤%។
ទី២ -ការនាំប្រេងឆៅអ៊ីរ៉ង់សរុបចេញទៅលក់ឲ្យប្រទេសអាស៊ីវិញមានដល់ទៅ៦៥% ដែលក្នុងនោះមានប្រទេសចិន(២២%) ប្រទេសជប៉ុន(១៧%) ប្រទេសឥណ្ឌា(១៦%) និងប្រទេសកូរ៉េខាងត្បូង(៩%)។
ដូច្នេះ បើសហភាពអឺរ៉ុបពុំទិញប្រេងពីប្រទេសអ៊ីរ៉ង់ក៏ពុំមែនជាបញ្ហាអ្វីស្លាប់រស់សម្រាប់ទីក្រុងតេហេរ៉ង់ដែរ។ ដ្បិតការនាំប្រេងអ៊ីរ៉ង់ចេញលក់ឲ្យសហភាពអឺរ៉ុបតំណាងតែប្រមាណ២០%ប៉ុណ្ណោះនៃការនាំចេញសរុបរបស់ប្រទេសអ៊ីរ៉ង់។ ចំណែកឯទ្វីបអាស៊ីឯណោះតំណាងដល់ទៅប្រមាណ៦៥%។ មូលហេតុនេះហើយដែលនាំឲ្យសហរដ្ឋអាមេរិកនិងសហភាពអឺរ៉ុបខិតខំធ្វើការបញ្ចុះបញ្ចូលប្រទេសអាស៊ីដែលជាសម្ព័ន្ធមិត្តរបស់ខ្លួនឲ្យឈប់ទិញប្រេងកាតពីប្រទេសអ៊ីរ៉ង់ មានជាអាទិ៍ប្រទេសជប៉ុននិងប្រទេសកូរ៉េខាងត្បូង។
ក្រោយពីការប្រកាសដាក់ទណ្ឌកម្មទៅលើទីក្រុងតេហេរ៉ង់ដោយសហភាពអឺរ៉ុប ប្រភពអ៊ីរ៉ង់ខ្លះបានស្នើឲ្យប្រទេសអ៊ីរ៉ង់បញ្ឈប់ការនាំប្រេងលក់ឲ្យសហភាពអឺរ៉ុបដោយខ្លួនឯង ដោយពុំចាំបាច់រង់ចាំដល់ថ្ងៃទី១កក្កដា។ ទាំងនេះ ក្នុងគោលបំណងធ្វើឲ្យ “តម្លៃប្រេងឡើងថ្លៃ” ហើយនិងធ្វើឲ្យរំខាន់ដល់ “ផែនការរបស់អឺរ៉ុប”។ ផ្ទុយទៅវិញទីក្រុងតេហេរ៉ង់ពុំបានបន្តធ្វើការគំរាមបិទច្រកសមុទ្រ Ormuz ដែលជាច្រកសមុទ្រយុទ្ធសាស្ត្រមួយដ៏សំខាន់ ដោយហេតុថា ការនាំប្រេងឆៅពិភពលោកសរុបប្រមាណ១/៣ត្រូវដឹកចេញតាមច្រកសមុទ្រ Ormuz នេះ។
រីឯប្រតិកម្មនៃប្រទេសឯទៀតៗគេអាចងាយយល់ទេ ប្រទេសរុស្ស៊ីដែលជាមិត្តរបស់អ៊ីរ៉ង់បានបរិហារពី “ទណ្ឌកម្មឯកតោភាគី” របស់សហភាពអឺរ៉ុប ហើយបានអំពាវនាវឲ្យមានការចរចាគ្នាឡើងវិញជាមួយទីក្រុងតេហេរ៉ង់ស្តីពីកម្មវិធីនុយក្លេអ៊ែរ។ កិច្ចចរចាស្តីពីកម្មវិធីនុយក្លេអ៊ែរដែលបានព្យួរផ្អាកអស់រយៈពេល១ឆ្នាំមកហើយ។
ចំណែកឯប្រទេសអ៊ីស្រាអែល ដែលបារម្ភខ្លាចមានការវាយប្រហារដោយអាវុធនុយក្លេអ៊ែរជាយថាហេតុពីសំណាក់ប្រទេសអ៊ីរ៉ង់ បានសម្ដែងការស្វាគមន៍អបអរនឹងសេចក្តីសម្រេចចិត្តរបស់សហភាពអ៊ឺរ៉ុប។
នៅចំពោះមុខ ការសម្រេចដាក់ទណ្ឌកម្មដោយសហភាពអឺរ៉ុបទៅលើទីក្រុងតេហេរ៉ង់បែបនេះ របបគ្រប់គ្រងអ៊ីរ៉ង់បច្ចុប្បន្នច្បាស់ជាខិតខំធ្វើការបំផុសបំផុលស្មារតីស្នេហាជាតិរបស់សាធារណមតិ ឲ្យងើបប្រឆាំងនឹងប្រទេសបស្ចិមលោក។ ក៏ប៉ុន្តែ ទង្វើនេះពុំអាចបំភ័ន្តប្រជាជនអ៊ីរ៉ង់ទូទាំងប្រទេសបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ