លោកនាយករដ្ឋមន្ត្រីប៉ាគីស្ថានប្រឈមមុខទល់នឹងតុលាការកំពូល
លោកនាយករដ្ឋមន្ត្រីប៉ាគីស្ថាន Yusuf Reza Gilani បានសង្កត់បញ្ជាក់ប្រាប់តុលាការកំពូលពីអភ័យឯកសិទ្ធិរបស់លោកប្រធានាធិបតី Asif Ali Zardari នាឱកាសសវនាការនៅថ្ងៃព្រហស្បតិ៍នេះ។ តុលាការកំពូលដែលបានគំរាមទម្លាក់រដ្ឋាភិបាលរបស់លោក បើប្រសិនជាលោកពុំព្រមបើកផ្លូវឲ្យតុលាការអនុវត្តច្បាប់ប្តឹងចាប់ខ្លួនលោកប្រមុខរដ្ឋប៉ាគីស្ថានពីបទបានប្រព្រឹត្តអំពើពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
លោកនាយករដ្ឋមន្ត្រីប៉ាគីស្ថាន Yusuf Reza Gilani បានទៅបង្ហាញខ្លួននៅមុខតុលាការកំពូលនៅថ្ងៃព្រហស្បតិ៍ទី១៩មករាឆ្នាំ២០១២នេះ ដើម្បីធ្វើការឆ្លើយបំភ្លឺពីការចោទប្រកាន់របស់តុលាការពីបទបានបន្ទច់បង្អាក់ការអនុវត្តន៍ច្បាប់ដោយតុលាការ ពាក់ព័ន្ធនឹងអំពើពុករលួយដែលបានប្រព្រឹត្តដោយអ្នកទទួលខុសត្រូវមួយចំនួនក្នុងជួររដ្ឋាភិបាលហើយនិងដោយបច្ចុប្បន្នប្រធានាធិបតីប៉ាគីស្ថានលោក Asif Ali Zardari ។ ទាំងនេះ ក្នុងខណៈពេលដែលទំនាក់ទំនងរវាងប្រទេសប៉ាគីស្ថាននិងសហរដ្ឋអាមេរិកកំពុងជួបនឹងភាពតានតឹង។
ប៉ាគីស្ថានជាប្រទេសដែលមានប្រជាជនប្រមាណ១៨០លាននាក់រស់នៅ។ ប្រទេសនេះកំពុងជួបនឹងវិបត្តិសេដ្ឋកិច្ចដ៏សែនធ្ងន់ធ្ងរ ហើយនិងអស្ថិរភាពដែលបង្កឡើងដោយអំពើភេរវកម្មរបស់ពួកតាលីបង់។ ប៉ាគីស្ថានជាប្រទេសសម្ព័ន្ធមិត្តដ៏សំខាន់របស់សហរដ្ឋអាមេរិកនៅក្នុងតំបន់ កំពុងឋិតនៅក្រោមការគំរាមនៃវិបត្តិនយោបាយដ៏ធ្ងន់ធ្ងរ ដោយហេតុតែមានការប្រឈមមុខរវាងតុលាការកំពូលនិងរដ្ឋាភិបាលស៊ីវិល។
ហើយបញ្ហាអនុស្សរណៈដែលអតីតឯកអគ្គរដ្ឋទូតប៉ាគីស្ថានប្រចាំទីក្រុងវ៉ាស៊ីនតោនបានប្រគល់ឲ្យអាមេរិកាំងនៅខែឧសភាកន្លងទៅ ក្រោយពីមានការបាញ់សម្លាប់មេភេរវជន បិនឡាដិន ដោយកងកុម៉្មង់ដូអាមេរិកាំង ក៏បានក្លាយទៅជារឿងអាស្រូវមួយដ៏ចម្រូងចម្រាស។
នៅក្នុងអនុស្សរណៈនោះ ប៉ាគីស្ថានបានសុំឲ្យទីក្រុងវ៉ាស៊ីនតោនធ្វើអន្តរាគមន៍ដើម្បីជួយការពាររដ្ឋាភិបាលប៉ាគីស្ថានដែលឋិតនៅក្រោមការគំរាមនៃការធ្វើរដ្ឋប្រហារជាយថាហេតុដោយក្រុមយោធាប៉ាគីស្ថាន។ ប្តូរនឹងអន្តរាគមន៍អាមេរិកាំងនេះ ទីក្រុងអ៊ីស្លាម៉ាបាដសន្យានឹងជួយធ្វើការប្រយុទ្ធប្រឆាំងទល់នឹងពួកតាលីបង់ ហើយនិងធ្វើការកាត់បន្ថយឥទ្ធិពលរបស់យោធាប៉ាគីស្ថាន។ ហើយសហរដ្ឋអាមេរិកក៏អាចនឹងចូលរួមធ្វើការត្រួតពិនិត្យទៅលើសព្វាវុធនុយក្លេអ៊ែររបស់ប៉ាគីស្ថានផងទៀត។
ចំណែកឯ លោកប្រធានាធិបតី Asif Ali Zardari បានត្រូវគេសង្ស័យថាជាអ្នកបង្កឲ្យមានអនុស្សរណៈនេះ។ ដូច្នេះហើយបានជាតុលាការកំពូលដែលជំរុញដោយក្រុមយោធាប៉ាគីស្ថានបានធ្វើការអង្កេតទៅលើបញ្ហានេះ។
លោកប្រធានាធិបតីប៉ាគីស្ថានកំពុងឋិតនៅក្នុងស្ថានភាពមួយដ៏លំបាក ដោយហេតុតែមានអប្រជាប្រិយភាពផង ជាប់ចោទពីបទបានប្រព្រឹត្តអំពើពុករលួយផង លោកប្រធានាធិបតី Asif Ali Zardari ត្រូវធ្វើការប្រឈមមុខទល់នឹងយោធាប៉ាគីស្ថានផងទៀត។
រីឯពាក្យចចាមអារ៉ាមពាក់ព័ន្ធនឹងការធ្វើរដ្ឋប្រហារក៏បានលេចឮ នារយៈប៉ុន្មានសប្តាហ៍ចុងក្រោយនេះ។ គួរបញ្ជាក់ថា នៅថ្ងៃព្រហស្បតិ៍នេះ តុលាការកំពូលប៉ាគីស្ថានបានលើកសវនាការយកទៅដាក់នៅថ្ងៃទី១កុម្ភៈខាងមុខ ក្រោយពីបានស្តាប់ការថ្លែងពន្យល់របស់ លោកនាយករដ្ឋមន្ត្រីប៉ាគីស្ថាន Yusuf Reza Gilani ដែលបានថ្លែងការពារលោកប្រធានាធិបតី Asif Ali Zardari ដោយសំអាងទៅលើអភ័យឯកសិទ្ធិប្រធានាធិបតីដែលមានចែងនៅក្នុងរដ្ឋធម្មនុញ្ញប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ