កម្មវិធីនុយក្លេអ៊ែរអ៊ីរ៉ង់ធ្វើឲ្យគេបារម្ភយ៉ាងខ្លាំង
ទីភ្នាក់ងារអន្តរជាតិខាងថាមពលបរមាណូ AIEA បានសម្តែងឲ្យដឹងពីការបារម្ភរបស់គេនៅចំពោះមុខកម្មវិធីនុយក្លេអ៊ែររបស់ប្រទេសអ៊ីរ៉ង់ ដោយផ្អែកលើព័ត៌មានដែលគេទទួលបានថា “ទីក្រុងតេហេរ៉ង់កំពុងខិតខំរៀបចំឲ្យមានអាវុធបរមាណូ”។ នេះបើយោងតាមរបាយការណ៍សម្ងាត់ដែលទីភ្នាក់ងារព័ត៌មានបារាំង AFP បានអាននៅថ្ងៃអង្គារម្សិលមិញនៅទីក្រុងវីយែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២៨
នៅក្នុងបរិបទមួយដែលពោរពេញទៅដោយភាពតានតឹង របាយការណ៍របស់ ទីភ្នាក់ងារអន្តរជាតិខាងថាមពលបរមាណូ AIEA ដែលត្រូវផ្ញើរទៅជូនអ្នកការទូតនៅទីក្រុងវីយែនបានធ្វើឲ្យគេទន្ទឹងរង់ចាំក្រៃលែង។ នៅក្នុងរបាយការណ៍ចុងក្រោយ ទីភ្នាក់ងារអន្តរជាតិខាងថាមពលបរមាណូ AIEA បានគូសបញ្ជាក់ឲ្យដឹងថា ដំណើរការនៃកម្មវិធីនុយក្លេអ៊ែរអ៊ីរ៉ង់បានឈានអភិវឌ្ឍទៅមុខគួរឲ្យកត់សម្គាល់។ របាយការណ៍នោះមានលក្ខណៈតឹងតែងជាមួយកម្មវិធីនុយក្លេអ៊ែរអ៊ីរ៉ង់ ប៉ុន្តែពុំបានឈានទៅដល់ថ្នាក់ចោទប្រកាន់ថា កម្មវិធីនុយក្លេអ៊ែរអ៊ីរ៉ង់ជាកម្មវិធីមានលក្ខណៈយោធាឡើយ។
របាយការណ៍របស់ ទីភ្នាក់ងារអន្តរជាតិខាងថាមពលបរមាណូ AIEA ពុំបានសេសេរថា ទីក្រុងតេហេរ៉ង់ចង់ផលិតគ្រាប់បែកបរមាណូឡើយ ក៏ប៉ុន្តែគេមានក្តីបារម្ភខ្លាចក្រែង កម្មវិធីនុយក្លេអ៊ែរអ៊ីរ៉ង់ឈានទៅរកលក្ខណៈយោធា។
ដើម្បីពង្រឹងរបាយការណ៍របស់គេ ទីភ្នាក់ងារអន្តរជាតិខាងថាមពលបរមាណូ AIEA បានបញ្ជាក់ថា “ព័ត៌មានរបស់គេទទួលបានមកពីដប់ប្រទេសជាសមាជិកដែលគេអាចសន្និដ្ឋានបានថាជាប្រទេសលោកខាងលិច ហើយនិងព័ត៌មានដែលជាផ្លែផ្កាបានមកពីការស៊ើបអង្កេត។
នៅចំពោះមុខរបាយការណ៍នេះ ប្រទេសអ៊ីរ៉ង់បានប្រកាសឲ្យដឹងថា គេនឹងពុំបោះបង់ចោលកម្មវិធីនុយក្លេអ៊ែររបស់គេឡើយ ពីព្រោះវាជាសិទ្ធិពេញលក្ខណៈច្បាប់របស់ប្រទេសអ៊ីរ៉ង់ក្នុងវិស័យនុយក្លេអ៊ែរ ហើយទីក្រុងតេហេរ៉ង់នៅតែបន្តធ្វើសហការជាមួយ ទីភ្នាក់ងារអន្តរជាតិខាងថាមពលបរមាណូ AIEA ទោះបីជាមានរបាយការណ៍ចុងក្រោយបានធ្វើការទិតៀនយ៉ាងខ្លាំងក្លាទៅលើប្រទេសអ៊ីរ៉ង់ក្តី។ នេះជាការគូសបញ្ជាក់របស់អ្នកតំណាងអ៊ីរ៉ង់ប្រចាំទីភ្នាក់ងារអន្តរជាតិខាងថាមពលបរមាណូ AIEA ។
ទីក្រុងតេហេរ៉ង់បានចោទអគ្គនាយកនៃទីភ្នាក់ងារអន្តរជាតិខាងថាមពលបរមាណូ AIEA លោកYukiya Amano ថា មានទង្វើលំអៀងទៅរកនិន្នាការនយោបាយ។
ខាងប្រទេសអ៊ីស្រាអែលឯណោះ នៅថ្ងៃពុធនេះការិយាល័យនៃនាយករដ្ឋមន្ត្រីអ៊ីស្រាអែលពុំបានធ្វើអត្ថាធិប្បាយអ្វីឡើយទៅលើរបាយការណ៍របស់ទីភ្នាក់ងារអន្តរជាតិខាងថាមពលបរមាណូ AIEA ដែលបានថ្លែងឲ្យដឹងពីលក្ខណៈយោធាជាយថាហេតុនៃកម្មវិធីនុយក្លេអ៊ែរអ៊ីរ៉ង់។ អ៊ីស្រាអែលគ្រាន់តែថ្លែងថា “គេនឹងពិនិត្យមើលទៅលើរបាយការណ៍”។
សំណួរមួយលេចឡើងចោទសួរថា តើហេតុអ្វីបានជាអ៊ីស្រាអែលមានឥរិយាបថបែបនេះ?
មូលហេតុគឺមកពីទីក្រុងតែលអាវីវបារម្ភខ្លាចក្រែងសេចក្តីប្រកាសឬគំនិតផ្តួចផ្តើមរបស់អ៊ីស្រាអែលអាចបង្កឲ្យកើតមានការប្រឆាំងនៅលើឆាកអន្តរជាតិដែលនាំឲ្យចំណេញដល់ប្រទេសអ៊ីរ៉ង់។
រីឯប្រធានគណៈកម្មការខាងការពារជាតិនិងការបរទេសនៅសភាអ៊ីស្រាអែលវិញ បានទាមទារឲ្យមានទណ្ឌកម្មយ៉ាងធ្ងន់ដាក់ទៅលើប្រទេសអ៊ីរ៉ង់ ហើយការវាយប្រហារតាមផ្លូវយោធាគឺជាមធ្យោបាយចុងក្រោយបំផុត។
ទីក្រុងវ៉ាស៊ីនតោននិងប្រទេសសម្ព័ន្ធមិត្តលោកខាងលិចវិញ គេគ្រោងយកមកប្រើ របាយការណ៍ចុងក្រោយរបស់ទីភ្នាក់ងារអន្តរជាតិខាងថាមពលបរមាណូ AIEA ដើម្បីពង្រីកពង្រឹងទណ្ឌកម្មដាក់ទៅលើប្រទេសអ៊ីរ៉ង់ ហើយប្រទេសលោកខាងលិចក៏គ្រោងផងទៀតបញ្ចុះបញ្ចូលទីក្រុងម៉ូស្គូនិងទីក្រុងប៉េកាំងឲ្យធ្វើការពង្រឹងទណ្ឌកម្មសេដ្ឋកិច្ចនិងហិរញ្ញវត្ថុរបស់អង្គការសហប្រជាជាតិដែលធ្លាប់បានដាក់ទៅលើទីក្រុងតេហេរ៉ង់តាំងពីឆ្នាំ២០០៧។
ចំណែកខាងប្រទេសចិនវិញ បានទាមទារនៅថ្ងៃអង្គារម្សិលមិញឲ្យទីក្រុងតេហេរ៉ង់ធ្វើការចរចាហើយនិងធ្វើសហការជាមួយទីភ្នាក់ងារអន្តរជាតិខាងថាមពលបរមាណូ AIEA ។
រីឯប្រទេសរុស្ស៊ីឯណោះ គេបានសម្តែងឲ្យឃើញនូវការសោកស្តាយរបស់គេនៅចំពោះមុខការកើនឡើងនៃភាពតានតឹង នៅខណៈពេលដែលកិច្ចចរចានៃក្រុម៥+១( ពោលគឺ សមាជិកទាំង៥នៃក្រុមប្រឹក្សាសន្តិសុខនៃអ.ស.ប.អាមេរិក រុស្ស៊ី បារាំង អង់គ្លេស ចិន+បន្ថែមប្រទេសអាល្លឺម៉ង់)កំពុងជួបនឹងការគាំងស្ទះ។ ហើយទីក្រុងម៉ូស្គូសោកស្តាយរបាយការណ៍ចុងក្រោយរបស់ ទីភ្នាក់ងារអន្តរជាតិខាងថាមពលបរមាណូ AIEA ដែលបានធ្វើឲ្យភាពតានតឹងបានកើនឡើងមួយកម្រិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ