ជំនួបកំពូលអឺរ៉ុបរិះរកដំណោះស្រាយជួយស្រោចស្រង់តំបន់អឺរ៉ូ
ប្រមុខដឹកនាំនៃប្រទេសសមាជិកសហភាពអឺរ៉ុបទាំង២៧ប្រទេសបានជួបប្រជុំគ្នារហូតដល់ព្រឹកថ្ងៃព្រហស្បតិ៍ទី២៧តុលានេះដើម្បីរិះរកដំណោះស្រាយឲ្យវិបត្តិហិរញ្ញវត្ថុនៅក្នុងតំបន់អឺរ៉ូ។ គេបានរកឃើញចំណុចព្រមព្រៀងគ្នាសំខាន់ៗជាច្រើនពាក់ព័ន្ធនឹងបញ្ហាវិបត្តិប្រាក់បំណុលក្រិក បញ្ហាកង្វះមូលធនធនាគារ ហើយនិងបញ្ហាមូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៣
ក្រោយពីមានកិច្ចចរចាគ្នាយ៉ាងតឹងតែងរវាងអ្នកដឹកនាំ២៧ប្រទេសសមាជិកនៃសហភាពអឺរ៉ុបរួចមក គេបានសម្រេចថា ធនាគារអឺរ៉ុបដែលមានបញ្ហាហិរញ្ញវត្ថុត្រូវតែរិះរកធ្វើការចាក់បញ្ចូលមូលធនថ្មីទៀតទៅក្នុងធនាគាររបស់ខ្លួន។ ធនាគារអឺរ៉ុបទាំងនោះត្រូវរកឲ្យបានសាច់ប្រាក់ថ្មីៗទៀតប្រមាណមួយរយប្លាយពាន់លានអឺរ៉ូ សម្រាប់ធ្វើជាមូលធនបន្ថែមចាក់បញ្ចូលទៅក្នុងធនាគារ។ បើប្រសិនជាធនាគារអឺរ៉ុបទាំងនោះរកមូលធនថ្មីពុំបានទេ នោះរដ្ឋជាអ្នកមានភារកិច្ចជួយផ្តល់ជំនួយ។
សម្រាប់ធនាគារបារាំងដែលជាម្ចាស់បំណុលដ៏សំខាន់របស់ប្រទេសក្រិកនិងប្រទេសអ៊ីតាលី គេត្រូវការមូលធនថ្មីបន្ថែមប្រមាណជាងដប់ពាន់លានអឺរ៉ូ។ ចំនួនទឹកប្រាក់នេះ ធនាគារបារាំងអាចនឹងរកបានដោយខ្លួនឯង ដោយពុំចាំបាច់មានអន្តរាគមន៍របស់រដ្ឋបារាំងឡើយ។ ក៏ប៉ុន្តែ សម្រាប់ធនាគារអេស្ប៉ាញឬធនាគារអ៊ីតាលី ពួកគេពិតជាជួបនឹងបញ្ហា ហើយត្រូវការជំនួយអន្តរាគមន៍របស់រដ្ឋាភិបាល។
ពាក់ព័ន្ធនឹងបញ្ហាប្រាក់បំណុលដ៏ច្រើនសន្ធឹកសន្ធាប់របស់ប្រទេសក្រិកវិញ អ្នកដឹកនាំអឺរ៉ុបក្រោយពីបានពិភាក្សាគ្នារហូតដល់ម៉ោង៦ព្រឹកបានសម្រេចថា ធនាគារអឺរ៉ុបដែលជាអ្នកម្ចាស់បំណុលរបស់ប្រទេសក្រិក ត្រូវតែយល់ព្រមលុបចេញប្រាក់បំណុលក្រិកឲ្យបាន៥០%ពោលគឺត្រូវជាមួយរយប្លាយពាន់លានអឺរ៉ូ ដើម្បីអនុញ្ញាតឲ្យម៉ាស៊ីនសេដ្ឋកិច្ចនៃប្រទេសក្រិកអាចមានកម្លាំងធ្វើដំណើរទៅមុខ ហើយនិងចាប់កសាងជីវិតសេដ្ឋកិច្ចមួយថ្មី។
ស្តីពីបញ្ហាមូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុឬFonds Européen de Stabilité Financière (FESF) វិញ លោកស្រីនាយករដ្ឋមន្ត្រីអាល្លឺម៉ង់ Angela Merkel ជាអ្នកទទួលបានជ័យជំនះក្នុងការសម្រេចដាក់ មូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុឬ (FESF) ឲ្យឋិតនៅក្នុងលក្ខណៈជា “មូលនិធិធានារ៉ាប់រង” ពុំមែនជា “ធនាគារ”ដូចការទាមទារចង់បានដោយប្រទេសបារាំងឡើយ។ ដូច្នេះបានសេចក្តីថា បើវិនិយោគិនណាមួយដែលបានផ្តល់ប្រាក់កម្ចីឲ្យទៅប្រទេសក្រិកឬប្រទេសអ៊ីតាលី ហើយនៅពេលដែលប្រទេសទាំងនោះជួបនឹងធនក្ស័យ នោះមូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុឬ (FESF) ដែលមានលក្ខណៈជា“មូលនិធិធានារ៉ាប់រង”នឹងធានាសងប្រាក់កម្ចីមួយផ្នែកឲ្យទៅធនាគារម្ចាស់បំណុលវិញ។ ហើយបន្ថែមពីលើនេះ មូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុឬ (FESF) ក៏មានមូលនិធិអាចនឹងផ្តល់ជំនួយហិរញ្ញវត្ថុឲ្យដល់ប្រទេសអឺរ៉ុបដែលមានវិបត្តិហិរញ្ញវត្ថុផងដែរ។ មូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុឬFonds Européen de Stabilité Financière (FESF)គ្រោងនឹងធ្វើការដំឡើងបរិមាណមូលនិធិរបស់ខ្លួនឲ្យកើនឡើងដល់១ ០០០ពាន់លានអឺរ៉ូ ដែលមកទល់ពេលនេះមានត្រឹមតែ៤៤០ពាន់លានអឺរ៉ូប៉ុណ្ណោះ។
ដើម្បីចេញឲ្យផុតពីវិបត្តិសេដ្ឋកិច្ចនិវិបត្តិហិរញ្ញវត្ថុ តំបន់អឺរ៉ូមិនរំពឹងតែទៅលើមធ្យោបាយរបស់ខ្លួនប៉ុណ្ណោះទេ អ្នកដឹកនាំនៃតំបន់អឺរ៉ូក៏បានឈោងដៃទៅរកប្រទេសដទៃទៀតឲ្យមកជួយដោះស្រាយវិបត្តិរបស់ខ្លួនផងដែរ។ ក្នុងចំណោមប្រទេសទាំងនោះ មានប្រទេសលោកខាងលិចដ៏កម្រ មានដូចជាប្រទេសន័រវែសដែលជាប្រទេសសម្បូណ៌ទៅដោយប្រេងឥន្ធៈហើយនិងមានសល់ប្រាក់បម្រុងទុកយ៉ាងច្រើនមហិមា។ ក៏ប៉ុន្តែតំបន់អឺរ៉ូក៏រំពឹងខ្លាំងទៅលើ ប្រទេសកំពុងអភិវឌ្ឍន៍រីកចម្រើនខ្លាំងមានដូចជាប្រទេសចិនជាដើមដែលមានសល់ប្រាក់បម្រុងទុកដល់ទៅរាប់សែនលានដុល្លារ។ ហេតុដូច្នេះហើយ បានជាទីក្រុងប៉ារីសបានថ្លែងឲ្យដឹងថា លោកប្រធានាធិបតីបារាំងនីកូឡាសាកូហ្ស៊ីនឹងទូរស័ព្ទនៅថ្ងៃនេះទៅពិភាក្សាពីបញ្ហានេះជាមួយលោកប្រធានាធិបតីចិន ហ៊ូ ជិនតាវ។
សាធារណរដ្ឋប្រជាមានិតចិនយល់ព្រមងាកមកជួយសង្គ្រោះប្រទេសក្នុងតំបន់អឺរ៉ូ មកពីប្រទេសចិនជាវិនិយោគិនដ៏សំខាន់នៅក្នុងសហភាពអឺរ៉ុប។ មូលហេតុនេះហើយដែលធ្វើឲ្យប្រទេសចិនបន្តគាំទ្រសហភាពអឺរ៉ុបនិងរូបិយប័ណ្ណអឺរ៉ូ។ នេះជាសេចក្តីថ្លែងប្រកាសរបស់លោក Jia Qinglin ឥស្សរជនចិនម្នាក់ដ៏សំខាន់នៅក្នុងរបបគ្រប់គ្រងចិនបច្ចុប្បន្ន។
ហើយម្យ៉ាងទៀត ប្រទេសចិនក៏មានផលប្រយោជន៍ផ្ទាល់ខ្លួន ក្នុងការរក្សាសហភាពអឺរ៉ុបឲ្យមានស្ថិរភាពផងដែរ ដោយហេតុថា បច្ចុប្បន្ននេះ សហភាពអឺរ៉ុបជា “ដៃគូពាណិជ្ជកម្ម” ទីមួយរបស់ប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ