កូរ៉េខាងត្បូងនិងអាមេរិកនឹងធ្វើសមយុទ្ធរួមមួយនៅសប្តាហ៍ក្រោយ
នៅព្រឹកថ្ងៃព្រហស្បតិ៍ទី២០តុលានេះ កងទ័ពកូរ៉េខាងត្បូងបានប្រាប់ឲ្យដឹងថា ខ្លួននឹងធ្វើសមយុទ្ធដ៏ធំសម្បើមមួយ រួមគ្នានឹងកងកម្លាំងអាមេរិកាំង នៅសប្តាហ៍ក្រោយនេះ។ សមយុទ្ធនឹងប្រព្រឹត្តទៅនៅគ្រប់ទីកន្លែងលើដែនដីកូរ៉េខាងត្បូង រួមទាំងនៅក្នុងសមុទ្រលឿង ជិតព្រំដែនទឹករវាងកូរ៉េទាំងពីរផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
គឺជាសមយុទ្ធរួមគ្នារវាងកងទ័ពកូរ៉េខាងត្បូង និងកងកម្លាំងអាមេរិកាំង សមយុទ្ធដែលនឹងត្រូវប្រព្រឹត្តទៅពីថ្ងៃទី២៧តុលា ដល់ថ្ងៃទី៤វិច្ឆិកា។ នេះជាសេចក្តីជូនដំណឹងរបស់សេនាធិការដ្ឋានរបស់កូរ៉េខាងត្បូង នៅថ្ងៃព្រហស្បតិ៍នេះ។
ទាហានជើងទឹក ជើងគោក និងជើងអាកាសរបស់កូរ៉េខាងត្បូង ចំនួន១៤០ ០០០នាក់និងទាហានអាមេរិកាំង៥០០នាក់ នឹងចូលរួមធ្វើសមយុទ្ធនេះដែលនឹងប្រើបា្រស់គ្រាប់កាំភ្លើងមែនទែន នាវាពិឃាត នាវាចម្បាំង ឧទ្ធម្ភាគចក្រ និងយន្តហោះប្រដេញជាច្រើនគ្រឿង។ សមយុទ្ធនេះនឹងត្រូវប្រព្រឹត្តទៅនៅសឹងគ្រប់ទីកន្លែងនៃដែនដីកូរ៉េខាងត្បូង។
មិនតែប៉ុណ្ណោះ ដូចលើកមុនៗដែរ លំហាត់យោធានេះក៏នឹងត្រូវធ្វើឡើងដែរ នៅជិតព្រំដែនសមុទ្ររវាងកូរ៉េទាំងពីរ គឺក្នុងសមុទ្រលឿង នៅជិតកោះមួយចំនួនរបស់កូរ៉េខាងត្បូង កោះដែលឋិតនៅប៉ែកពាយព្យនៃប្រទេស។ គឺនៅទីនោះហើយ ដែលឧប្បត្តិហេតុ យោធាដ៏ធ្ងន់ធ្ងរមួយចំនួនរវាងកូរ៉េទាំងពីរ បានកើតឡើងឥតឈប់ឈរ តាំងពីឆ្នាំ១៩៩៩មក។ ឧទាហរណ៍ជាក់ស្តែង នៅខែវិច្ឆិកាឆ្នាំ២០១០ កងទ័ពកូរ៉េខាងជើងបានបាញ់ផ្លោង ទៅលើកោះមួយរបស់កូរ៉េខាងត្បូង ជាហេតុបានបណ្តាលឲ្យមានស្លាប់បួននាក់។
រហូតមកទល់ពេលនេះ ទីក្រុងសេអ៊ូលតែងតែបានថ្លែងថា សមយុទ្ធជាបន្តបន្ទាប់គ្នា ដែលខ្លួនបានធ្វើជាមួយអាមេរិក មានគោលដៅតែមួយគត់ នោះគឺប្រឈមមុខនឹងការវាយប្រហារជាយថាហេតុពីសំណាក់សត្រូវនៅក្នុងតំបន់។
រីឯរបបកុម្មុយនិស្តទីក្រុងព្យុងយ៉ាងវិញអះអាងម្តងហើយម្តងទៀតថា គោលដៅនៃសមយុទ្ធរួមគ្នាទាំងអស់នេះរវាងកូរ៉េខាងត្បូងនិងអាមេរិក គឺត្រៀមវាយប្រហារឈ្លានពានទឹកដីកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ