ទស្សនកិច្ចជាប្រវត្តិសាស្រ្តរបស់ប្រមុខគណបក្សកាន់អំណាចនៅកូរ៉េខាងត្បូង ទៅកាន់កូរ៉េខាងជើង
នៅថ្ងៃសុក្រ ទី៣០ កញ្ញាម្សិលមិញ លោក Hong Joon-Pyo ប្រធានគណបក្សកាន់អំណាចនៅកូរ៉េខាងត្បូង បានអញ្ជើញទៅបំពេញទស្សនកិច្ចរយៈពេលខ្លីនៅក្នុងទឹកដីកូរ៉េខាងជើង។ ទោះបីជាលោក Hong Joon-Pyo មិនបានជួបសន្ទនាជាមួយថ្នាក់ដឹកនំាកូរ៉េខាងជើងណាម្នាក់ក៏ដោយ ក៏ទស្សនកិច្ចនេះត្រូវបានគេចាត់ទុកជាព្រឹត្តិការណ៍លើកទីមួយនៅក្នុងប្រវត្តិនយោបាយនៃគណបក្សរបស់លោកប្រធានាធិបតីកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០២:១០
« គឺជាទស្សនកិច្ចការងារផង និងក៏ជាកាតព្វកិច្ចផង ក្នុងនាមជាអ្នកនយោបាយម្នាក់ ដើម្បីចូលរួមស្វែងរកច្រកចេញនៅក្នុងទំនាក់ទំនងរវាងកូរ៉េទំាងពីរ » នេះជាការថ្លែងរបស់លោក Hong Joon-Pyo មុននឹងលោកធ្វើដំណើរឆ្លងកាត់ខ្សែបន្ទាត់ព្រំដែនខ័ណ្ឌចែកកូរ៉េទំាងពីរ។ តែយ៉ាងណាក៏ដោយ គេពិតជាមិនអាចដឹងពីមូលហេតុច្បាស់លាស់នៃដំណើរទស្សនកិច្ចរបស់រូបលោក Hong បានទេ។ អ្វីដែលគេដឹង លោក Hong បានដាក់ជើងជាន់ទឹកដីកូរ៉េខាងជើង ដោយគ្មានការអញ្ជើញពីខាងថ្នាក់ដឹកនំាកូរ៉េខាងជើងណាម្នាក់ទេ។
តាមពិតទៅ លោក Hong មិនបានធ្វើដំណើរចូលជ្រៅរហូតដល់ទីក្រុងព្យុងយ៉ាងនោះឡើយ លោកបានទៅត្រឹមមណ្ឌលឧស្សាហកម្ម Kaesong ដែលស្ថិតនៅតាមបណ្តោយព្រំដែនរវាងគ្នា។ មណ្ឌលឧស្សាហកម្ម Kaesong ក្នុងទឹកដីកូរ៉េខាងជើង ជាតំបន់សេដ្ឋកិច្ចមួយដែលបងប្អូនបង្កើតគូសត្រូវទំាងពីរបានចាប់ដៃធ្វើការរួមគ្នា។ គឺនៅទីនោះហើយដែលមានក្រុមហ៊ុន និងរោងចក្រសហគ្រាសរបស់កូរ៉េខាងត្បូង ដោយប្រើប្រាស់កម្លំាងពលកម្មរបស់ប្រជាជនកូរ៉េខាងជើងប្រមាណជា ៤៥ ០០០នាក់។
អ្វីជាការកត់សម្គាល់ ទោះបីជាដំណើរទៅកាន់ទឹកដីកូរ៉េខាងជើងរបស់លោក Hong មានរយៈពេលតែប៉ុន្មានម៉ោងក៏ដោយ ក៏ទង្វើនេះ ត្រូវបានគេចាត់ទុកជាព្រឹត្តិការណ៍លើកទីមួយនៅក្នុងប្រវត្តិនយោបាយនៃគណបក្សកាន់អំណាចនៅកូរ៉េខាងត្បូង។ ម្យ៉ាងទៀត ទង្វើនេះក៏បានបង្កប់នូវសារនយោបាយថ្មីមួយទៀតនៃឆន្ទៈចង់បង្កើនទំនាក់ទំនងរវាងបងប្អូនបង្កើតគូសត្រូវទំាងពីរឡើងវិញ។ ទំនាក់ទំនងដែលបានធ្លាក់ដល់បាតដាលតំាងពីនិទាឃរដូវឆ្នំា ២០១០ មកម្ល៉េះ។
ការកត់សម្គាល់មួយទៀត ដំណើរទៅកាន់ទឹកដីកូរ៉េខាងជើងរបស់ប្រមុខគណបក្សកាន់អំណាចនៅកូរ៉េខាងត្បូងពេលនេះបានធ្វើឡើង បន្ទាប់ពីលោករដ្ឋមន្រ្តីថ្មីកូរ៉េខាងត្បូង ទទួលបន្ទុកខាងការបង្រួបបង្រួមកូរ៉េទំាងពីរបានលើកឡើងពីភាពទន់ភ្លន់ដែលកំពុងបន្តមានទៅវិញ ទៅមករវាងគ្នា។
សូមជម្រាបជូនថា ក្នុងរយៈពេលប៉ុន្មានសប្តាហ៍ចុងក្រោយនេះ ទីក្រុងសេអ៊ូល និងទីក្រុងព្យុងយ៉ាងបានសម្តែងឲ្យឃើញនូវឆន្ទៈដ៏ល្អរបស់គេរៀងៗខ្លួនក្នុងគោលដៅកាត់បន្ថយភាពតានតឹងរវាងគ្នា។ ភាពតានតឹងដែលកើតចេញពីបញ្ហានុយក្លេអ៊ែរកូរ៉េខាងជើងផង និងពីឧប្បត្តិហេតុនៅតាមព្រំដែនរវាងកងទ័ពទំាងសងខាងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ