លោក Anna Hazare បន្តកូដកម្មអត់អាហារ ចំណែកលោកនាយករដ្ឋមន្រ្តីព្យាយាមសម្រុះសម្រួល
នៅថ្ងៃសៅរ៍ ទី២០ សីហាម្សិលមិញ លោកនាយករដ្ឋមន្រ្តីឥណ្ឌា Manmohan Singh បានបញ្ចេញប្រតិកម្មជាលើកទីមួយទាក់ទងនឹងការធ្វើកូដកម្មអត់អាហាររបស់លោក Anna Hazare។ លោក Hazare ជាសកម្មជនប្រឆាំងអំពើពុករលួយ និងដែលបានចាប់ផ្តើមធ្វើកូដកម្មអត់អាហាររយៈពេល ១៥ថ្ងៃកាលពីថ្ងៃសុក្រ ទី១៩ សីហា នៅប៉ែកកណ្តាលទីក្រុង New Delhi ដោយមានមនុស្សចូលរួមគំាទ្រប្រមាណជា ២០ ០០០នាក់។ លោក Manmohan Singh បានប្រកាសថា រដ្ឋាភិបាលត្រៀមខ្លួនរួចជាស្រេចដើម្បីបើកកិច្ចចរចាទាក់ទងនឹងបញ្ហានេះ។ តែយ៉ាងណាក៏ដោយនៅថ្ងៃនេះ លោក Anna Hazare មិនបានយកចិត្តទុកដាក់នឹងការអំពាវនាវរបស់លោកនាយករដ្ឋមន្ត្រីទេ។
ចុះផ្សាយនៅថ្ងៃ៖
ស្តាប់ - ០១:៤១
“ ទោះបីជាលោកនាយករដ្ឋមន្ត្រីមកកាន់ទីនេះផ្ទាល់ ក៏ខ្ញុំមិនចាកចេញដែរ ដរាបណាគម្រោងច្បាប់ប្រឆំាងអំពើពុករលួយរបស់យើងនៅមិនទាន់បានអនុម័តទេនោះ ” នេះជាការថ្លែងរបស់លោក Anna Hazare ពីទីកន្លែងដែលលោកកំពុងបន្តធ្វើកូដកម្មអត់អាហារនៅលើទីលានមួយស្ថិតប៉ែកកណ្តាលទីក្រុង New Delhi។ មានអាយុ ៧៤ឆ្នំា សកម្មជនប្រឆំាងអំពើពុករលួយរូបនេះចង់បន្តដាក់គំនាបលើរដ្ឋាភិបាលរបស់លោក Manmohan Singh ឲ្យអនុម័តឆាប់រហ័សនូវច្បាប់ប្រឆំាងអំពើពុករលួយមួយដ៏មានប្រសិទ្ធិភាព។ អ្វីដែលលោក Anna Hazare និងក្រុមអ្នកគំាទ្ររបស់លោកចង់បាននោះ គឺច្បាប់ប្រឆំាងអំពើពុករលួយមួយដែលផ្តន្ទាទោសមន្រ្តីពុករលួយគ្រប់ជាន់ថ្នាក់ តំាងពីថ្នាក់ក្រោម រហូតដល់ថ្នាក់លើ ដោយរាប់បញ្ចូលទំាងរូបលោកនាយករដ្ឋមន្រ្តីផងដែរ។
នៅទីបំផុត និងដោយប្រឈមមុខនឹងចលនាប្រឆាំងអំពើពុករលួយដែលកាន់តែពុះកញ្ជ្រោលទៅនោះ លោកនាយករដ្ឋមន្រ្តី Manmohan Singh ក៏យល់ព្រមចេញមុខធ្វើអន្តរាគមន៍ជាលើកទី១ នៅថ្ងៃសៅរ៍ ទី២០ សីហាម្សិលមិញ។ « យើងត្រូវការច្បាប់ប្រឆំាងអំពើពុករលួយមួយប្រកបដោយប្រសិទ្ធិភាព ហើយយើងត្រូវបំបាត់គ្រប់ឧបសគ្គទំាងឡាយណាដែលកំពុងរារំាងដំណើរការនេះ » នេះជាពាក្យពេចន៍ដែលលោក Manmohan Singh បានថ្លែងទៅកាន់លោក Anna Hazare និងក្រុមអ្នកគំាទ្ររបស់លោក Hazare។ ទំាងនេះសុទ្ធសឹងជាសញ្ញាដែលលោក Manmohan Singh ចង់ប្រាប់ទៅលោក Anna Hazare ថា រដ្ឋាភិបាលបានត្រៀមខ្លួនរួចស្រេចហើយដើម្បីបើកកិច្ចចរចាទាក់ទងនឹងបញ្ហានេះ។
តែយ៉ាងណាក៏ដោយ ការអំពាវនាវរបស់លោក Manmohan Singh មិនត្រូវបានលោក Anna Hazare និងក្រុមអ្នកគំាទ្ររបស់លោកយកត្រចៀកស្តាប់ទេ។ ផ្ទុយទៅវិញ កូដកម្មអត់អាហាររយៈពេល ១៥ថ្ងៃដែលលោក Anna Hazare បានចាប់ផ្តើមកាលពីថ្ងៃសុក្រ ទី១៩ សីហាបាននិងកំពុងបន្តរហូតដល់ថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ