ការភ័យស្លន់ស្លោជាថ្មីម្តងទៀតនៅលើទីផ្សារមូលបត្រអន្តរជាតិ
ទីផ្សារមូលបត្រនៅទូទាំងពិភពលោកបានស្គាល់ទិវាដ៏ខ្មៅងងឹតមួយនៅថ្ងៃ ព្រហស្បតិ៍ម្សិលមិញ ហើយនិងនៅថ្ងៃសុក្រទី១៩សីហានេះ ដោយហេតុតែអ្នកវិនិយោគភ័យបារម្ភខ្លាចសេដ្ឋកិច្ចពិភពលោកមានអត្រា កំណើនសេដ្ឋកិច្ចទន់ខ្សោយ ហើយនិងបារម្ភខ្លាចធនាគារជួបនឹងសភាពធនក្ស័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ភាពស្ងប់ស្ងាត់ក្រោយពីព្យុះសង្ឃរានៃវិបត្តិសេដ្ឋកិច្ចនិងវិបត្តិហិរញ្ញវត្ថុកាលពីសប្តាហ៍មុន បានកើតមានតែមួយយៈកាលដ៏ខ្លីប៉ុណ្ណោះ។ ទស្សនវិស័យនៃសន្ទុះកំណើនសេដ្ឋកិច្ចពិភពលោកបានត្រូវគេប្រមើលឃើញថា អាចធ្លាក់ស្រុតចុះ ហើយធនាគារមួយចំនួនអាចជួបនឹងសភាពធនក្ស័យ។ បន្ថែមពីលើនេះ តួលេខបានមកពីសេដ្ឋកិច្ចអាមេរិកាំងសុទ្ធតែជាដំណឹងពុំល្អ។
មូលហេតុទាំងនេះហើយ ដែលបានធ្វើឲ្យទីផ្សារមូលបត្រនៅទីក្រុងប៉ារីសបាត់បង់អស់៥,៤៨% ទីផ្សារមូលបត្រនៅទីក្រុងឡុងដ្រឹ៍ធ្លាក់ស្រុតចុះអស់៤,៤៩% នៅទីក្រុងហ្វ្រង់ហ្វ័របាត់បង់អស់៥,៨២% នៅទីក្រុងមីឡង់ធ្លាក់ចុះអស់៦,១៥%កាលពីថ្ងៃព្រហស្បតិ៍ម្សិលមិញ។
ភាពភ័យស្លន់ស្លោនេះបានឆ្លងរីករាលដាលដល់ទីផ្សារមូលបត្រអាមេរិកាំង ដោយបានធ្វើឲ្យទីផ្សារមូលបត្រនៅទីក្រុងញីវយ៉កបាត់បង់អស់៣,៦៨% ហើយនិងទីផ្សារភាគហ៊ុននៅទីក្រុង Sao Paolo ធ្លាក់ស្រុតចុះអស់៣,៥២%។
នៅព្រឹកថ្ងៃសុក្រទី១៩សីហាឆ្នាំ២០១១នេះទៀត ទីផ្សារមូលបត្រនៅទីក្រុងប៉ារីសបានធ្លាក់បាត់បង់អស់៣,៤៣%បន្ថែមទៀត។ សម្រាប់ទីក្រុងឡុងដ្រឹ៍ក៏ដូចគ្នាអ៊ីចឹងដែរ បានស្រុតចុះអស់ប្រមាណ៣%។ចំណែកឯទីផ្សារមូលបត្រអាស៊ីសំខាន់ៗក៏ពុំខុសគ្នាដែរ នៅថ្ងៃសុក្រនេះ ទីផ្សារភាគហ៊ុននៅទីក្រុងតូក្យូបានបាត់បង់អស់២,១៥% នៅទីក្រុងសេអ៊ូលធ្លាក់ចុះអស់៤,៤៩% និងនៅទីក្រុងហុងកុងស្រុតចុះអស់២,៤៨%។
មូលហេតុគឺអ្នកវិនិយោគនៅអាស៊ីបារម្ភភ័យខ្លាចមានដំណើរសេដ្ឋកិច្ចដើរថយក្រោយនៅសហរដ្ឋអាមេរិក។ សហរដ្ឋអាមេរិកដែលជាមហាអំណាចសេដ្ឋកិច្ចទីមួយពិភពលោក ពុំបានផ្តល់តួលេខល្អសោះឡើយដើម្បីធ្វើឲ្យគេមានទំនុកចិត្តកក់ក្តៅ។ ជាក់ស្តែង វិស័យអចលនទ្រព្យអាមេរិកាំងជួបនឹងបញ្ហាគាំងស្ទះ ចំនួនអ្នកឥតការងារធ្វើចេះតែកើនឡើងជាលំដាប់ សកម្មភាពនៃឧស្សាហកម្មកម្មន្តសាលដែលជាក្បាលម៉ាស៊ីនដ៏សំខាន់សម្រាប់ជួយអូសទាញកំណើនសេដ្ឋកិច្ចអាមេរិកាំងបានធ្លាក់ស្រុតចុះនៅខែសីហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ