អៀរ៉ង់យល់ព្រមតាមសំណើរបស់ក្រុងម៉ូស្គូជុំវិញបញ្ហានុយក្លេអ៊ែរ
គឺក្នុងបរិបទនៃការយល់ព្រមនេះ ដែលលោករដ្ឋមន្ត្រីការបរទេសរុស្ស៊ី Serguei Lavrov ទទួលជួបចរចានៅម៉ូស្គូថ្ងៃនេះ ជាមួយសមភាគីអៀរ៉ង់លោក Ali Akbar Saleh បន្ទាប់ពីប្រធានក្រុមប្រឹក្សាសន្តិសុខរុស្ស៊ី លោក Nicolai Patrushev បាននាំទៅកាន់ទីក្រុងTeheran នូវគំនិតផ្តួចផ្តើមរបស់រុស្ស៊ីខាងស្វែងរកដំណោះស្រាយឲ្យបញ្ហា នុយក្លេអ៊ែរអៀរ៉ង់ទៅជូនលោកប្រធានាធិបតីអៀរ៉ង់ Ahmadinejad ដែលពីចំណែកខ្លួនបានឲ្យតម្លៃជាវិជ្ជមានដល់សំណើរុស្ស៊ីនោះ។
ចុះផ្សាយនៅថ្ងៃ៖
ស្តាប់ - ០២:១៨
នាពេលចុងក្រោយទីក្រុងម៉ូស្គូស្រាប់តែសកម្មយ៉ាងខ្លាំងការខំស្វះស្វែងរបស់ខ្លួនឆ្ពោះទៅរកដំណោះស្រាយឲ្យបញ្ហានុយក្លេអ៊ែរអៀរ៉ង់ដោយបំផុសមកនូវសំណើដែលត្រូវគេដាក់ឈ្មោះទៅហើយថា ជា “ ផែនការ Lavrov “។ ផែនការនេះ ឈរលើគោលការណ៍ដែលថា ៖“ ជាថ្នូរនឹងជំហានជាក់លាក់នីមួយៗ ឈានដោយទីក្រុង Teheran នៅលើផ្លូវបំពេញតាមការទាមទាររបស់”ទីភ្នាក់ងារអន្តរជាតិខាងត្រួតពិនិត្យលើថាមពលបរមាណូ” ហៅកាត់ថា AIEA អៀរ៉ង់ទទួលជារង្វាន់គឺ ការបន្ធូរមួយកម្រិតទៅដែរ ទណ្ឌកម្មដែលអ.ស.ប.ដាក់ទៅលើប្រទេសនេះ។
អាជ្ញាធរអៀរ៉ង់ថ្លែងថា គេពេញចិត្តនឹងផែនការនេះ។ បស្ចិមលោកដោយសំដីខាងក្រៅក៏គាំទ្រដែរ ដល់គំនិតផ្តួចផ្តើមរបស់រុស្ស៊ី ប៉ុន្តែ ទាំងមន្ទិលក្នុងចិត្តថា វាអាចនាំមកនូវជោគជ័យ។
តាមដែលកាសែតក្រុងម៉ូស្គូ ឈ្មោះ Kommersantលេខថ្ងៃនេះចុះផ្សាយដោយយោងទៅលើប្រភពក្នុងក្រសួងការបរទេសរុស្ស៊ី “ ផែនការ Lavrov “ បានទទួលនូវការសម្របយោបល់ជាមុនទៅហើយជាមួយនឹងអន្តរការី៥ទៀត ក្នុងក្រុម៦ប្រទេស ដែលទទួលបន្ទុកខាងធ្វើកិច្ចចរចា ជុំវិញបញ្ហានុយក្លេអ៊ែរអៀរ៉ង់ពោលគឺ ស.រ.អា. អង់គ្លេសបារាំង អាល្លឺម៉ង់និងចិន។ យ៉ាងណាមិញ ទីក្រុងវ៉ាស៊ីនតោនបានចាត់ទុកគំនិតផ្តួចផ្តើមរបស់រុស្ស៊ីថា “មានប្រយោជន៍”។
ប៉ុន្តែ ព្រមជាមួយនេះមានអ្នកការទូតអាមេរិកាំងខ្លះនាំគ្នាខ្សឹបខ្សៀវ ថា “ ផែនការ Lavrov “មានភ័ព្វសំណាងតិចណាស់ សម្រាប់លេចចេញជាផ្លែផ្កា។ តាមមតិគេ លុះណាតែមួលខ្ចៅបន្តឹង ទណ្ឌកម្មទល់នឹងអៀរ៉ង់ថែមទៀត ទើបមានប្រសិទ្ធភាពជាងពីព្រោះស្ថានការណ៍សេដ្ឋកិច្ចនៅអៀរ៉ង់ឥឡូវកាន់តែយ៉ាប់យ៉ឺនទៅក្រោមទណ្ឌកម្មអន្តរជាតិហើយថ្នាក់ដឹកនាំប្រទេសនេះសោត កំពុងប្រេះឆា ដោយការប្រទូសរ៉ាយគ្នាផ្ទៃក្នុង។
កិច្ចចរចានៅម៉ូស្គូថ្ងៃនេះ រវាងប្រមុខការទូតរុស្ស៊ីនិងអៀរ៉ង់ ក៏តាំងគោលដៅស្តារទំនាក់ទំនងរវាងប្រទេសទាំងពីរឲ្យមានប្រក្រតីភាពឡើងវិញក្រោយពីតាមបទបញ្ជាលោកប្រធានាធិបតី មេដេវេដេវ ក្នុងខែមិថុនាឆ្នាំទៅមិញរុស្ស៊ីបានបោះឆ្នោតគាំទ្រដល់ការដាក់ទណ្ឌកម្មបន្ថែមទៅលើអៀរ៉ង់ ហើយជាចម្លើយតបវិញ ប្រធានាធិបតីអៀរ៉ង់ Ahmadinejad បានហៅលោក មេដេវេដេវ ថាជា“អ្នកបម្រើផលប្រយោជន៍ពួកខ្មាំងសត្រូវរបស់អៀរ៉ង់”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ