អង្គការការពារបរិស្ថានEIA ចោទកងទ័ពវៀតណាមពីបទកាប់បំផ្លាញព្រៃឈើនៅឡាវ
អង្គការក្រៅរដ្ឋាភិបាលមួយដែលទទូលបន្ទុកការពារបរិស្ថាន នៅថ្ងៃព្រហស្បតិ៍២៨កក្កដាម្សិលមិញ បានចោទប្រកាន់កងទ័ពវៀតណាម ថាដើរតួនាទីដ៏ចំបង ក្នុងការរត់ពន្ធឈើមកពីប្រទេសLaos ដែលជាសកម្មភាពកាក់កបខ្លាំងបំផុតនិងក៏គំរាមបរិស្ថានព្រៃឈើយ៉ាងធ្ងន់ធ្ងរ -ព្រៃឈើដែលជាទីពំនាក់របស់ពលរដ្ឋឡាវជាច្រើនលាននាក់។ ជាបន្ទាន់ភ្លាមនោះ អ្នកនាំពាក្យនៃក្រសួងការបរទេសវៀតណាម លោកស្រី Nguyen Phuong Nga បានច្រានចោលការចោទប្រកាន់នេះនិងធានាថា ប្រទេសវៀតណាម មានការយកចិត្តទុកដាក់ជាទីបំផុតទៅលើកិច្ចការពារព្រៃឈើ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ទីភ្នាក់ងារតាមដានបរិស្ថាន (EIA)ដែលទើបបានចេញផ្សាយរបាយការណ៍មួយរបស់ខ្លួន នៅថ្ងៃព្រហស្បតិ៍២៨កក្កដាម្សិលមិញ បានចោទប្រកាន់ថា កងទ័ពវៀតណាមជាពិសេសក្រុមហ៊ុនសហប្រតិបត្តិការសេដ្ឋកិច្ចផ្ទាល់របស់ខ្លួន (COECCO) ដើរ តួនាទីដ៏សំខាន់ក្នុងការរត់ពន្ធឈើមកពីប្រទេសឡាវ។
លោក Faith Doherty អ្នកទទួលខុសត្រូវរបស់អង្គការក្រៅរដ្ឋាភិបាលផ្នែកការពារព្រៃឈើ ដែលស្ថិតនៅទីក្រុង Londres បានទាមទារឲ្យកងទ័ពវៀតណាមបញ្ឈប់ការកាប់បំផ្លាញព្រៃឈើនៅប្រទេសឡាវ។ ពីព្រោះយោងតាមទីភ្នាក់ងារតាមដានបរិស្ថាន (EIA) ប្រជាជនឡាវដែលភាគច្រើនរស់នៅតំបន់ដាច់ស្រយាល នៅតែបន្តការពឹងផ្អែកជានិច្ចទៅលើព្រៃឈើរបស់ខ្លួនសំរាប់ជាស្បៀងអាហារចិញ្ចឹមជីវិតប្រចាំថ្ងៃ។
ម្យ៉ាងទៀត ព្រៃឈើឡាវនៅទសវត្សឆ្នាំ១៩៤០ លាតសន្ធឹងរហូតដល់៧០% នៃទឹកដីប្រទេស ក៏ប៉ុន្តែកម្រិតនេះ បានធ្លាក់ចុះមក៤១%វិញនៅឆ្នាំ ២០០២។ ទីភ្នាក់ងារតាមដានបរិស្ថាន (EIA) នេះ ក៏មានការព្រួយបារម្ភដែរ ខ្លាចព្រៃឈើនៅប្រទេសឡាវអាចនឹងធ្លាក់ចុះដល់ទៅ ៣០%ចាប់ពីពេលនេះទៅដល់ឆ្នាំ ២០២០។
ដោយសារតែអំពើពុករលួយខ្លាំងពេកនៅក្នុងរដ្ឋបាលព្រៃឈើឡាវ បានជាគ្មាននរណាមួយធ្វើដឹងឮឡើយបម្រាមរបស់ទីក្រុងវៀងចន្ទន៍ក្នុងការនាំឈើទៅបរទេសដោយខុសច្បាប់។ នេះជាការគូសបញ្ជាក់របស់ EIA។ ម្យ៉ាងទៀត ឈើឡាវយ៉ាងតិចចំនួន ៥ម៉ឺនម៉ែត្រគូបដែលមានតម្លៃជាង១៥០លានដុល្លារ ត្រូវបានគេដឹកជញ្ជូនឆ្លងកាត់ព្រំដែនរវាងឡាវនិងវៀតណាមជារៀងរាល់ឆ្នាំ។ បន្ទាប់មក ផលិតផលតុទូតាំងដែលធ្វើអំពីឈើ ត្រូវបានគេនាំចេញទៅសហរដ្ឋអាមេរិកនិងសហភាពអឺរ៉ុប ដោយមិនគោរពច្បាប់ហាមមិនឲ្យនាំឈើចេញទៅបរទេស។ នេះបើយោងតាម ទីភ្នាក់ងារតាមដានបរិស្ថាន EIA។
យោងតាមទិនានុប្បវត្តិផ្លូវការឡាវ Vientiane Times នាយករដ្ឋមន្ត្រីឡាវ លោក Thongsing Thammavong នៅខែមិថុនាមុននេះ បានចេញបញ្ជាឲ្យអាជ្ញាធរ ពង្រឹងវិធានការដើម្បីប្រឆាំងទល់នឹងការរត់ពន្ធឈើ ដែលជាការរួមចំណែកដ៏ធំក្នុងការធ្វើឲ្យជំនួញឈើខុសច្បាប់នេះកាន់តែរីកធំឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ