ជំនួបលើកទី១រវាងលោកស្រី អ៊ុង សានស៊ូជី និងមន្រ្តីរដ្ឋាភិបាលភូមា
នៅថ្ងៃច័ន្ទ ទី២៥ កក្កដានេះ ប្រមុខបក្សប្រឆំាងភូមា លោកស្រី អ៊ុង សានស៊ូជី និងមន្រ្តីជាន់ខ្ពស់ម្នាក់នៃរដ្ឋាភិបាលថ្មីរបស់ភូមាបានសន្ទនាគ្នាជាលើកទី១នៅទីក្រុងរ៉ង់ហ្គូន។ គេនៅមិនទាន់បានដឹងថា តើមានប្រធានរឿងអ្វីខ្លះដែលគូភាគីទំាងពីរបានលើកយកទៅនិយាយនោះ ក៏ប៉ុន្តែ ព្រឹត្តិការណ៍នេះត្រូវបានក្រុមអ្នកតាមដានសភាពការណ៍ភូមាសម្តែងការសាទរយ៉ាងខ្លំាង។
ចុះផ្សាយនៅថ្ងៃ៖
ស្តាប់ - ០២:៤១
តំាងពីលោកស្រីអ៊ុង សានស៊ូជីត្រូវបានរបបសឹកភូមាដោះលែងឲ្យមានសេរីភាពក្នុងខែវិច្ឆិកា ឆ្នំា ២០១០មក នេះជាលើកទី១ហើយដែលលោកស្រីត្រូវបានមន្រ្តីរដ្ឋាភិបាលថ្មីភូមាអនុញ្ញាតឲ្យចូលជួប។ គឺជាជំនួបជាមួយលោក អ៊ុង ជី រដ្ឋមន្រ្តីក្រសួងការងារដែលលោកស្រីធ្លាប់បានជួបម្តងហើយនាដើមឆ្នំា ២០១០កន្លងទៅ កាលណោះ លោកស្រីកំពុងជាប់ឃុំនៅក្នុងគេហដ្ឋាន។
គេនៅមិនទាន់អាចដឹងបានទេ ថាតើគូភាគីទំាងពីរបានលើកយកប្រធានរឿងអ្វីខ្លះ ទៅជជែកគ្នានោះ។ ប៉ុន្តែ អ្វីដែលគេដឹង ជំនួបនេះបានធ្វើឡើងតែប៉ុន្មានថ្ងៃប៉ុណ្ណោះ ក្រោយពីសេចក្តីថ្លែងការណ៍របស់លោកស្រីប្រមុខការទូតអាមេរិក ហ៊ីលឡារី គ្លីនតុននៅកោះបាលីក្នុងប្រទេសឥណ្ឌូនេស៊ី ដែលបានអំពាវនាវឲ្យរដ្ឋាភិបាលថ្មីភូមាជ្រើសរើសផ្លូវដែលខ្លួនត្រូវដើរ។ លោកស្រី គ្លីនតុនបានបញ្ជាក់ថា រដ្ឋាភិបាលភូមាត្រូវតែជ្រើសរើសផ្លូវដើរឲ្យបានច្បាស់លាស់ តើត្រូវបន្តអនុវត្តរបបនយោបាយយោធាផ្តាច់ការដូចមុន ឬមួយក៏ទទួលយកនូវរដ្ឋាភិបាលស៊ីវិលថ្មីមួយដែលគោរពលទ្ធិប្រជាធិបតេយ្យ និងគិតផលប្រយោជន៍របស់ប្រជាជន។ ទន្ទឹមគ្នានេះ លោកស្រីប្រមុខការទូតអាមេរិកក៏បានអំពាវនាវឲ្យមានកិច្ចសន្ទនាប្រកបដោយលក្ខណៈស្ថាបនារវាងរដ្ឋអំណាច និងក្រុមអ្នកប្រឆំាង ពិសេសគឺជាមួយលោកស្រី អ៊ុង សានស៊ូជី។
ជាទូទៅ ក្រុមអ្នកតាមដានសភាពការណ៍ភូមានាំគ្នាសាទរចំពោះជំនួបរវាងមន្រ្តីរដ្ឋាភិបាល និងលោកស្រី អ៊ុង សានស៊ូជី។ ប៉ុន្តែពួកគេហាក់ដូចជាគ្មានជំនឿសោះឡើយ ថារដ្ឋអំណាចភូមានឹងធ្វើការផ្លាស់ប្តូរនយោបាយភ្លាមៗដូចដែលសហគមន៍អន្តរជាតិចង់បានពិតប្រាកដនោះ ព្រោះថា តំាងពីគណបក្សរបស់លោកស្រីមិនបានចូលរួមបោះឆ្នោតកាលពីខែវិច្ឆិកាមក លោកស្រី អ៊ុង សានស៊ូជីនៅតែត្រូវបានរដ្ឋអំណាចរារំាងមិនឲ្យចូលប្រឡូកក្នុងឆាកនយោបាយជាថ្មីទេ។ កាលពីពេលថ្មីៗនេះ រដ្ឋអំណាចភូមាក៏ធ្លាប់បានព្រមានលោកស្រីម្តងហើយ ខណៈពេលដែលលោកស្រីបានធ្វើដំណើរទៅកាន់តំបន់ Bangan កាលពីដើមខែកក្កដា និងដែលត្រូវបានប្រជាជនទទួលយ៉ាងអ៊ឹកធឹកបំផុត។
សំណួរដែលចោទ ហេតុអ្វីបានជាមន្រ្តីរដ្ឋាភិបាលយល់ព្រមទទួលជួបលោកស្រីនៅពេលនេះ ?
ក្រុមអ្នកវិភាគបានមើលឃើញថា ជំនួបនេះគ្រាន់តែជានិមិត្តរូបមួយដែលរដ្ឋអំណាចភូមាចង់បង្ហាញសហគមន៍អន្តរជាតិពីឆន្ទៈដ៏ល្អរបស់ខ្លួនប៉ុណ្ណោះ។ តាមពិតទៅ និងអ្វីដែលរដ្ឋអំណាចភូមាចង់បានពីសហគមន៍អន្តរជាតិនោះគឺ ការលើកចេញវិញនូវទ័ណ្ឌកម្មសេដ្ឋកិច្ចដែលអាមេរិក និងសហភាពអឺរ៉ុបទើបបានពន្យារពេលបន្តទៀតនាពេលថ្មីៗកន្លងទៅនេះ។ ម្យ៉ាងទៀត និងក្នុងនាមជាសមាជិករបស់អាស៊ាន ភូមាក៏បាននិងកំពុងព្យាយាមជំនះសមាជិកដទៃទៀតឲ្យយល់ព្រមទទួលយកសំណូមពររបស់ខ្លួន ធ្វើជាប្រធានអាស៊ាននៅឆ្នំា ២០១៤ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ