ភេរវកម្មប្រឆាំងយោធាបារាំងនាំឲ្យគេចោទសួរពីបញ្ហាក្លែងបន្លំខ្លួននៃពួកភេរវជន
មួយថ្ងៃមុនថ្ងៃបុណ្យជាតិបារាំង១៤កក្កដា យោធាបារាំងកាន់មរណទុក្ខក្រោយពីមានភេរវកម្មអត្តឃាតបានប្រព្រឹត្ត ប្រឆាំងនឹងទាហានបារាំងនៅប្រទេសអាហ្វហ្គានីស្ថាននៅថ្ងៃទី១៣កក្កដា ឆ្នាំ២០១១។ ភេរវកម្មអត្តឃាតបានបណ្តាលឲ្យទាហានបារាំងស្លាប់៥នាក់និងរបួស ៤នាក់។ ភេរវជនអត្តឃាតបានបំផ្ទុះគ្រាប់បែកនៅពេលបិទបញ្ចប់ជំនួបរវាង អ្នកទទួលខុសត្រូវអាហ្វហ្គានីស្ថាននិងយោធាបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
នៅទីក្រុងកាប៊ូល យោធាបារាំងកំពុងចោទសួរពីអត្តសញ្ញាណរបស់ភេរវជនអត្តឃាតហើយនិងអំពីវិធីដែលភេរវជនអាចធ្វើការក្លែងបន្លំឆ្លងកាត់របាំងការពារសន្តិសុខ។ គេត្រូវការពេលវេលាជាច្រើនថ្ងៃទើបអាចដឹងពីលទ្ធផលនៃការស៊ើបអង្កេតនេះ។ ប៉ុន្តែបើយោងតាមនាយសេនាធិការនៃកងកម្លាំងយោធាបារាំង ភេរវជនអត្តឃាតប្រហែលជាជនបរទេសដែលគេបានបង្ហាត់ហ្វឹកហ្វឺននៅក្រៅប្រទេស។
ភេរវជនអត្តឃាតប្រហែលជាស្លៀកពាក់ឯកសណ្ឋានទាហានឬនគរបាលអាហ្វហ្គានីស្ថាន ។ នារយៈពេលប៉ុន្មានខែចុងក្រោយនេះ ពួកភេរវជនច្រើនប្រើវិធីក្លែងបន្លំបែបនេះ។ ការទៅទិញឯកសណ្ឋានយោធាឬនគរបាលអាហ្វហ្គានីស្ថាន យកមកស្លៀកពាក់ពុំមែនជាការ លំបាកអ្វីឡើយ។ គេអាចរកទិញបាននៅសឹងគ្រប់ទីផ្សារដោយចំណាយប្រាក់តែ១០០ប្លាយដុល្លារប៉ុណ្ណោះ។
ការក្លែងបន្លំខ្លួនបែបនេះបានធ្វើឲ្យអាជ្ញាធរអាហ្វហ្គានីស្ថាន និងបរទេសនៅទីក្រុងកាប៊ូលកើតមានក្តីបារម្ភយ៉ាងខ្លាំង ដោយហេតុថាកងកម្លាំងសន្តិសុខអាហ្វហ្គានីស្ថាននឹងត្រូវទទួលបន្ទុកការពារសន្តិសុខនៅក្នុង៧តំបន់នៃប្រទេសអាហ្វហ្គានីស្ថាននៅពេលអនាគតខាងមុខនេះ។
ការវាយប្រហាររបស់ពួកភេរវជននេះបង្ហាញឲ្យឃើញថា ទោះបីជាមានប្រតិបត្តិការយោធាបារាំងនៅតំបន់កាពីសាក៏ដោយ ក៏ពួកភេរវជនបះបោរនៅមានសមត្ថភាពក្នុងការរៀបចំធ្វើការវាយប្រហារដោយមានរបៀបគ្រប់គ្រាន់។
លោកប្រធានាធិបតីបារាំងនីកូឡាសាកូហ្ស៊ីបានប្រកាសឲ្យដឹងថា នៅឆ្នាំ២០១៤នឹងគ្មានទៀតឡើយកងកម្លាំងយោធាបារាំងនៅប្រទេសអាហ្វហ្គានីស្ថាន ហើយតំបន់កាពីសានឹងត្រូវសាងផ្ទេរឲ្យទៅកងកម្លាំងយោធាអាហ្វហ្គានីស្ថាន ។ ដូច្នេះ នេះពិតជាបេសកកម្មមួយដ៏សែនធំធេង !!!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ