គ.ជ.ប.ថៃពន្យារការទទួលស្គាល់សុពលភាពនៃបេក្ខជន១៤២នាក់
លោកស្រីអនាគតនាយករដ្ឋមន្ត្រីថៃយីងឡាក់ស៊ីណាវ៉ាត់បានថ្លែងនៅ ថ្ងៃពុធនេះឲ្យដឹងថា ការចោទប្រកាន់ពីបទមានភាពមិនប្រក្រតីកើតមាននៅក្នុងឱកាសឃោសនា បោះឆ្នោតនៅថ្ងៃទី៣កក្កដាឆ្នាំ២០១១កន្លងទៅ ដែលបានបណ្តាលឲ្យ គ.ជ.ប.ថៃពន្យារការទទួលស្គាល់សុពលភាពនៃបេក្ខជន១៤២នាក់ដែលក្នុងនោះ មានលោកស្រីយីងឡាក់ស៊ីណាវ៉ាត់ផងថា ពុំមែនជាការអ្វីគួរឲ្យបារម្ភឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
គណៈកម្មការជាតិរៀបចំការបោះឆ្នោតថៃនៅល្ងាចថ្ងៃអង្គារទី១២កក្កដាម្សិលមិញ បានពន្យារសេចក្តីសម្រេចចិត្តទទួលស្គាល់ “សុពលភាព”នៃបេក្ខជន១៤២នាក់ ដែលក្នុងនោះមានលោកស្រីយីងឡាក់ស៊ីណាវ៉ាត់ផង ដោយបានចោទប្រកាន់ថា មានភាពមិនប្រក្រតីកើតមាននៅក្នុងឱកាសឃោសនាបោះឆ្នោតនៅថ្ងៃទី៣កក្កដាឆ្នាំ២០១១កន្លងទៅ។
ចំណែកឯ លោកស្រីយីងឡាក់ស៊ីណាវ៉ាត់វិញបានថ្លែងថា លោកស្រីសង្ឃឹមនិងមានជំនឿថា គ.ជ.ប.នឹងរកយុត្តិធម៌ឲ្យបក្សភឿថៃនិងឲ្យលោកស្រី។
បើប្រសិនជា គ.ជ.ប.ថៃពុំព្រមទទួលស្គាល់ជ័យជំនះរបស់លោកស្រីយីងឡាក់ស៊ីណាវ៉ាត់មែន នោះពួកអាវក្រហមដែលមានភាគច្រើនលើសលុបជាអ្នកគាំទ្រលោកថាក់ស៊ីនស៊ីណាវ៉ាត់ច្បាស់ជាខឹងក្រេវក្រោធនាំគ្នាធ្វើបាតុកម្មដូចកាលនៅនិទាឃរដូវឆ្នាំ២០១០នៅទីក្រុងបាងកកជាពុំខាន។ គួររម្លឹកថា បាតុកម្មរបស់ពួកអាវក្រហមកាលណោះបានត្រូវវាយបង្ក្រាបដោយយាធាដែលបានបណ្តាលឲ្យមានមនុស្សស្លាប់ប្រមាណ៩០នាក់និងរបួសជិត២ ០០០នាក់។
សូមបញ្ជាក់ថា គណបក្សភឿថៃ ដែលបានចូលរួបរួមជាមួយគណបក្សនយោបាយតូចៗ៥ទៀត អាចប្រមូលបានអ្នកតំណាងរាស្ត្រប្រមាណ៣០០នាក់។
បើយោងតាមច្បាប់ រដ្ឋសភាថ្មីត្រូវមានជំនួបប្រជុំក្នុងរយៈពេល៣០ថ្ងៃក្រោយការបោះឆ្នោត ហើយក្នុងរយៈពេល៣០ថ្ងៃបន្ទាប់មកទៀត សភាត្រូវជ្រើសតែងតាំងប្រមុខរដ្ឋាភិបាលថ្មី។
ក៏ប៉ុន្តែ បច្ចុប្បន្ននេះគ.ជ.ប.ត្រូវធ្វើការអង្កេត ក្រោយពីមានពាក្យបណ្តឹងរបស់គណបក្សប្រជាធិបតេយ្យរបស់លោកអាប់ភិស៊ីតប្រឆាំងនឹងលោកស្រីយីងឡាក់ស៊ីណាវ៉ាត់។ គណបក្សប្រជាធិបតេយ្យបានទាមទារឲ្យរំលាយគណបក្សភឿថៃ ដោយហេតុថា មានឥស្សរជននយោបាយថៃជាច្រើននាក់មានដូចជារូបលោកថាក់ស៊ីនស៊ីណាវ៉ាត់ជាដើមដែលឋិតនៅក្រោមការហាមប្រាមពុំឲ្យមានសកម្មភាពនយោបាយ បានចូលរួមធ្វើការឃោសនាបោះឆ្នោតដោយខុសច្បាប់។
ក៏ប៉ុន្តែ លោកស្រីយីងឡាក់ស៊ីណាវ៉ាត់បានថ្លែងអះអាងថា លោកស្រីគ្រាន់តែទទួលបាននូវការពន្យល់នែនាំពីលោកថាក់ស៊ីនស៊ីណាវ៉ាត់ជាបងប្រុសរបស់លោកស្រីតែប៉ុណ្ណោះ។ លោកថាក់ស៊ីនស៊ីណាវ៉ាត់ អតីតនាយករដ្ឋមន្ត្រីដែលបានត្រូវយោធាថៃធ្វើរដ្ឋប្រហារទម្លាក់នៅឆ្នាំ២០០៦ ហើយភៀសខ្លួននៅរស់នៅឯបរទេសក្រោយពីបានត្រូវតុលាការថៃកាត់ទោសឲ្យជាប់គុកពីរឆ្នាំពីបទបានប្រព្រឹត្តអំពើពុំស្របច្បាប់ក្នុងវិស័យហិរញ្ញវត្ថុ។
លោកស្រីយីងឡាក់ស៊ីណាវ៉ាត់បានថ្លែងអះអាងទៀតថា លោកថាក់ស៊ីនស៊ីណាវ៉ាត់ជាបងប្រុសគ្រាន់តែឲ្យគំនិតនិងពន្យល់នែនាំប៉ុណ្ណោះ លោកថាក់ស៊ីនពុំបានចួលរួមក្នុងសេចក្តីសម្រេចចិត្តនិងចូលរួមក្នុងក្រុមប្រឹក្សាភិបាលនៃគណបក្សនយោបាយរបស់លោកស្រីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ