ចំនួនគេហទំព័រនៅចិនធ្លាក់ចុះបន្ទាប់ពីវិធានការរឹតត្បិតរបស់រដ្ឋាភិបាល
គេហទំព័រនៅប្រទេសមហាអំណាចចិន ក្នុងឆ្នាំ២០១០ បានធ្លាក់ចុះ ប្រមាណ ៤១% បើតាមរបាយការណ៍មួយរបស់បណ្ឌិតសភាវិទ្យាសាស្រ្តសង្គមដែលបានផ្សព្វផ្សាយកាលពីថ្ងៃ អង្គារ១២កក្កដា ម្សិលមិញ។ ការធ្លាក់ចុះនេះត្រូវបានគេមើលឃើញយ៉ាងច្បាស់ថា គឺជាផលប៉ះពាល់អាក្រក់បន្ទាប់ពីរដ្ឋាភិបាលចិនកុម្មុយនិស្តមួយនេះចេញយុទ្ធនាការរឹតត្បិតសេរីភាពប្រជាជនរបស់ខ្លួន ក្នុងការបញ្ចេញមតិលើទំព័រ Website ចាប់តាំងពីឆ្នាំ២០០៩មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
លទ្ធផលនៃការស្រាវជ្រាវរបស់បណ្ឌិតសភាចិនដែលបង្ហាញអោយឃើញពីការធ្លាក់ចុះ ដល់ទៅពាក់កណ្តាលនៃចំនួន Website ក្នុងរយៈពេលតែមួយឆ្នាំនោះ ប្រហែលមិនមែនជារឿងគួរអោយភ្ញាក់ផ្អើលនោះទេ។ ពីព្រោះគេនៅចាំបានច្បាស់ណាស់ថាកាលពី ឆ្នាំ ២០០៩ កន្លងទៅរដ្ឋាភិបាលកុម្មុយនិស្តចិនមួយនេះបានធ្វើយុទ្ធនាការលុបបំបាត់ និងច្រោះរាល់គេហទំព័រទាំងឡាយណា ដែលផ្សព្វផ្សាយរឿងរ៉ាវនិងពត៌មានដែលមិនស្របទៅនឹងគោលនយោបាយរបស់ខ្លួន។
យុទ្ធនាការដែលមានឈ្មោះថា "កំផែងInternet"របស់ទីក្រុងប៉េកាំងមួយនេះមិនអនុញ្ញាតអោយអ្នកប្រើប្រាស់ Internet ក្នុងប្រទេសរបស់ខ្លូនចូលទៅក្នុងគេហទំព័រមួយចំនួនដែលជាទីពេញនិយមរបស់មនុស្សសម័យបច្ចុប្បន្នដូចជា Facebook Youtube និង Twitterនោះទេ។មានតែទីក្រុង ហុងកុង និងម៉ាកាវប៉ុណ្ណោះ ដែលមានច្បាប់ឯករាជ្យរបស់ខ្លួន អាចគេចផុតពីការអនុវត្តច្បាប់ខាងលើ របស់រដ្ឋសភាចិន។
បើទោះបីជាកន្លងមករដ្ឋាភិបាលចិនអះអាងថាWebsite ជាច្រើនត្រូវបានបិទដោយសារតែ Websiteទាំងនោះផ្ទុកនូវអត្ថបទ រូបភាពនិងវីដេអូ អាសអាភាសក៏ដោយក៏មនុស្សទូទៅមិនជឿទៅលើមូលហេតុនេះឡើយ។ កាលពីខែមីនា ឆ្នាំ២០១០កន្លងទៅ អង្គការអ្នកយកការណ៍ គ្មានព្រំដែនដែលហៅជាភាសាបារាំងថា Reporters Sans Frontière បានផ្សព្វផ្សាយរបាយការណ៏មួយ ដែលបញ្ជាក់ច្បាស់ណាស់ថា ប្រទេសមហាអំណាចមួយនេះឋិតនៅក្នុងចំណោមប្រទេសទាំង១២នៅលើពិភពលោកដែលត្រូវបានគេដាក់ងារថា ជា “ សត្រូវនឹងInternet ”។
អង្គការការពារសិទ្ធិសេរីភាពអ្នកសារពត៌មានរបស់បារាំងខាងលើ ក៏បានអះអាងទៀតថា ប្រទេសចិនឋិតនៅក្នុងចំណោមប្រទេសដែលបានដាក់ទោសនិង ចាប់ឃុំអ្នកប្រើប្រាស់ Internet ច្រើនជាងគេ ដែលរហូតមកដល់បច្ចុប្បន្នមានដល់ទៅ៧២នាក់។
គួរបញ្ជាក់ដែរថា មកទល់នឹងថ្ងៃនេះ រដ្ឋាភិបាលចិនបានចាត់មនុស្សរាប់ពាន់នាក់ អោយអង្គុយចាំត្រួតពិនិត្យមើល និងធ្វើអន្តរាគមន៍ រាល់ពេលណាដែលគេដឹងថាមាន គេហទំព័រណាមួយបញ្ចេញនូវពត៌មានឃោសនា ឬ ពាក្យចចាមអារ៉ាមអ្វីមិនល្អ។ ដូចកាលពីពេលថ្មីៗនេះគេមិនអាចរកឃើញការអត្ថាធិប្បាយណាមួយ ទាក់ទងទៅនឹងពាក្យចចាមអារ៉ាមពីមរណភាពរបស់ អតីតប្រធានាធិបតីចិន គឺលោក Jiang Zemin នៅលើគេហទំព័រនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ