ថៃ៖ យោធាជាតួអង្គក្រៅផ្លូវការ តែមានតួនាទីសំខាន់ក្នុងការបោះឆ្នោតសភា
យោធាថៃបានទៅធ្វើការឃោសនាគាំទ្ររបបរាជានិយមនៅប៉ែកឦសាននៃប្រទេសដែលជាដែនអំណាចរបស់ពួកអាវក្រហមដែលជាអ្នកគាំទ្រលោកអតីតនាយករដ្ឋមន្ត្រីថាក់ ស៊ីន។ ក៏ប៉ុន្តែនៅរយៈពេលមួយសប្តាហ៍ទៀត ការបោះឆ្នោតជ្រើសតាំងសមាជិកសភានឹងឈានមកដល់ ទង្វើរបស់យោធាថៃនេះត្រូវគេមើលឃើញថា យោធាថៃចង់រំលឹកឲ្យគេដឹងពីកម្លាំងនិងតួនាទីរបស់ខ្លួននៅក្នុង ការបោះឆ្នោតដែលនឹងត្រូវប្រព្រឹត្តទៅនៅថ្ងៃទី៣កក្កដាឆ្នាំ២០១១ ខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ប្រទេសថៃបានស្គាល់រដ្ឋប្រហារដល់ទៅ១៨លើកចាប់តាំងពីឆ្នាំ១៩៣២មក ហើយរដ្ឋប្រហារចុងក្រោយបានកើតមាននៅឆ្នាំ២០០៦។ ការទៅឃោសនាគាំទ្ររបបរាជានិយមដោយយោធាថៃនៅប៉ែកឦសាននៃប្រទេសដែលជាដែនអំណាចរបស់ពួកអាវក្រហម បានត្រូវគេវិនិច្ឆ័យថាយោធាថៃចង់លូកដៃចូលទៅក្នុងការបោះឆ្នោតសភានៅថ្ងៃទី៣កក្កដាឆ្នាំ២០១១ខាងមុខនេះ។
ពួកអាវក្រហមដែលជាអ្នកគាំទ្រលោកអតីតនាយករដ្ឋមន្ត្រីថាក់ ស៊ីន ហើយដែលបាននាំគ្នាទៅធ្វើបាតុកម្មអស់រយៈពេលពីរខែនៅទីក្រុងបាងកកកាលពីឆ្នាំទៅដែលបានបណ្តាលឲ្យមានមនុស្សស្លាប់ប្រមាណ៩០នាក់និងរបួសជិត២ ០០០នាក់ មានគោលបំណងទម្លាក់រដ្ឋាភិបាលរបស់លោកអាប់ភីស៊ីត។
កម្មវត្ថុជាផ្លូវការនៃទស្សនកិច្ចរបស់យោធាថៃនៅប៉ែកឦសាននៃប្រទេសគឺធ្វើឡើងដើម្បីជួយផ្សព្វផ្សាយ “ផែនការអភិវឌ្ឍន៍នៃរបបរាជានិយម” និងដើម្បីជួយបំផុសបំផុលឲ្យប្រជាជនថៃមានភក្តីភាពស្មោះស្ម័គ្រនឹងព្រះមហាក្ស័ត្រ។ នេះជាការគូសបញ្ជាក់របស់លោកឧត្តមសេនីយ Darran Yutthawonsuk។
សូមបញ្ជាក់ថា តំបន់ប៉ែកឦសាននៃប្រទេសថៃគឺជាដែនអំណាចរបស់ពួកអាវក្រហមដែលជាអ្នកគាំទ្រលោកអតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា ដែលគេបានធ្វើរដ្ឋប្រហារទម្លាក់នៅឆ្នាំ២០០៦។ ចំណែកឯលោកស្រីយីងឡាក់ ស៊ីណាវ៉ាត្រាដែលត្រូវជាប្អូនស្រីបានទទួលរងការវាយប្រហារតាមពាក្យសំដីពីសំណាក់ប្រមុខយោធាថៃលោកឧត្តមសេនីយចាន-អូ-ចា។
ដូច្នេះ បើប្រសិនជាលោកស្រីយីងឡាក់ ស៊ីណាវ៉ាត្រាឈ្នះឆ្នោតមែន នោះវាជាការចាំបាច់ដែលលោកស្រីយីងឡាក់ ស៊ីណាវ៉ាត្រាត្រូវមានការយល់ព្រមព្រៀងគ្នាជាមុនសិនជាមួយយោធាថៃដើម្បីបង្កើតរដ្ឋាភិបាល។ ការយល់ព្រមព្រៀងគ្នានេះគឺឋិតនៅលើបញ្ហាឈ្មោះរដ្ឋមន្ត្រីក្រសួងការពារជាតិ ហើយនិងការរក្សាទុកលំដាប់តំណែងយោធាបច្ចុប្បន្ននេះឲ្យនៅដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ