ជប៉ុន៖ អូគីណាវ៉ាប្រឆាំងការរក្សាទុកមូលដ្ឋានយោធាអាមេរិក
លោកអភិបាលខេត្តនៃកោះអូគីណាវ៉ា ដែលឋិតនៅប៉ែកខាងត្បូងនៃប្រទេសជប៉ុននៅថ្ងៃពុធនេះ បានប្រឆាំងការពន្យារពេលប្តូរទីតាំងមូលដ្ឋានយោធាអាមេរិកដែលបច្ចុប្បន្ននេះឋិតនៅចំតំបន់ជិតទីក្រុងGinowan។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
សហរដ្ឋអាមេរិកនិងប្រទេសជប៉ុនបានទទួលស្គាល់នៅថ្ងៃអង្គារម្សិលមិញថា ការប្តូរទីតាំងមូលដ្ឋានយោធាអាមេរិកដែលបច្ចុប្បន្ននេះឋិតនៅតំបន់ជិតទីក្រុងGinowan ហើយដែលត្រូវលើកទៅដាក់នៅតំបន់ឆកសមុទ្រគ្មានមនុស្សរស់នៅ នឹងពុំអាចប្រព្រឹត្តទៅបានចាប់ពីពេលនេះទៅទល់ឆ្នាំ២០១៤ដូចការគ្រោងទុកឡើយ។
សម្ព័ន្ធមិត្តទាំងពីរប្រទេសបានបញ្ជាក់ឲ្យដឹងផងដែរថា គម្រោងសាងសង់មូលដ្ឋានយោធាអាមេរិកមួយថ្មីនៅតំបន់ដទៃទៀតនៃកោះអូគីណាវ៉ានឹងត្រូវប្រព្រឹត្តទៅឲ្យបានសម្រេចនៅពេលខាងមុខឆាប់ៗនេះ។
ប្រជាជននៃកោះអូគីណាវ៉ាដែលធុញទ្រាន់នឹងសំឡេងលាន់ឮ នឹងឧប្បត្តិហេតុ និងការកើនឡើងនៃឧក្រិដ្ឋកម្ម បានទាមទារឲ្យបិទមូលដ្ឋានយោធាអាមេរិកនៅFutenmaជាស្ថាពរ ហើយពួកគេក៏បានផងទៀតប្រឆាំងនឹងការសាងផ្ទេរមូលដ្ឋានយោធាអាមេរិកលើកទៅដាក់នៅតំបន់ឆកសមុទ្រHenoko។
ចំណែកឯ លោកអភិបាលខេត្តនៃកោះអូគីណាវ៉ាដែលប្រឆាំងមូលដ្ឋានយោធាអាមេរិកបានថ្លែងប្រកាសនៅក្នុងសេចក្តីថ្លែងការណ៍មួយថា “គេត្រូវតែដោះស្រាយបញ្ហាមូលដ្ឋានយោធាអាមេរិកនេះឲ្យបានឆាប់រហ័ស ហើយវត្តមាននៃមូលដ្ឋានយោធាអាមេរិកដែលមានសភាពពាក់កណ្តាលអចិន្ត្រៃយ៍បែបនេះនឹងពុំអាចមានបន្តទៅទៀតបានឡើយ”។
ប្រទេសជប៉ុននិងសហរដ្ឋអាមេរិកបានបញ្ជាក់ឲ្យដឹងទៀតថា ការសាងផ្ទេរទាហានម៉ារីនអាមេរិក៨ ០០០នាក់យកទៅដាក់នៅកោះGuamគឺធ្វើឡើងដើម្បីជួយបន្ធូរសម្រាលបន្ទុកមូលដ្ឋានយោធាអាមេរិកនៅកោះអូគីណាវ៉ាដែលបច្ចុប្បន្ននេះមានវត្តមានយោធាអាមេរិកដល់ទៅជាងពាក់កណ្តាលនៃចំនួនទាហានអាមេរិកសរុប៤៧ ០០០នាក់ដែលឈរជើងនៅប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ