រដ្ឋាភិបាលប៉ាគីស្ថានត្រូវបង្ខំចិត្តតាមវែកមុខរកអ្នកដឹកនាំដែលបានជួយបិន ឡាដិន
នៅប៉ុន្មានម៉ោងមុននេះ នាយករដ្ឋមន្ត្រីប៉ាគីស្ថានYusuf Raza Gilani បានថ្លែងសុន្ទរកថាទៅកាន់ប្រជាជាតិ ជួនចំពេលមួយដែលសង្គ្រាមប៉ាកកាជុំវិញវត្តមានជាច្រើនឆ្នាំរបស់ប្រមុខអាល់កៃដាបិន ឡាដិន នៅក្នុងប្រទេសប៉ាគីស្ថាន កំពុងបន្តរីកធំឡើង។ ជាងមួយសប្តាហ៍ក្រោយការស្លាប់របស់បិន ឡាដិន ទាំងសហរដ្ឋអាមេរិក ទាំងបណ្តាបក្សប្រឆាំងប៉ាគីស្ថាន ទាមទារឲ្យអ៊ីស្លាម៉ាបាដបើកការស៊ើបអង្កេតវែកមុខរកក្រុមអ្នកដឹកនាំណាដែលបានជួយលាក់ខ្លួនបិន ឡាដិន នៅក្នុងប្រទេស។
ចុះផ្សាយនៅថ្ងៃ៖
កាលពីថ្ងៃអាទិត្យទី៨ឧសភាម្សិលមិញ ជាលើកទីមួយបង្អស់ លោកអូបាម៉ាបានអះអាងថា បិន ឡាដិនទំនងជាបានទទួលការគាំទ្រពីអ្នកដឹកនាំប៉ាគីស្ថានខ្លះ។ អ៊ីចឹងហើយបានជាប្រធានាធិបតីអាមេរិកបានអំពាវនាវឲ្យអាជ្ញាធរអ៊ីស្លាម៉ាបាដបើកការស៊ើបអង្កេតមួយជាបន្ទាន់។ «យើងយល់ឃើញថា អាចមានបណ្តាញសម្ងាត់មួយដែលបានជួយលាក់ខ្លួនបិន ឡាដិន(...)តែយើងមិនដឹងថា តើបណ្តាញនោះឋិតនៅខាងក្រៅឬនៅខាងក្នុងរដ្ឋាភិបាលប៉ាគីស្ថានទេ។ យើងត្រូវធ្វើការស៊ើបអង្កេត ហើយរដ្ឋាភិបាលប៉ាគីស្ថានខ្លួនឯងត្រូវបើកការស៊ើបអង្កេត» នេះជាសំដីរបស់លោកអូបាម៉ា។
ទន្ទឹមនេះ នៅប្រទេសប៉ាគីស្ថានឯណោះ បណ្តាគណបក្សប្រឆាំងបាននិងកំពុងបន្តពួតដៃគ្នាវាយប្រហារពាក្យសំដីទៅលើរដ្ឋាភិបាល។ ជាក់ស្តែងនៅថ្ងៃចន្ទទី៩ឧសភានេះ ប្រធាននៃសម្ព័ន្ធអ៊ីស្លាមដែលជាបក្សរបស់អតីតនាយករដ្ឋមន្ត្រីNawaz Sharif បានទាមទារឲ្យថ្នាក់ដឹកនាំនៃប្រទេសលាលែងចេញពីមុខតំណែង។
យ៉ាងណាក៏ដោយ ឯកអគ្គរដ្ឋទូតប៉ាគីស្ថានប្រចាំនៅទីក្រុងវ៉ាស៊ីនតោន សហរដ្ឋអាមេរិក Husain Haqqani បានអះអាងថា អ៊ីស្លាម៉ាបាដនឹងចាត់វិធានការ ឲ្យសមតាមលទ្ធផលនៃការស៊ើបអង្កេត ដោយបានថ្លែងប្រាប់ទូរទស្សន៍អាមេរិកABCថា«យើងនឹងជម្រុះចេញពីតំណែង អ្នកណាក៏ដោយដែលបានចូលដៃក្នុងការលាក់ខ្លួនបិន ឡាដិន នៅក្នុងទឹកដីប៉ាគីស្ថាន»។
អ្វីដែលជាក់ច្បាស់នៅខណៈនេះ គឺបិន ឡាដិនពិតជាបានទទួលការគាំទ្រយ៉ាងហោចណាស់ក៏ពីសំណាក់អាជ្ញាធរមូលដ្ឋាននៃប្រទេសប៉ាគីស្ថានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ