បិន ឡាដិន ជាមេភេរវជនធំជាងគេបង្អស់នៅក្នុងប្រវត្តិមនុស្សជាតិ
ឈ្មោះរបស់បិន ឡាដិន បានផ្តើមល្បីរន្ទឺពេញក្នុងសកលលោក នៅឆ្នាំ២០០១ គឺក្រោយពីមានមហាភេរវកម្មថ្ងៃទី១១កញ្ញាឆ្នាំ២០០១ ទៅលើអគារភ្លោះWorld Trade Centerនៅសហរដ្ឋអាមេរិក។ យ៉ាងណាមិញ សម្រាប់ពួកអ្នកនិយមសង្គ្រាមសាសនាអ៊ីស្លាម បិន ឡាដិន បានក្លាយទៅជាវីរបុរសរបស់ពួកគេ តាំងពីឆ្នាំ១៩៧៩មកម្ល៉េះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
បើគេមើលប្រវត្តិរបស់ បិន ឡាដិន(Ben Laden) គេមិននឹកស្មានឡើយថា ជនជាតិអារ៉ាប៊ី សាអ៊ូឌីត រូបនេះអាចក្លាយទៅជាភេរវជនអន្តរជាតិដ៏ល្បីល្បាញជាងគេបង្អស់នៅក្នុងលោក។
បិន ឡាដិន កើតនៅទីក្រុងRyad នៅឆ្នាំ១៩៥៧ គឺជាកូនទី១២នៃត្រកូលគ្រួសារអ្នកមានស្តុកស្តម្ភមួយ រៀននៅមហាវិទ្យាល័យKing Abdul Aziz ក្នុងទីក្រុងDjeddah។ គឺនៅក្នុងមហាវិទ្យាល័យនេះហើយ ដែលបិន ឡាដិន ផ្តើមមានទំនាក់ទំនងជាមួយពួកអ៊ីស្លាមជ្រុលនិយម នៅឆ្នាំ១៩៧៣។ កាលនោះ យុវជន បិន ឡាដិន ដែលជាអ្នកជឿសាសនាអ៊ីស្លាមខ្លាំង សង្វាតសិក្សា និងចូលចិត្តអានតែគម្ពីរព្រមទាំងអត្ថបទសាសនា។
ក្រោយពីសហភាពសូវៀតចូលឈ្លានពានប្រទេសអាហ្វហ្គានីស្ថាន ក្នុងឆ្នាំ១៩៧៩ យុវជនបិន ឡាដិន ក៏ស្ម័គ្រចិត្តចូលបម្រើទ័ពព្រៃអាហ្វហ្គានីស្ថាន ដោយឆ្លើយតបទៅនឹងការអំពាវនាវរបស់ពួកនិយមសង្គ្រាមសាសនាDjihad ដើរប្រមែប្រមូលលុយនិងបញ្ចុះបញ្ចូលយុវជននៃបណ្តាប្រទេសជុំវិញឈូងសមុទ្រពែរ្ស ឲ្យទៅជួយពួកmoudjqhidinesអាហ្វហ្គានីស្ថាន។
បិន ឡាដិន ទទួលពួកស្ម័គ្រចិត្តទាំងនេះ ដាក់បញ្ចូលទៅក្នុងអង្គការមួយដែលក្រោយមកក្លាយទៅជាអង្គការ“Al-Qaïda” បានន័យថា“មូលដ្ឋាន”។ អង្គការនេះរបស់បិន ឡាដិន ប្រយុទ្ធប្រឆាំងនឹងសហភាពសូវៀត និងថែមទាំងទទួលជំនួយពីសហរដ្ឋអាមេរិកទៀតផង ដែលកាលនោះក្នុងសម័យសង្គ្រាមត្រជាក់ជាសត្រូវរបស់ទីក្រុងម៉ូស្គូ។
នៅឆ្នាំ១៩៨៩ ក្រោយពីកងទ័ពសូវៀតដកខ្លួនចេញពីអាហ្វហ្គានីស្ថាន បិន ឡាដិន ត្រឡប់មកអារ៉ាប៊ី សាអ៊ូឌីតវិញ តែមិនត្រូវគ្នាជាមួយព្រះចៅFahd រួចហើយក៏ភៀសខ្លួនទៅនៅប្រទេសស៊ូដង់។
នៅប្រទេសស៊ូដង់ បិន ឡាដិន ចាប់ផ្តើមបង្កើតជំរំហ្វឹកហ្វឺនពួកភេរវជន ដើម្បីប្រឆាំងនឹងផលប្រយោជន៍របស់អាមេរិកវិញម្តង។ នៅឆ្នាំ១៩៩៦ ស៊ូដង់ក្រោមការគាបសង្កត់របស់អាមេរិក ក៏សម្រេចបណ្តេញបិន ឡាដិនចេញពីទឹកដីខ្លួន។ ចាប់ពីពេលនោះមក បិន ឡាដិន ត្រឡប់ទៅរស់នៅក្នុងប្រទេសអាហ្វហ្គានីស្ថានវិញ ដើម្បីចូលដៃជាមួយពួកតាលីបង់ ដើម្បីបង្កើតនិងពង្រីកជំរំហ្វឹកហ្វឺនពួកភេរវជន និងដើម្បីរៀបចំគម្រោងភេរវកម្ម ប្រឆាំងនឹងបស្ចិមលោក ជាពិសេសសហរដ្ឋអាមេរិក។
គឺពីប្រទេសអាហ្វហ្គានីស្ថាននេះហើយ ដែលបិន ឡាដិនរៀបចំគម្រោងភេរវកម្មជាច្រើន ជាអាទិ៍ គម្រោងវាយប្រហារទៅលើស្ថានទូតអាមេរិកនៅតង់សានី នៅកេនយ៉ា និងជាពិសេស គម្រោងមហាភេរវកម្មថ្ងៃទី១១កញ្ញាឆ្នាំ២០០១ទៅលើWorld Trade Center នៅសហរដ្ឋអាមេរិក។
ក្រោយមហាភេរវកម្មថ្ងៃទី១១កញ្ញាឆ្នាំ២០០១ សហរដ្ឋអាមេរិកធ្វើសង្គ្រាមរំលំរបបតាលីបង់នៅអាហ្វហ្គានីស្ថាន និងតាមដេញប្រមាញ់បិន ឡាដិនដែលត្រូវប្រធានាធិបតីប៊ូស(Bush) បញ្ជាឲ្យចាប់ទាំងរស់ឬសម្លាប់ឲ្យទាល់តែបាន។
គេត្រូវរង់ចាំរហូតដល់ពេលនេះ គឺរយៈពេលជិត១០ឆ្នាំ ទើបកងទ័ពអាមេរិកសម្រេចបានជោគជ័យ ក្នុងការសម្លាប់មេភេរវជនអន្តរជាតិដ៏ល្បីល្បាញជាងគេនៅក្នុងប្រវត្តិមនុស្សជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ