យោធាថៃដំឡើងបង្ហាញសាច់ដុំមុនពេលបោះឆ្នោតសភា
ការបោះឆ្នោតជ្រើសតាំងសមាជិកសភាថៃដែលគ្រោងរៀបចំធ្វើនៅដើមខែកក្កដាឆ្នាំ២០១១ខិតកាន់តែជិតមកដល់។ ភាពពុំជាក់ច្បាស់និងលទ្ធផលដែលអាចកើតចេញពីការបោះឆ្នោតនេះអាចក្លាយជាគ្រោះថ្នាក់មួយដល់គណបក្សរបស់លោកអាប់ភិស៊ីត ហេតុដូច្នេះហើយបានជានៅពេលមុនការបោះឆ្នោតសភានេះ យោធាថៃដែលជាអ្នកគាំទ្រគណបក្សប្រជាធិបតេយ្យកាន់កាប់អំណាចសព្វថ្ងៃនេះបានឆ្លៀតឱកាសដំឡើងបង្ហាញសាច់ដុំរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
លោកនាយករដ្ឋមន្ត្រីថៃអាប់ភិស៊ីតវេចាជីវ៉ាដែលគ្រោងរៀបចំធ្វើការបោះឆ្នោតជ្រើសតាំងសមាជិកសភាថៃនៅដើមខែកក្កដាឆ្នាំ២០១១ បានថ្លែងសង្កត់បញ្ជាក់ថា សង្គ្រាមព្រំដែនរវាងថៃនិងកម្ពុជានឹងពុំធ្វើឲ្យប៉ះពាល់ដល់ការបោះឆ្នោតសភានៅដើមខែកក្កដាខាងមុខនេះឡើយ។
ក៏ប៉ុន្តែអ្នកជំនាញការជាច្រើនយល់ឃើញថា សង្គ្រាមព្រំដែនថៃ-កម្ពុជាអាចក្លាយជាឧបករណ៍មួយដ៏ប្រពៃនៅក្នុងដៃរបស់ក្រុមយោធាថៃសម្រាប់យកមកប្រើដើម្បីខាឃាំងសម្ព័ន្ធមិត្តនយោបាយរបស់លោកថាក់ស៊ីនឡើងមកកាន់កាប់អំណាចនៅប្រទេសថៃ។
អ្នកខ្លះទៀតបារម្ភខ្លាចក្រែងលោកនាយករដ្ឋមន្ត្រីថៃអាប់ភិស៊ីតយកលេសសង្គ្រាមព្រំដែនថៃ-កម្ពុជាមកប្រើ សម្រាប់លើកពេលការបោះឆ្នោតសភាដែលគ្រោងធ្វើនៅដើមខែកក្កដាឆ្នាំ២០១១យកទៅដាក់នៅពេលក្រោយ។
គួរកត់សម្គាល់ថា សង្គ្រាមព្រំដែនថៃ-កម្ពុជាពិតជាបានឱកាសមួយដ៏ល្អសម្រាប់យោធាថៃយកខ្លួនមកដាក់ឲ្យឋិតនៅក្រោមការបំភ្លឺបញ្ចាំងនៅឆាកនយោបាយថៃ។ សង្គ្រាមព្រំដែនថៃ-កម្ពុជាពិតជាលេសមួយដ៏ប្រពៃសម្រាប់យោធានិងរដ្ឋាភិបាលថៃឆ្លៀតបង្ហាញឲ្យប្រជាពលរដ្ឋថៃឃើញនូវ “ការស្នេហាជាតិ”របស់ពួកគេ។
សូមបញ្ជាក់ថា លោកថាក់ស៊ីនដែលបច្ចុប្បន្ននេះភៀសខ្លួនរស់នៅឯបរទេសបានត្រូវគេចាត់ទុកថា ជាប្រមុខដឹកនាំពិតប្រាកដនៃគណបក្សPuea Thai ដែលជាបក្សប្រឆាំង។ ចំណែកឯប្រមុខយោធាថៃ លោកឧត្តមសេនីយPrayut Chan-O-Chaដែលជាអ្នករាជានិយមប្រឆាំងនឹងពួកអាវក្រហមបានថ្លែងឲ្យដឹងថាលោកនឹងគោរពលទ្ធផលដែលប្រសូតចេញពីការបោះឆ្នោតសភានៅពេលខាងមុខនេះ។ ក៏ប៉ុន្តែលោកក៏ពុំបានធ្វើការបញ្ជាក់ឲ្យបានច្បាស់ពាក់ព័ន្ធនឹងការធ្វើ “រដ្ឋប្រហារ”ដែលអាចកើតមានជាយថាហេតុនៅខណៈពេលដែលគណបក្សប្រជាធិបតេយ្យនិងសម្ព័ន្ធមិត្តរបស់លោកនាយករដ្ឋមន្ត្រីថៃអាប់ភិស៊ីតវេចាជីវ៉ាគ្មានលទ្ធភាពនឹងឃាឃាំងពុំឲ្យគណបក្សPuea Thaiនិងបក្សពួករបស់លោកថាក់ស៊ីនឡើងមកកាន់កាប់អំណាចនៅប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ