សហភាពអឺរ៉ុប បានសំរេចចិត្ត សម្រាលទណ្ឌកម្មរបស់ខ្លួនដាក់ទៅលើរបបភូមា
នៅថ្ងៃអង្គារម្សិលមិញ សហភាពអឺរ៉ុប បានសំរេចចិត្ត សម្រាលទណ្ឌកម្មរបស់ខ្លួនដាក់ទៅលើរបបភូមា ដោយព្យួរចោលមួយរយៈពេល ការផ្អាប់ទុកធនធាន និងការហាមប្រាមការផ្តល់ទិដ្ឋាការឲ្យដល់សមាជិករដ្ឋាភិបាលភូមា ចំនួន ១/៣ ក្នុងនោះមានរូបលោកប្រមុខការទូតភូមាផងដែរ។ សេចក្តីសម្រេចចិត្តរបស់សហភាពអឺរ៉ុបនេះ បានធ្វើឡើងនៅឱកាសសម័យប្រជុំមួយរបស់បណ្តារដ្ឋមន្ត្រីការបរទេស អឺរ៉ុបនៅទីក្រុង Luxembourg។
ចុះផ្សាយនៅថ្ងៃ៖
សេចក្តីរាយការណ៍របស់ នុយ ប៊ែរណាដែត
សហភាពអឺរ៉ុប បានពន្យារពេលមួយឆ្នាំថែមទៀត ការផ្អាប់ទុកធនធាននិងការហាមប្រាមការផ្តល់ទិដ្ឋាការឲ្យរបបភូមា ក្នុងការធ្វើដំណើរចូលមកកាន់អឺរ៉ុប លើកលែងតែសមាជិកស៊ីវិលចំនួន១/៣នៃរដ្ឋាភិបាលដែលកាន់រដ្ឋអំណាចប៉ុណ្ណោះ ដែលក្នុងនោះក៏មានទាំងរដ្ឋមន្រ្តីក្រសួងការបរទេសលោក U Wunna Maung Lwin ផងដែរ។
មិនតែប៉ុណ្ណោះ សហភាពអឺរ៉ុប ក៏បានសម្រេចចិត្តដែរ ក្នុងការចាប់ផ្តើមបំពេញទស្សនកិច្ចថ្នាក់ជាន់ខ្ពស់ឡើងវិញនៅភូមា ដោយគូសបញ្ជាក់ថាខ្លួនក៏គ្រោងទុក នូវការជួបជាមួយថ្នាក់ដឹកនាំនៃរដ្ឋាភិបាលភូមា ក៏ព្រមទាំងអ្នកតំណាងដ៏សំខាន់ៗនៃគណបក្សប្រឆាំងដែរ។
វិធានការទាំងនេះ គឺមានគោលដៅជាពិសេសដើម្បីលើកទឹកចិត្តនិងឆ្លើយតបវិញចំពោះដំណើរការវិវឌ្ឈន៍មិនទាន់បានល្អប្រសើរគ្រប់គ្រាន់នៅប្រទេសភូមា។ គួររំលឹកថា សេចក្តីសម្រេចចិត្តរបស់សហភាពអឺរ៉ុបនេះ ត្រូវបានធ្វើក្រោយពីរបបសឹកផ្តាច់ការ បានដោះលែងលោកស្រី អ៊ុងសាន់ស៊ូជី ជាមេដឹកនាំបក្សប្រឆាំង ឲ្យមានសេរីភាពឡើងវិញ មួយសប្តាហ៍ ក្រោយពីការបោះឆ្នោតកាលពីខែវិច្ឆិកា ឆ្នាំទៅមិញ បន្ទាប់ពីបានឃុំឃាំងលោកស្រីក្នុងលំនៅឋានអស់រយៈពេល៧ឆ្នាំរួចមក។
ការដោះលែងលោកស្រីស៊ូជី ជ័យលាភីរង្វាន់ណូបែលសន្តិភាពនេះហើយ ដែលជំរុញឲ្យមានការជជែកពិភាក្សាគ្នា អំពី លទ្ធភាព នៃការលើកទណ្ឌកម្ម ដែលសហរដ្ឋអាមេរិកនិងសហភាពអឺរ៉ុប បានដាក់ទៅលើរបបសឹកផ្តាច់ការភូមា ពីបទបានរំលោភបំពានសិទ្ធិមនុស្សនៅក្នុងប្រទេស។
នាពេលថ្មី ៗនេះ អ្នកការទូតសហភាពអឺរ៉ុប ប្រមាណជា៣០នាក់ បានជួបសន្ទនាជាមួយលោកស្រី ស៊ូជី និងគណបក្សប្រឆាំងភូមាផ្សេងៗទៀត ស្តីពី លទ្ធភាពនៃការលើកចេញវិញ ទណ្ឌកម្មដែលសហគមន៍អន្តរជាតិបានដាក់ទៅលើរបបសឹកផ្តាច់ការ។
ក៏ប៉ុន្តែ លោកស្រីស៊ូជី នៅតែទាមទារសុំឲ្យរក្សាទុកវិធានការប្រឆាំងទល់នឹងរបបសឹកផ្តាច់ការ របស់សហគមន៍អន្តរជាតិ ដោយហេតុ ស្ថានការណ៍នៅក្នុងប្រទេសភូមាពុំទាន់បានផ្លាស់ប្តូរគ្រប់គ្រាន់នៅឡើយទេ។
ម្យ៉ាងទៀត ការរក្សាទុកវិធានការដាក់ទណ្ឌកម្មរបស់សហគមន៍អន្តរជាតិនេះ ក៏ជាមធ្យោបាយតែមួយគត់ដើម្បីដាក់សម្ពាធទៅលើពួកឧត្តមសេនីយនៅក្នុងប្រទេសនេះ ដែលមានអ្នកទោសនយោបាយរហូតដល់ ២២០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ