គ្រោះមហន្តរាយនុយក្លេអ៊ែរហ្វ៊ូគូស្ហ៊ីម៉ាបានត្រូវគេលើកដល់កម្រិតអតិបរមាដូចនៅឈែរណូប៊ីល
ប្រទេសជប៉ុនបានស្គាល់ការរញ្ជួយដីយ៉ាងខ្លាំងក្លាពីរលើកទៀតនៅ ថ្ងៃអង្គារទី១២មេសានេះ ហើយអាជ្ញាធរជប៉ុនបានលើកដាក់ដល់កម្រិត៧ដែលជាកម្រិតអតិបរមា គ្រោះមហន្តរាយនុយក្លេអ៊ែរហ្វ៊ូគូស្ហ៊ីម៉ាដូចនៅឈែរណូប៊ីល។តើហេតុអ្វីបានជាគេលើកដាក់ដល់កម្រិតអតិបរមានៅពេលនេះ?
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ការលេចចេញនូវសារធាតុវិទ្យុសកម្មពុំឈប់ឈរហើយនិងសមាច័យ(ការប្រមូលផ្តុំកើនឡើង)នៃវិទ្យុសកម្មទាំងនេះហើយដែលជាមូលហេតុនាំឲ្យគេលើកដាក់ដល់កម្រិត៧ដែលជាកម្រិតអតិបរមានៃគ្រោះមហន្តរាយនុយក្លេអ៊ែរហ្វ៊ូគូស្ហ៊ីម៉ាដូចនៅTchernobyl។ ក៏ប៉ុន្តែអ្នកឯកទេសគូសបញ្ជាក់ថា ផលវិបាកដែលកើតចេញពីគ្រោះមហន្តរាយនុយក្លេអ៊ែរនៅហ្វ៊ូគូស្ហ៊ីម៉ាពុំអាចប្រៀបផ្ទឹមទៅនឹងផលវិបាកនៃគ្រោះមហន្តរាយនុយក្លេអ៊ែរនៅឈែរណូប៊ីលឡើយ។
គួរកត់សម្គាល់ថា មជ្ឈមណ្ឌលនុយក្លេអ៊ែរFukushima-Daiichi បានទទួលរងគ្រោះខូចខាតយ៉ាងធ្ងន់ធ្ងរក្រោយពីមានមហារលកយក្សនិងការរញ្ជួយដីកាលពីថ្ងៃទី១១មីនាកន្លងទៅដែលបានបណ្តាលឲ្យមានមនុស្សស្លាប់និងបាត់ខ្លួនប្រមាណ២៨ ០០០នាក់នៅប៉ែកឦសាននៃប្រទេសជប៉ុន។
នៅថ្ងៃអង្គារនេះ ការរញ្ជួយដីបានកើតមានដល់ទៅពីរលើកនៅប្រទេសជប៉ុនដែលមានកម្រិត៦,៣អង្សានៃមាត្រដ្ឋានរិឆទ័រ ប៉ុន្តែពុំបានធ្វើឲ្យមានការខូចខាតដល់មជ្ឈមណ្ឌលនុយក្លេអ៊ែរFukushima-Daiichiឡើយ។
អ្នកទទួលខុសត្រូវនៃទីភ្នាក់ងារជប៉ុនទទួលបន្ទុកខាងសន្តិសុខនុយក្លេអ៊ែរនិងឧស្សាហកម្មបានថ្លែងពន្យល់ថា សមាច័យ(ការប្រមូលផ្តុំកើនឡើង)នៃវិទ្យុសកម្មដែលលេចចេញពុំឈប់ឈរទាំងនេះហើយដែលជំរុញឲ្យគេលើកដាក់ដល់កម្រិត៧ដែលជាកម្រិតអតិបរមានៃគ្រោះមហន្តរាយនុយក្លេអ៊ែរហ្វ៊ូគូស្ហ៊ីម៉ាដូចនៅTchernobyl។ ទាំងនេះបានន័យថា អាចមានផលវិបាកយ៉ាងធ្ងន់ធ្ងរដល់សុខភាពមនុស្សនិងបរិស្ថាន។
សូមបញ្ជាក់ថា បរិមាណនៃសារធាតុវិទ្យុសកម្មដែលបញ្ចេញពីមជ្ឈមណ្ឌលនុយក្លេអ៊ែរFukushima-Daiichiមានប្រមាណជា១០%នៃបរិមាណសារធាតុវិទ្យុសកម្មដែលចេញពីមណ្ឌលនុយក្លេអ៊ែរនៅឈែរណូប៊ីលនៅឆ្នាំ១៩៨៦។ ក៏ប៉ុន្តែនៅទីបំផុត បរិមាណនៃសារធាតុវិទ្យុសកម្មដែលលេចចេញពីមជ្ឈមណ្ឌលនុយក្លេអ៊ែរFukushima-Daiichiមានច្រើនជាងកាលនៅឈែរណូប៊ីល ដោយហេតុតែការលេចចេញនូវសារធាតុវិទ្យុសកម្មពីFukushima-Daiichiចេះតែមានពុំឈប់ឈរ ទោះបីជាបរិមាណនៃសារធាតុវិទ្យុសកម្មនោះបានធ្លាក់ចុះបន្តិចវិញក្តីនារយៈកាលបីសប្តាហ៍ចុងក្រោយនេះ។
ដោយមានការប្រុងប្រយ័ត្ន រដ្ឋាភិបាលជប៉ុនបានធ្វើការជម្លៀសប្រជាជនប្រមាណ៨០ ០០០នាក់ចេញពីតំបន់មជ្ឈមណ្ឌលនុយក្លេអ៊ែរFukushimaក្នុងរង្វង់២០គ,ម ។ តំបន់នេះជាតំបន់កសិកម្ម ហើយគេពុំអាចរស់នៅទីនេះបានទៀតឡើយក្នុងរយៈពេលមួយដ៏វែង ដោយហេតុតែមានបញ្ហាវិទ្យុសកម្មដូចនៅឈែរណូប៊ីលដែលតម្រូវឲ្យគេចាកចេញពីតំបន់មជ្ឈមណ្ឌលនុយក្លេអ៊ែរក្នុងរង្វង់៣០គ,ម,អស់រយៈពេល២៥ឆ្នាំទៅហើយ។
ចំណែកឯអ្នកឯកទេសជប៉ុនម្នាក់នៃមហាវិទ្យាល័យអូសាកា លោកKenji Sumita បានធ្វើការគូសបញ្ជាក់ថា ការដំឡើងដល់កម្រិត៧ដែលជាកម្រិតអតិបរមាគ្រោះមហន្តរាយនុយក្លេអ៊ែរហ្វ៊ូគូស្ហ៊ីម៉ាដូចនៅឈែរណូប៊ីលអាចមានផលវិបាកការទូត ដោយទាំងនេះបានន័យថា “គ្រោះមហន្តរាយនុយក្លេអ៊ែរនៅហ្វ៊ូគូស្ហ៊ីម៉ាអាចបង្កឲ្យមានបញ្ហាដល់ប្រជាជននៃប្រទេសជិតខាង”។ រីឯប្រទេសចិននិងប្រទេសកូរ៉េខាងត្បូងបាននាំគ្នាធ្វើការតវ៉ាជាស្រេចប្រឆាំងនឹងប្រទេសជប៉ុនក្នុងការចាក់បង្ហូរទឹកប្រកបដោយសារធាតុពិសពុលនៃវិទ្យុសកម្មទៅក្នុងមហាសាគរប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ