សកម្មភាពគាំទ្រនៃក្រុមប្រទេសG7ជួយជំរុញទីផ្សារភាគហ៊ុនអាស៊ី
ទីផ្សារភាគហ៊ុននៅអាស៊ី ជាពិសេសនៅទីក្រុងតូក្យូបានស្គាល់ការកើនស្ទុះដ៏គួរឲ្យកត់ សម្គាល់នៅថ្ងៃសុក្រទី១៨មីនានេះ ក្រោយពីក្រុមប្រទេសG7បានមានសកម្មភាពរួមគ្នាដើម្បីធ្វើការប្រយុទ្ធ ទប់ទល់នឹងការស្ទុះកើនឡើងថ្លៃខ្លាំងនៃប្រាក់យេនជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
មួយថ្ងៃក្រោយពីមានការធ្លាក់ស្រុតចុះបន្តិចបន្តួចនៅថ្ងៃព្រហស្បតិ៍ម្សិលមិញ ហើយនិងក្រោយពីមានការធ្លាក់ដួលដាំដូងយ៉ាងខ្លាំងកាលពីថ្ងៃចន្ទនិងថ្ងៃអង្គារកន្លងទៅដែលបានបណ្តាលឲ្យទីផ្សារភាគហ៊ុននៅទីក្រុងតូក្យូបានស្គាល់ការបាត់បង់អស់ប្រមាណ១៦%។ ទីផ្សារភាគហ៊ុនជប៉ុននៅថ្ងៃសុក្រនេះបានស្ទុះកើនឡើងវិញប្រមាណ២,៧២% ក្រោយពីមានការប្រកាសឲ្យដឹងថា ក្រុមប្រទេសឧស្សាហកម្មធំៗG7នឹងធ្វើអន្តរាគមន៍នៅលើទីផ្សារដើម្បីជួយខាឃាំងកុំឲ្យប្រាក់យេនជប៉ុនឡើងថ្លៃ។
អន្តរាគមន៍របស់ក្រុមប្រទេសឧស្សាហកម្មធំៗG7ដើម្បីជួយខ្ទប់ស្កាត់កុំឲ្យប្រាក់យេនជប៉ុនឡើងថ្លៃខ្ពស់នេះ បានធ្វើឲ្យប្រាក់យេនកើនឡើងលើសពី៨០យេនក្នុង១ដុល្លារនៅទីក្រុងតូក្យូ ក្រោយពីបានឡើងដល់ឯតទគ្គកម្ម៧៦,៥២យេនក្នុង១ដុល្លារ។
ការឡើងថ្លៃខ្លាំងនៃប្រាក់យេនបែបនេះ គឺពិតជាឧបសគ្គមកខាឃាំងពុំឲ្យសហគ្រាសជប៉ុនអាចមានសកម្មភាពលូតលាស់ទៅរួច។ ហើយជាពិសេស ក្នុងខណៈពេលដែលសកម្មភាពឧស្សាហកម្មជប៉ុនកំពុងតែធ្លាក់ស្រុតចុះដោយហេតុតែទទួលរងគ្រោះមហន្តរាយធម្មជាតិនៃថ្ងៃទី១១មីនា។
គួរកត់សម្គាល់ថា នៅថ្ងៃសុក្រទី១៨មីនានេះ ទីផ្សារភាគហ៊ុននៃប្រទេសអាស៊ីឯទៀតៗបានស្ទុះកើនឡើងតាមទីផ្សារភាគហ៊ុននៅទីក្រុងតូក្យូ។ នៅរសៀលថ្ងៃសុក្រនេះ ទីផ្សារភាគហ៊ុននៃទីក្រុងហុងកុងបានកើនឡើងប្រមាណ០,៥៤% ទីផ្សារភាគហ៊ុននៃទីក្រុងសៀងហៃបានកើនឡើងប្រមាណ០,៦១%។ ទីផ្សារភាគហ៊ុននៃទីក្រុងសេអ៊ូលបានកើនឡើងប្រមាណ១,១៣%។ នៅតៃវ៉ាន់កើនឡើង១,៣៥%.....។ល។......
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ