ជប៉ុន៖ ដល់ពេលគ្រោះមហន្តរាយមនុស្សធម៌ម្តង
ស្ថានភាពមនុស្សធម៌កាន់តែធ្ងន់ធ្ងរដុនដាបខ្លាំងឡើងជាលំដាប់ សម្រាប់អ្នកដែលនៅរស់រានមានជីវិត ពីព្រោះក្រៅពីប្រឈមមុខនឹងការខ្វះខាតសព្វបែបយ៉ាង ពួកគេកំពុងទទួលរងធាតុអាកាសត្រជាក់ខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
៦ថ្ងៃក្រោយគ្រោះរញ្ជួយដីនិងគ្រោះស៊ូណាមី ទឹករលកនៅតែបន្តខ្ជាក់ចោលលើឆ្នេរសមុទ្រសាកសពជាច្រើនសិបនាក់។ អ្នកដែលនៅរស់រានមានជីវិត ប្រមូលផ្តុំគ្នាជ្រកនៅទីនេះនិងទីនោះ ខ្វះទឹកស្អាត ខ្វះស្បៀងអាហារនិងថ្នាំពេទ្យ។
មិនតែប៉ុណ្ណោះ តាំងពីម្សិលមិញមក ធាតុអាកាសត្រជាក់ខ្លាំង រហូតដល់បណ្តាលឲ្យធ្លាក់ទឹកកកសំឡី នៅIwate Miyagi និងFukushima ជាហេតុធ្វើឲ្យក្រុមអ្នកសង្គ្រោះពិបាកនឹងធ្វើការ ធ្វើឲ្យជីវភាពរបស់អ្នកដែលរួចពីការស្លាប់ជាច្រើនម៉ឺននាក់ ដុនដាបវេទនាខ្លាំងឡើងជាលំដាប់។
ចំពោះរដ្ឋាភិបាលជប៉ុន ចំនួនអ្នកស្លាប់ដែលគេរកឃើញសាកសពកើនទៅដល់យ៉ាងតិច១ម៉ឺននាក់ រីឯអ្នកបាត់ខ្លួនវិញមានចំនួនយ៉ាងតិច៣ម៉ឺននាក់ នេះបើយោងទៅតាមទីភ្នាក់ងារព័ត៌មានជប៉ុនKyodo។
ផ្លូវថ្នល់ ផ្លូវដែក កំពង់ផែ ស្ពាន និងបង្គោលភ្លើង សុទ្ធតែត្រូវបាក់បែកខ្ទេចខ្ទី ជាហេតុធ្វើឲ្យពិបាកទាក់ទងគ្នា ធ្វើឲ្យប្រតិបត្តិការជួយសង្គ្រោះពិបាកប្រព្រឹត្តទៅបាន។ រដ្ឋាភិបាលបានកេណ្ឌទាហាន១០ម៉ឺននាក់ រីឯកាកបាទក្រហមជប៉ុនបានកេណ្ឌមនុស្សជាច្រើនរយនាក់ ដើម្បីជួយផ្គត់ផ្គង់តម្រូវការរបស់បណ្តាជន៤៣ម៉ឺននាក់ នៅតាមក្រុងនិងស្រុកជាប់ឆ្នេរសមុទ្រ។ ក្រុមអ្នកជួយសង្គ្រោះបរទេសបានមកដល់បណ្តើរៗហើយ តែបោះទីតាំងនៅឆ្ងាយ មិនសូវហ៊ានចូលទៅដល់ទីកន្លែងកើតហេតុ ដ្បិតខ្លាចធាតុវិទ្យុសកម្ម។
នាប៉ុន្មានថ្ងៃខាងមុខ ទឹកកកសំឡីលាយនិងទឹកភ្លៀងអាចធ្លាក់ខ្លាំងជាងខណៈនេះ រីឯក្តីសង្ឃឹមក្នុងការរកឃើញអ្នកដែលនៅរស់ រលាយបាត់ម្តងបន្តិចៗ ពីមួយម៉ោងទៅមួយម៉ោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ