រដ្ឋមន្ត្រីទទួលបន្ទុកកិច្ចការសាសនារបស់ជនជាតិភាគតិចត្រូវគេធ្វើឃាត
ជនមិនស្គាល់មុខមួយក្រុម បានបាញ់សម្លាប់លោកShahbaz Bhatti រដ្ឋមន្ត្រីប៉ាគីស្ថានទទួលបន្ទុកកិច្ចការសាសនារបស់ជនជាតិភាគតិច នៅទីក្រុងអ៊ីស្លាម៉ាបាដ ក្នុងព្រឹកថ្ងៃពុធទី២មីនានេះ។ ឃាតកម្មនេះ អាចទាក់ទិនទៅនឹងជំហរនយោបាយរបស់រដ្ឋមន្ត្រីរូបនេះ ពីព្រោះលោកបានចេញមុខទាមទារឈប់ឲ្យអនុវត្តទោសប្រហារជីវិតទៅលើ អ្នកជេប្រមាថសាសនាអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
បុរសពីរនាក់ជិះម៉ូតូ ជាអ្នកបានបាញ់រះទៅលើរថយន្តរបស់លោក Shahbaz Bhatti នៅកណ្តាលរដ្ឋធានីអ៊ីស្លាម៉ាបាដ។ លោករដ្ឋមន្ត្រីបានស្លាប់នៅពេលដែលគេដឹកលោកទៅដល់មន្ទីពេទ្យ។
លោកShahbaz Bhatti ដែលជាអ្នកកាន់គ្រិស្តសាសនា បានក្លាយជាផ្ទាំងស៊ីបរបស់ពួកអ៊ីស្លាមជ្រុលនិយម តាំងពីលោកបានចេញមុខគាំទ្រការធ្វើវិសោធនកម្មទៅលើច្បាប់មួយប្រកបទៅដោយសង្គ្រាមប៉ាកកា។ ច្បាប់នោះតម្រូវឲ្យកាត់ទោសប្រហារជីវិតជនណាដែលហ៊ានជេរប្រមាថសាសនាអ៊ីស្លាម។ រយៈពេលចុងក្រោយនេះ លោកShahbaz Bhatti បានទទួលការគំរាមគំហែងជាញឹកញយដ្បិតលោកបានប្រកាសជម្រុញឲ្យកែប្រែច្បាប់នេះ។
កាលពីថ្ងៃទី៤កក្កដាកន្លងទៅនេះ អភិបាលខេត្តPenjab ត្រូវបានគេធ្វើឃាត ពីព្រោះគាត់បានចេញមុខការពារស្ត្រីអ្នកកាន់គ្រិស្តសាសនាម្នាក់ ដែលត្រូវពួកអ្នកភូមិចោទថា បានជេប្រមាថព្យាការីសាសនាអ៊ីស្លាមMahomet។
ប៉ុន្មានខែចុងក្រោយនេះ បាតុកម្មជាច្រើនបានកើតឡើងជាបន្តបន្ទាប់នៅក្នុងប្រទេស ប៉ាគីស្ថាន។ ពួកបាតុករសុទ្ធសឹងជាអ្នកដែលប្រឆាំងមិនឲ្យធ្វើវិសោធនកម្មទៅលើច្បាប់ស្តីពីការជេប្រមាថសាសនាអ៊ីស្លាមនេះ។ រដ្ឋាភិបាលដែលឋិតនៅក្រោមគំនាបរបស់មហាជនថែមទាំងបានធានាអះអាងថានឹងពុំមានទៅកើតទេការកែប្រែច្បាប់មួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ