រដ្ឋាភិបាលភូមាតឹងរ៉ឹងខ្លាំងជាមួយសារព័ត៌មាន
រដ្ឋាភិបាលស៊ីវិលថ្មី នៅភូមា នៅតែបង្ហាញជំហរដ៏តឹងរឹងបំផុតជាមួយសារព័ត៌មាន។អ្នកកាសែតភូមាម្នាក់ដែលធ្វើការឲ្យបណ្តាញទូរទស្សន៍មួយនៅក្នុងប្រទេស Norvège ត្រូវបានអាជ្ញាធរភូមា ផ្តន្ទាទោសឲ្យជាប់ឃុំឃាំងក្នុងពន្ធនាគារចំនួន ១៣ឆ្នាំ។ ស្របគ្នានេះដែរ ជនជាតិអូស្រ្តាលីម្នាក់ទៀតដែលជានាយកទស្សនាវដ្តីសេដ្ឋកិច្ចប្រចាំសប្តាហ៍តាំងពី១១ឆ្នាំមកហើយនៅទីក្រុង Rangoon ក៏ត្រូវបានចាប់ខ្លួនដែរនៅអាកាសយានដ្ឋានRangoon នាពេលដែលគាត់វិលត្រឡប់មកពីប្រទេសថៃវិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
ពុំមានអ្នកណាមួយនឹកសង្ឃឹមទាល់តែសោះថា រដ្ឋាភិបាលស៊ីវិលថ្មីនៃប្រទេសភូមាដែលមានសមាជិកភាគច្រើនសុទ្ធតែជាអតីតពួកយោធានោះ ផ្លាស់ប្តូរគំនិតយ៉ាងរហ័សងាកមកមនោគមវិជ្ជាប្រជាធិបតេយ្យនោះឡើយ។ ការវាយសំពងនារយៈពេលចុងក្រោយនេះប្រឆាំងទៅលើអ្នកកាសែត គឺជាការបញ្ជាក់មួយដ៏គួរឲ្យព្រួយបារម្ភចំពោះការដែលនាយករដ្ឋមន្ត្រីថ្មីភូមាThein Seinនៅតែបន្តមាគ៌ានយោបាយផ្តាច់ការនៃរបបសឹកដដែល។
អ្នកកាសែត ភូមា ឈ្មោះ Maung Maung Zeya បានធ្វើការដោយសម្ងាត់សំរាប់ទូរទស្សន៍សំឡេងប្រជាធិបតេយ្យរបស់ ភូមា Democratic Voice of Burma ដែលមានមូលដ្នាននៅទីក្រុង Oslo ប្រទេស Norvège ។
អ្នកកាសែតភូមានេះ ត្រូវបានអាជ្ញាធរភូមាផ្តន្ទាទោសដាក់ពន្ធនាគារចំនួន១៣ឆ្នាំ ពីបទបានថតរូបភាពបន្ទាប់ពីមានការផ្ទុះមួយនៅឱកាសបុណ្យចូលឆ្នាំថ្មីភូមាកាលពីខែមេសាឆ្នាំមុន។ លោក Maung Maung Zeya គឺជា អ្នកកាសែតមួយរូបក្នុងចំណោមអ្នកកាសែតទាំង១៣នាក់ដែលកំពុងជាប់ឃុំឃាំងក្នុងពន្ធនាគារភូមានាបច្ចុប្បន្ននេះ។
ចំណែក ករណីនៃជនជាតិអូស្ត្រាលី លោក Ross Dunkleyវិញ ធ្វើឲ្យគេភ្ញាក់ផ្អើលនិងគួរឲ្យឆ្ងល់ខ្លាំង ពីព្រោះ អ្នកកាសែតរូបនេះ បានបង្កើតទស្សនាវដ្តីសេដ្ឋកិច្ចប្រចាំសប្តាហ៍របស់ខ្លួន ឈ្មោះ Myanmar Timesតាំងពីឆ្នាំ២០០០មកម៉្លេះ -ទស្សនាវដ្តីដែលមានគោលដៅជួយលើកមុខមាត់នៃរបបសឹកភូមានៅចំពោះមុខសហគមន៍អន្តរជាតិ។
លោក Ross Dunkley ប្រហែលជាអាចត្រូវចាប់ខ្លួនដោយសារតែមានជម្លោះផ្ទៃក្នុងនៃកាសែតរបស់គាត់។ ក៏ប៉ុន្តែ ទោះជាក្នុងហេតុផលណាក៏ដោយក្តី ការចាប់ខ្លួនអ្នកកាសែតជាតិអូស្ត្រាលីនេះ និង ការផ្តន្ទាទោសលើ អ្នកកាសែតភូមា Maung Maung Zeya ជាសញ្ញាច្បាស់មួយបញ្ជាក់ឲ្យដឹងថា រដ្ឋាភិបាលស៊ីវិលភូមាថ្មីនេះ ពិតជានឹងមិនបណ្តែត បណ្តោយឲ្យអ្នកកាសែតធ្វើអ្វីៗតាមអំពើចិត្តនោះទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ