លោកនាយករដ្ឋមន្ត្រី ថេន សេន ត្រូវបានតែងតែងជាប្រធានាធិបតី
លោកអតីតឧត្តមសេនីយ ថេន សេន ដែលបច្ចុប្បន្នជានាយករដ្ឋមន្រ្តីភូមា ទើបបានសភាបោះឆ្នោតឲ្យទទួលតំណែងប្រធានាធិបតី។ តាមរយៈការតែងតំាងលោក ថេន សេន ឲ្យទទួលមុខតំណែងដ៏កំពូលមួយនេះ នឹងអនុញ្ញាតឲ្យភូមាផ្ទេរអំណាចពីរបបសឹកដឹកនំាដោយលោកឧត្តមសេនីយ ថាន់ ស្វេ ទៅរករបបស៊ីវិលមួយ ដែលអំណាចបន្តស្ថិតក្នុងកណ្តាប់ដៃយោធាដដែល។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គួច គន្ធារ៉ា
ពិតជាមិនមានអ្វី គួរឲ្យភ្ញាក់ផ្អើលឡើយ។ ការតែងតំាងលោកនាយករដ្ឋមន្រ្តី ថេន សេន ឲ្យកាន់តំណែងប្រធានាធិបតីនាពេលនេះ គឺជាសេណារីយ៉ូមួយដែលត្រូវបានប្រកាសឲ្យដឹងអស់ជាច្រើនថ្ងៃមកហើយ។ មានអាយុ ៦៥ឆ្នំា លោក ថេន សេន មិនមែនជាឥស្សរជននយោបាយថ្មីថ្មោងទេ តែជាអតីតឧត្តមសេនីយជើងចាស់ម្នាក់។ ក្រៅពីការតែងតំាងលោក ថេន សេន ឲ្យធ្វើជាប្រធានាធិបតី សភាថ្មីភូមាក៏បានតែងតំាងអនុប្រធានាធិបតីចំនួនពីររូប គឺលោក Tin Aung Myint Oo និងលោក Sai Mouk។ អនុប្រធានាធិបតីទំាងពីររូបនេះក៏ជាឥស្សរជននយោបាយដែលធ្លាប់មានឈ្មោះ ពិសេសគឺលោក Tin Aung Myint Oo ដែលជាអតីតឧត្តមសេនីយ។
ជារួមទៅ ទំាងរូបប្រធានាធិបតី និងរូបអនុប្រធានាធិបតី សុទ្ធសឹងជាឥស្សរជនដែលចេញមកពីប្រភពយោធាដូចគ្នា និយាយឲ្យស្រួលយល់ សុទ្ធសឹងជាមនុស្សជំនិតរបស់មនុស្សខ្លំាងភូមា គឺលោកឧត្តមសេនីយ ថាន់ ស្វេ។ គេពិតជានៅចំាមិនភ្លេចទេថា គឺរូបលោក ថេន សេន ជាអ្នកដែលបានរៀបចំ តាក់តែងច្បាប់រដ្ឋធម្មនុញ្ញក្នុងឆ្នំា ២០០៨ និងជាអ្នកដែលបានរៀបចំផែនទីចង្អុលផ្លូវមួយដែលមាន ៧ដំណាក់កាល ក្នុងការនំាប្រទេសភូមាឆ្ពោះទៅកាន់របបប្រជាធិបតេយ្យមានវិន័យ។
ឥឡូវនេះ ផែនទីចង្អុលផ្លូវទំាង ៧ដំណាក់កាលបានអនុវត្តចប់សព្វគ្រប់អស់ហើយ មានន័យថា ជាពេលវេលាដែលភូមាផ្តើមធ្វើកំណែទម្រង់ប្រទេសឆ្ពោះទៅកាន់របបប្រជាធិបតេយ្យមានវិន័យ។ តែនៅលើកនេះ អំណាចបានស្ថិតក្នុងដៃលោកប្រធានាធិបតី និងនាយករដ្ឋមន្រ្តី ថេន សេន គឺមិនមែនស្ថិតក្នុងដៃមនុស្សខ្លំាង លោកឧត្តមសេនីយថាន់ ស្វេដូចមុនទៀតទេ នេះបើតាមទ្រឹស្តី។
តើនៅពេលនេះ លោកឧត្តមសេនីយ ថាន់ ស្វេបាត់មុខទៅណាហើយ ឬក៏ថា តើគាត់មានតំណែងអ្វីថ្មី ?
អ្វីដែលជាក់ច្បាស់ តំាងពីក្រោយការបោះឆ្នោតមក ឈ្មោះលោកឧត្តមសេនីយ ថាន់ ស្វេ មិនសូវបានគេឮញឹកញាប់ទេ។ បើយោងតាមប្រភពព័តមាននៅភូមាឲ្យដឹងថា លោកឧត្តមសេនីយ ថាន់ ស្វេដែលបច្ចុប្បន្នមានអាយុ ៧៧ឆ្នំា អាចនឹងចូលនិវត្ត។ ប៉ុន្តែបើយោងតាមក្រុមអ្នកវិភាគនយោបាយ លោក ថាន់ ស្វេអាចនឹងរក្សាតំណែងមួយបន្ទាប់បន្សំ ដើម្បីចៀសវាងការសងសឹក ដើម្បីធានាសន្តិសុខលើរូបលោក និងធានាសន្តិសុខដល់ក្រុមបក្សពួករបស់លោក។
យ៉ាងណាក៏ដោយ លោកស្រីប្រមុខបក្សប្រឆំាង អ៊ុង សានស៊ូជីបានបញ្ជាក់រួចហើយថា លោកស្រីមិនបានរង់ចំាកំណែទម្រង់ណាមួយពីរដ្ឋាភិបាលថ្មីទេ។ ប៉ុន្តែក្រុមអ្នកសង្កេតការណ៍បានអះអាងថា ការផ្លាស់ប្តូរជារឿងមួយចៀសមិនរួច នៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ