ពលរដ្ឋចិនមិនអាចតាមដានព័ត៌មានទាក់ទងនឹងព្រឹត្តការណ៍បះបោរនៅក្នុងប្រទេសអេហ្ស៊ីព្ទលើគេហទំព័រ
រដ្ឋាភិបាលអេហ្ស៊ីប ទើបបានបិទប្រព័ន្ធអិនធ័រណេតជាបណ្តោះអាសន្នចាប់តាំងពីថ្ងៃសុក្រទី២៨មករានៅទូទាំងប្រទេស ។ គោលដៅគឺដើម្បីរារាំងកុំឲ្យពួកអ្នកប្រឆាំងនឹងរដ្ឋអំណាចអេហ្ស៊ីប អាចចូលប្រើប្រាស់ប្រព័ន្ធអិនធ័រណេត បានក្នុងការរៀបចំចាត់ចែងចលនាប្រឆាំងរបស់ខ្លួន។ ចលនាប្រឆាំងរបស់ប្រជាជនអេហ្ស៊ីបតាមរយៈប្រព័ន្ធអិនធ័រណេតនេះ បានធ្វើឲ្យប្រទេសដទៃទៀតមានការភិតភ័យខ្លាំងដូចជាប្រទេសចិនជាដើម។ ប្រទេសចិនដែលទើបនឹងបិទខ្ទប់ពាក្យ អេហ្ស៊ីប នៅតាមគេហទំព័រសំខាន់ៗរបស់ខ្លួន ដើម្បីកុំឲ្យប្រជាជនចិន មានលទ្ធភាពដឹងព័តមានស្តីពី ស្ថានការណ៍នានាដែលកំពុងវិវឌ្ឍទៅនៅប្រទេសអេហ្ស៊ីបនាបច្ចុប្បន្ននេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
“យោងតាមច្បាប់ជាធរមាន ការស្វែងរករបស់លោកអ្នកពុំអាចឲ្យផលអ្វីទេ”។
ពាក្យមួយឃ្លានេះ ដែល គេមើលឃើញ នៅលើ ផ្ទាំងកញ្ចក់ computer ខណៈដែលអ្នកប្រើប្រាស់អិនធ័រណែតនៅក្នុងប្រទេសចិន បានស្វែងរកពាក្យ”អេហ្ស៊ីប” នៅលើគេហទំព័រ Sina.com ដែលមានអ្នកប្រើប្រាស់ចំនួន ៥ លាននាក់។
បន្ទាប់ពីគេហទំព័រ Twitter ត្រូវបានអាជ្ញាធរចិនបិទខ្ទប់មក គេហទំព័រដទៃទៀត បានបន្តសកម្មភាពរបស់ខ្លួន និងអនុញ្ញាតឲ្យអ្នកប្រើប្រាស់អិនធ័រណេត អាច ផ្តល់យោបល់របស់ខ្លួន នៅលើគ្រប់ប្រធានបទទាំងអស់ តាមរយៈសារនានាដែលចេញជាបន្តបន្ទាប់គ្នា។
យ៉ាងណាមិញ រាល់ប្រធានបទ ណា ដែល ឧទាហរណ៍ជាប់ពាក់ព័ន្ធ ទៅ នឹង ជ័យលាភីរង្វាន់ណូបែលសន្តិភាពផ្តល់ឲ្យអ្នកប្រឆាំងនឹងរដ្ឋអំណាចចិនឈ្មោះ Liu Xiaobo ឬក៏ ទាក់ទងនឹងការទាមទារលទ្ធិប្រជាធិបតេយ្យ ដូចជានៅប្រទេសអេហ្ស៊ីបជាដើមនោះ សេចក្តីអត្ថាធិប្បាយនានា ត្រូវបានគេ លុបចោលអស់តែក្នុងរយៈពេលប៉ុន្មាននាទីប៉ុណ្ណោះ។
គណបក្សកុម្មុយនិស្តកាន់អំណាចនៅក្នុងប្រទេស មានបំណងរារាំងមិនឲ្យអ្នកប្រឆាំងនឹងរដ្ឋអំណាចចិនធ្វើត្រាប់តាមការងើបបះបោរនយោបាយនៅឯបរទេសនោះទេ។
ចំណែកឯ មធ្យោបាយឃោសនាមហាជនចិនវិញ ដែលត្រូវបានអាជ្ញាធរចិនត្រួតពិនិត្យមើលយ៉ាងខ្លាំងបំផុតនោះ បានផ្សាយបន្ត នូវរូបភាពនៃបាតុកម្មតែបន្តិចបន្តួចប៉ុណ្ណោះ។ នៅលើគេហទំព័ររបស់គេវិញ សារព័ត៌មានចិន ពុំហ៊ានជូនដំណឹងអ្វីច្រើនទេ គ្រាន់តែ ដាក់ចំណងជើង ស្តីពី ការសន្យានានាដែលប្រកាសដោយលោកប្រធានាធិបតីអេហ្ស៊ីប Hosni Moubarak តែប៉ុណ្ណោះ។
ជាផ្លូវការ ទីក្រុងប៉េកាំង រំពឹងទុកថា ប្រទេស អេហ្ស៊ីប នឹងអាចក្តោបក្តាប់ស្ថិរភាពក្នុងសង្គមនិងសណ្តាប់ធ្នាប់សាធារណៈបាននៅប្រទេសអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ