ជំនួបសន្ទនា មិនធ្លាប់មានរវាងនាយករដ្ឋមន្រ្តីចិននិងអ្នកប្តឹងតវ៉ាទៅកាន់អាជ្ញាធរ
លោកនាយករដ្ឋមន្ត្រីចិន Wen Jiabao បានជួបសន្ទនាជាមួយពលរដ្ឋចិនកាលពីថ្ងៃចន្ទ២៤មករាដែលមកដាក់ ពាក្យបណ្តឹងតវ៉ាទៅកាន់អាជ្ញាធរ អំពី ការមិនបើកប្រាក់ខែឲ្យ ការបំផ្លាញកំទេចនិងបណ្តេញចេញពីលំនៅឋានរបស់ខ្លួនដោយទាំង បង្ខិតបង្ខំ ក៏ព្រមទាំងការរឹបអូសយកដីធ្លីរបស់ប្រជាជនជាដើម។ ការជួបសន្ទនាជាមួយប្រជាជនដែលមានកំហឹងទាំងនេះ គឺជាកាយវិការមួយមិនធ្លាប់មានឡើយរបស់រដ្ឋាភិបាល និងដែលបញ្ជាក់ឲ្យឃើញផងដែរពី ចេតនារបស់ខ្លួនក្នុងការដោះស្រាយបញ្ហាដើម្បីរម្ងាប់វិបត្តិនៅ ក្នុងសង្គម។ នេះបើយោងតាមសារព័ត៌មានផ្លូវការចិនចុះផ្សាយនៅថ្ងៃពុធទី២៦មករា នេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
ជាដំណើរទស្សនកិច្ចលើកទីមួយរបស់ លោកនាយករដ្ឋមន្ត្រីចិន Wen Jiabao ទៅកាន់ការិយាល័យរដ្ឋមួយដែល ជាកន្លែងចាំទទួលពាក្យបណ្តឹងគ្រប់បែបយ៉ាងពីសំណាក់ពលរដ្ឋចិន ដែល ខឹងសម្បាខ្លាំងដោយសារខ្លួនពុំបានបើកប្រាក់ខែ ការបំផ្លាញកំទេចនិងបណ្តេញចេញពីលំនៅឋានរបស់ខ្លួនដោយបង្ខិតបង្ខំឬការរឹបអូសដីធ្លីពីសំណាក់អាជ្ញាធរជាដើម។
អង្គការការពារសិទ្ធិមនុស្ស ”Human Rights Watch(HRW)” បានចោទប្រកាន់ប្រមុខរដ្ឋាភិបាលចិនថា ដំណើរទស្សនកិច្ចរបស់លោក គ្រាន់តែជាប្រតិបត្តិការជានិមិត្តរូបមួយប៉ុណ្ណោះ នៅខណៈដែល ការដាក់ពាក្យប្តឹងប្តល់របស់ប្រជាជនចិន ជាញឹកញាប់ត្រូវគេរារាំងនៅក្នុងប្រទេសដោយប្រើមធ្យោបាយស្របច្បាប់ឬក៏ខុសច្បាប់។
លោក Web Jiabao ដែលត្រូវបានគេចាត់ទុកថាជាថ្នាក់ដឹកនាំចិនមួយរូប មានការយកចិត្តទុកដាក់ខ្លាំងជាងគេទៅលើបញ្ហាខ្វល់ខ្វាយរបស់ប្រជាជនខ្លួន បានសន្យាថា នឹងជួយដោះស្រាយវិបត្តិ ប្រសិនបើពាក្យបណ្តឹងរបស់អ្នកតវ៉ាទាំងនោះមានលក្ខណៈសមហេតុផល។ លោកនាយករដ្ឋមន្ត្រីចិន បានថ្លែងទៅកាន់ប្រជាជនដែលមកពីខេត្តនានា ប្រាប់ថា ការគ្រប់គ្រងថ្មីរបស់រដ្ឋាភិបាលគឺមានគោលដៅដើម្បីបញ្ចប់ឲ្យអស់ការបំផ្លាញកំទេចលំនៅឋានរបស់ប្រជាជនដោយខុសច្បាប់និងក៏ជួយការពារផងដែរសិទ្ធិរបស់កម្មសិទ្ធិករ។ មិនតែប៉ុណ្ណោះ លោកនាយករដ្ឋមន្ត្រីចិន បានបន្ថែមទៀតថា ដីធ្លី គឺជា ធនធានសំខាន់ ជាអាយុជីវិត របស់ប្រជាកសិករ។
សមាគមការពារសិទ្ធិមនុស្សជាច្រើន នៅក្នុងប្រទេស បានបរិហារជាញឹកញាប់អំពីសកម្មភាពវៀចវេរទុច្ចរិតរបស់អាជ្ញាធរតាមតំបន់នានា ដែលធ្វើការរារាំងមិនឲ្យពលរដ្ឋអាចដាក់ពាក្យបណ្តឹងតវ៉ារបស់ខ្លួន ទៅកាន់រដ្ឋាភិបាលចិន។ យោងតាមប្រភពដដែល នៅទីក្រុងប៉េកាំងនិងនៅតាមទីក្រុងចិនផ្សេងៗទៀត មានវត្តមាននៃ ពន្ធនាគារសម្ងាត់ ជាទីដែលពលរដ្ឋចិន អាចនឹងត្រូវជាប់ឃុំឃាំងក្នុងរយៈពេលជាច្រើនខែ ក៏ព្រមទាំងទទួលរងអំពើហិង្សាវាយដំច្រំធាក់ផ្ទួនៗ គ្នាទៀតផង ដោយគ្មានការអនុវត្តច្បាប់ត្រឹមត្រូវអ្វីបន្តិចឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ