ទំព័រថ្មីនៃទំនាក់ទំនងរុស្ស៊ី-អាហ្វហ្កានីស្តង់
លោកប្រធានាធិបតីអាហ្វហ្កានីស្តង់ហាមីដការហ្សៃនិងលោក ប្រធានាធិបតីរុស្ស៊ីឌ្មីទ្រីម៉េដវេដេវ កាលពីថ្ងៃសុក្រម្សិលមិញបានបើកទំព័រថ្មីនៃទំនាក់ទំនង រុស្ស៊ី-អាហ្វហ្កានីស្តង់ នាឱកាសទស្សនកិច្ចជាផ្លូវការជាលើកទីមួយនៃប្រមុខដឹកនាំ អាហ្វហ្កានីស្តង់នៅប្រទេសរុស្ស៊ី ចាប់តាំងពីកងទ័ពរុស្ស៊ីបានដកខ្លួនចេញពីប្រទេសអាហ្វហ្កានីស្តង់នៅ ឆ្នាំ១៩៨៩មក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
នាឱកាសសន្និសីទកាសែតរួមជាមួយប្រមុខដឹកនាំអាហ្វហ្កានីស្តង់ លោកប្រធានាធិបតីរុស្ស៊ីឌ្មីទ្រីម៉េដវេដេវបានថ្លែងថា “នេះជាទស្សនកិច្ចជាផ្លូវការជាលើកទីមួយហើយរបស់លោកប្រធានាធិបតីអាហ្វហ្កានីស្តង់ហាមីដការហ្សៃនៅប្រទេសរុស្ស៊ី ហើយក៏ជាការបើកទំព័រថ្មីនៃទំនាក់ទំនងរវាងប្រទេសរុស្ស៊ីនិងប្រទេសអាហ្វហ្កានីស្តង់”។
សូមបញ្ជាក់ថា លោកប្រធានាធិបតីអាហ្វហ្កានីស្តង់ហាមីដការហ្សៃធ្លាប់អញ្ជើញទៅប្រទេសរុស្ស៊ីជាច្រើនលើកដែរ ប៉ុន្តែជាការអញ្ជើញទៅក្នុងក្របខ័ណ្ឌនៃជំនួបកំពូលអន្តរជាតិ។
ប្រមុខដឹកនាំអាហ្វហ្កានីស្តង់ក៏បានអញ្ជើញលោកប្រធានាធិបតីរុស្ស៊ីឌ្មីទ្រីម៉េដវេដេវឲ្យទៅបំពេញទស្សនកិច្ចនៅប្រទេសអាហ្វហ្កានីស្តង់។ ហើយលោកឌ្មីទ្រីម៉េដវេដេវបានទទួលយល់ព្រមយ៉ាងរីករាយ។
លោកប្រធានាធិបតីអាហ្វហ្កានីស្តង់ហាមីដការហ្សៃដែលនឹងត្រូវមានជំនួបជាមួយលោកនាយករដ្ឋមន្ត្រីរុស្ស៊ីវ៉្លាឌីមៀរពូទីនយល់ថា ប្រទេសរុស្ស៊ីជាសម្ព័ន្ធមិត្តដ៏ជំនិតរបស់ប្រទេសអាហ្វហ្កានីស្តង់។
គួរកត់សម្គាល់ថា ទស្សនកិច្ចជាផ្លូវការនៃប្រមុខដឹកនាំអាហ្វហ្កានីស្តង់នៅប្រទេសរុស្ស៊ីនេះធ្លាក់ចំពេលដែលទីក្រុងម៉ូស្គូកំពុងចង់ពង្រឹងពង្រីកឥទ្ធិពលរបស់ខ្លួននៅក្នុងតំបន់ ក្រោយពីបានដកទ័ពចេញពីប្រទេសអាហ្វហ្កានីស្តង់នៅក្នុងលក្ខណៈយ៉ាងសែនជូរចត់។ ហើយប្រទេសទាំងពីរក៏កំពុងខិតខំរិះរករឹតចំណងសេដ្ឋកិច្ចផងដែរ។
បន្ថែមពីលើនេះ ប្រមុខដឹកនាំនៃប្រទេសអាហ្វហ្កានីស្តង់និងប្រទេសរុស្ស៊ីក៏បានផងដែរពិភាក្សាពីការសាងផ្ទេរបន្តិចម្តងៗការទទួលខុសត្រូវសន្តិសុខនៅទូទាំងដែនដីអាហ្វហ្កានីស្តង់ពីកងកម្លាំងនៃបក្សសម្ព័ន្ធអូតង់ឲ្យទៅកងកម្លាំងសន្តិសុខអាហ្វហ្កានីស្តង់ចាប់ពីពេលនេះទៅទល់ឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ