តៃវ៉ាន់ធ្វើសមយុទ្ធដ៏សំខាន់ដើម្បីធ្វើឲ្យពលរដ្ឋខ្លួនមានការកក់ក្តៅក្នុងចិត្ត
តៃវ៉ាន់ បានធ្វើសមយុទ្ធរបស់ខ្លួនដោយបាញ់កាំជ្រួចមីស្ស៊ីល នៅថ្ងៃអង្គារទី១៨មករាម្សិលមិញ ជាថ្ងៃទីមួយនៃដំណើរទស្សនកិច្ចរបស់លោកប្រធានាធិបតីចិន ហ៊ូជិនតាវនៅសហរដ្ឋអាមេរិក។ យោងតាមអ្នកវិភាគនយោបាយ សមយុទ្ធនេះ មានគោលដៅដើម្បីធ្វើឲ្យពលរដ្ឋតៃវ៉ាន់ មានការកក់ក្តៅក្នុងចិត្ត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
សមយុទ្ធ ដោយបាញ់កាំជ្រួចមីស្ស៊ីលរបស់តៃវ៉ាន់ នេះ ត្រូវប្រព្រឹត្តទៅនៅមូលដ្ឋានយោធា Chiupeng ប៉ែកខាងត្បូងកោះតៃវ៉ាន់។ គឺជាប្រតិបត្តិការមួយដ៏សំខាន់បំផុតនិងបើកចំហចំពោះសាធារណជន ចាប់តាំងពីលោក Ma Ying-jeou ជាប់ឆ្នោតជាប្រធានាធិបតី តៃវ៉ាន់នៅឆ្នាំ ២០០៨មក។
យោងតាមអ្នកវិភាគនយោបាយ នៃវិជ្ជាស្ថានសិក្សាអាមេរិកនៃសកលវិទ្យាល័យ Tamkang គោលដៅនៃសមយុទ្ធនេះ គឺតៃវ៉ាន់ចង់បង្ហាញពលរដ្ឋខ្លួនឲ្យឃើញសមត្ថភាពយោធារបស់តៃវ៉ាន់ក្នុងកិច្ចការពារប្រទេស។ ពលរដ្ឋតៃវ៉ាន់ដែលកំពុងមានការព្រួយបារម្ភចំពោះព្រឹត្តិការណ៍ពីរយ៉ាងដែលកំពុងវិវឌ្ឍនៅប្រទេសចិន។
ទីមួយ គឺដំណើរទស្សនកិច្ចផ្លូវរដ្ឋចំនួន៤ថ្ងៃរបស់លោកប្រធានាធិបតីចិនហ៊ូជិនតាវនៅសហរដ្ឋអាមេរិក និងទីពីរ ការសម្ពោធឲ្យហោះហើរ ជាលើកដំបូងនៃយន្តហោះទម្លាក់គ្រាប់បែកថ្មីដ៏ទំនើបបំផុត របស់ចិនមួយធុន J-20 ជា យន្តហោះដែលប្រព័ន្ធរ៉ាដាមិនអាចចាប់បាន នៅដើមខែមករានេះ។
ម្យ៉ាងទៀត តៃវ៉ាន់ ក៏ចង់បង្ហាញឲ្យ ទីក្រុងវ៉ាស៊ីនតោនឃើញដែរ នូវ ការប្តេជ្ញាចិត្តរបស់ខ្លួនក្នុងកិច្ចការពារបូរណភាពទឹកដីនិងក៏ចង់បា្រប់ ទីក្រុងប៉េកាំងដែរថា តៃវ៉ាន់ នឹងបន្តការបង្កើនសព្វាវុធរបស់ខ្លួនតទៅមុខទៀត ថ្វីដ្បិតតែភាពតានតឹងនៅក្នុងតំបន់ បានធ្លាក់ចុះធូរស្រាលបន្តិចក៏ដោយក្តី។
ចំណែក លោកប្រធានាធិបតីតៃវ៉ាន់ Ma Ying-jeou បានប្រកាសដែរថា រាល់ការពិសោធសាកល្បងសព្វាវុធនេះ គឺធ្វើឡើងក្នុងគោលដៅសំរាប់តែការពារខ្លួនសុទ្ធសាធនិងក៏គ្មានបំណងបង្កសង្រ្គាមប្រឆាំងនរណាឡើយ។
នៅចំពោះមុខអ្នកកាសែត លោកប្រធានាធិបតីតៃវ៉ាន់ បានថ្លែងទៀតថា លោកពុំទាន់ពេញចិត្តនៅឡើយទេចំពោះការពិសោធសាកល្បងបាញ់កាំជ្រួចមីស្ស៊ីលលើកនេះ ពីព្រោះកាំជ្រួចមីស្ស៊ីល ចំនួនប្រាំដើម ក្នុងចំណោមកាំជ្រួចមីស្ស៉ីលបាញ់ទាំងអស់ចំនួន១៩ដើម នៅពុំទាន់បានសម្រេចដល់គោលដៅនៅឡើយ។ ដូចនេះ តៃវ៉ាន់ត្រូវការត្រួតពិនិត្យមើល ថាតើបរាជ័យនេះបណ្តាលមកពីកំហុសមនុស្ស ឬ មួយក៏មកពីបញ្ហាបច្ចេកទេស។ លើសពីនេះ តៃវ៉ាន់ក៏ត្រូវប្រុងប្រៀបត្រៀមខ្លួន ធ្វើសមយុទ្ធឲ្យបានច្រើនថែមទៀត ដើម្បី ពង្រឹងសមត្ថភាពយោធារបស់តៃវ៉ាន់ នេះជាការថ្លែងបន្ថែមរបស់លោកប្រធានាធិបតីតៃវ៉ាន់ Ma Ying-jeou៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ