ព្យុងយ៉ាង គំរាមធ្វើសង្គ្រាមក្រោយពីលំហាត់សឹកថ្មីរបស់សេអ៊ូល
កូរ៉េខាងត្បូង កាលពីថ្ងៃព្រហស្បតិ៍ម្សិលមិញ បានធ្វើសមយុទ្ធថ្មីដ៏សំខាន់បំផុតប្រចាំឆ្នាំរបស់ខ្លួននៅជិត ព្រំដែនកូរ៉េខាងជើង។ លំហាត់សឹកនេះ ដែលមានរយៈពេលតិចជាងមួយម៉ោងចូលរួមដោយទាហានចំនួនប្រមានជា៨០០នាក់ -រថក្រោះឧត្ថម្ភាគចក្រ និងយន្តហោះចំបាំង។ សមយុទ្ធថ្មីរបស់កូរ៉េខាងត្បូងនេះត្រូវបានទីក្រុងព្យុងយ៉ាង បរិហារថាជាការបង្កហេតុយោធាមួយដ៏ធ្ងន់ធ្ងរនិងគំរាមថាត្រៀមខ្លួន ស្រេចដើម្បីធ្វើសង្គ្រាមនុយក្លេអ៊ែរ បើ មានឱកាសហុចឲ្យ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
ប្រតិបត្តិការលំហាត់សឹករបស់កូរ៉េខាងត្បូងទំាងជើងគោកនិងជើងអាកាស ដ៏សំខាន់ជាងគេបង្អស់នៅក្នុងឆ្នាំនេះ ត្រូវបានប្រព្រឹត្តទៅមួយខែក្រោយពីកងទ័ពកូរ៉េខាងជើង បានបាញ់គ្រាប់កំាភ្លើងធំទៅលើកោះ Yeonpyeong របស់កូរ៉េខាងត្បូង។ គឺជាការវាយប្រហារលើកទីមួយរបស់កូរ៉េខាងជើងទៅលើតំបន់ស៊ីវិល ចាប់តាំងពីសង្គ្រាមនៅ
កូរ៉េបានបិទបញ្ចប់នៅក្នុងឆ្នាំ១៩៥៣។
កូរ៉េខាងត្បូងដែលបានធ្វើសមយុទ្ធកាលពីដើមសប្តាហ៍នៅក្នុងសមុទ្រជប៉ុន បានគូសបញ្ជាក់ថា គឺជាប្រតិបត្តិការសម្រាប់ការពារទឹកដីខ្លួនសុទ្ធសាធ។ ក៏ប៉ុន្តែ ចំពោះទីក្រុងព្យុងយ៉ាង ទង្វើរបស់កូរ៉េខាងត្បូងនេះ គឺជាបង្កហេតុយោធាមួយដ៏ធ្ងន់ធ្ងរ និងក៏ជាការត្រៀមធ្វើសង្គ្រាមឈ្លាមពានមួយ។ នេះជាសេចក្តីប្រកាសរបស់រដ្ឋមន្ត្រីក្រសួងការពារជាតិកូរ៉េខាងជើងលោក គឹម យុង ជុន ដកស្រង់ដោយទីភ្នាក់ងារព័ត៌មានផ្លូវការកូរ៉េខាងជើង KCNA ដែលបញ្ជាក់ទៀតថា កងទ័ពកូរ៉េខាងជើងត្រៀមខ្លួនរួចស្រេច នឹងធ្វើសង្គ្រាមដ៏សាហាវបំផុតមួយដោយប្រើអាវុធនុយក្លេអ៊ែរ តបទៅនឹងចេតនារបស់សត្រូវដែលបានជម្រុញឲ្យស្ថានការណ៍នៅឧទ្វីបកូរ៉េ ឲ្យធ្លាក់ចូលទៅក្នុងជ្រោះនៃសង្គ្រាម។
នៅចំពោះមុខស្ថានការណ៍ដ៏ដុនដាបនេះ ទីក្រុងប៉េកាំង បានសុំឲ្យទីក្រុងព្យុងយ៉ាងកុំទាន់ចាត់វិធានការណ៍អ្វីទាំងអស់រហូតដល់ថ្ងៃទស្សនកិច្ចរបស់លោកប្រធានាធិបតីចិន ហ៊ូជិនតាវនៅសហរដ្ឋអាមរិកនៅថ្ងៃទី ១៩មករាសិន។
លោកប្រធានាធិបតីកូរ៉េខាងត្បូង Lee Myung-Bak -ក្នុងដំណើរទស្សនកិច្ចនៅបន្ទាយទាហានមួយ បានថ្លែងបញ្ជាក់អំពីការបេ្តជ្ញាចិត្តរបស់លោកក្នុងការវាយប្រហារតបកូរ៉េខាងជើង យ៉ាងម៉ឺងម៉ាត់ ក្នុងករណីមានការវាយប្រហារពីកូរ៉េខាងជើងដើម្បីរក្សាសន្តិភាពនៅក្នុងតំបន់ និងរារាំងមិនឲ្យមានការបង្កហេតុដែរ។
នៅសហរដ្ឋអាមេរិកវិញ-ក្រសួងការបរទេស បានដៀលត្មះឧបាយកលនិងការបំប៉ោងវោហាររបស់កូរ៉េខាងជើងដើម្បីយកលេសបញ្ឆេះភ្លើងសង្គ្រាមនៅក្នុងឧបទ្វីបកូរ៉េ និងទាមទារឲ្យទីក្រុងព្យុងយ៉ាងធ្វើសកម្មភាព នានា ដែលប្រកបដោយលក្ខណៈស្ថាបនា។
ម្សិលមិញនេះដែរ សេតវិមានប្រធានាធិបតីអាមេរិក បានព្រមានទីក្រុងព្យុងយ៉ាង ប្រឆាំងទល់នឹងសកម្មភាពហិង្សានានាដោយ បានគូសបញ្ជាក់ដែរថា សមយុទ្ធរបស់កូរ៉េខាងត្បូង គឺមានលក្ខណៈសំរាប់ការពារប្រទេសសុទ្ធសាធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ