តុលាការធម្មនុញ្ញច្រានចោលបណ្តឹងរបស់គណៈកម្មការរៀបចំការបោះឆ្នោតនៅថ្ងៃចន្ទ២៩វិច្ឆិកា២០១០
នៅទីបំផុត អាចចាត់ទុកជាជោគជ័យមួយសម្រាប់ គណបក្សប្រជាធិបតេយ្យរបស់លោកនាយករដ្ឋមន្ត្រី អាភិស៊ីត ព្រោះតុលាការធម្មនុញ្ញថៃ បានចេញសាលក្រមច្រានចោល បណ្តឹងរបស់គណៈកម្មការរៀបចំការបោះឆ្នោតថៃ ថាពុំបានឆ្លើយតបទៅនឹងដំណើរការនីតិវិធី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
តុលាការធម្មនុញ្ញថៃ ទើបបានប្រកាសសេចក្តីសំរេចចិត្តរបស់ខ្លួននាថ្ងៃចន្ទ២៩វិច្ឆិកានេះ ច្រានចោលពាក្យបណ្តឹងរបស់គណៈកម្មការរៀបចំការបោះឆ្នោត ដែលសុំឲ្យគេរំលាយចោលគណបក្ស PD កាន់អំណាចដឹកនាំដោយលោកនាយករដ្ឋមន្ត្រីថៃបច្ចុប្បន្ន ពីបទបានប្រើប្រាស់ប្រាក់ខុសច្បាប់ ហួសការកំរិតសំរាប់ការរៀបចំការបោះឆ្នោតនាឆ្នាំ២០០៥ ក្នុងទឹកប្រាក់ប្រមាណជា ២៩លានបាតស្មើនឹង ៩៦ម៉ឺនដុល្លារ។
ការច្រានចោលរបស់តុលាការធម្មនុញ្ញនេះ គឺដោយសារការដាក់ពាក្យបណ្តឹងមិនស្របទៅតាមកាលបរិច្ឆេទស្របច្បាប់។ ក្នុងន័យនេះដែរ តុលាការធម្មនុញ្ញថៃ មិនធ្វើការពិនិត្យមើលបញ្ហាអ្វីទៀតដែរនៅក្នុងសំណុំរឿងប្តឹងនេះ ដោយយោងទៅលើសេចក្តីសំរេចចិត្តអនុម័តដោយសំឡេងចៅក្រម៤រូបគាំទ្រទល់នឹងសំឡេងប្រឆាំងពីររូប។
សេចក្តីសំរេចចិត្តរបស់តុលាការធម្មនុញ្ញនាថ្ងៃចន្ទនេះ អាចនឹងបង្កឲ្យមានកំហឹងក្រេវក្រោធនៅក្នុងជួរនៃចលនាពួកអាវក្រហមថៃ ពីព្រោះចលនាពួកអាវក្រហមថៃ បានទាមទារជាយូរយារមកហើយឲ្យគេរំលាយចោលគណបក្សដឹកនាំដោយលោកអាភិស៊ីត ដោយបានបរិហារអាក្រាតជាពិសេសថា គឺជាយុត្តិធម៌មួយដែលផ្អៀងទៅម្ខាងៗ។
យោងទៅតាមចលនាពួកអាវក្រហម តុលាការធម្មនុញ្ញ បំរើទាំងស្រុងពួក អ្នកនយោបាយនៃគណបក្សដ៏សំខាន់ នៅទីក្រុងបាងកក ជាអាទិ៍គណបក្សប្រជាធិបតេយ្យ PD របស់លោកនាយករដ្ឋមន្រ្តីអាភិស៊ីត។
គណបក្សប្រជាធិបតេយ្យ PDនេះឯង បានសំរេចឈានឡើងកាន់រដ្ឋអំណាចកាលពី២ឆ្នាំមុន -ក្រោយពីមានសេចក្តីសំរេចចិត្តរបស់តុលាការថៃ ដែលបានធ្វើឲ្យគ្នីគ្នារបស់លោកអតីតនាយករដ្ឋមន្ត្រីថាក់ស៊ីន ខ្ទាតចេញពីអំណាច។
សូមបញ្ជាក់ថា ចលនាពួកអាវក្រហមថៃដែលស្មោះស្ម័គ្រ ចំពោះលោកថាក់ស៊ីន បានធ្វើបាតុកម្ម អស់រយៈពេល ២ខែនៅទីក្រុងបាងកក នាដើមឆ្នាំនេះ ដើម្បីទាមទារ ឲ្យលោកអាភិស៊ីតនាយករដ្ឋមន្ត្រីថៃបច្ចុប្បន្ន លាលែងចេញពីមុខតំណែងរបស់ខ្លួន។ វិបត្តិដ៏ធ្ងន់ធ្ងរបំផុតនេះ ដែលប្រទេសថៃសម័យបច្ចុប្បន្ន ជួបប្រទះជាលើកដំបូង បានបណ្តាលឲ្យមានមនុស្សស្លាប់ ៩១ នាក់និងរបួស ១៩០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ