ឥរិយាបថអាមេរិកនៅចំពោះមុខបញ្ហាកូរ៉េខាងជើង
នៅចំពោះមុខការបាញ់បំផ្លោងគ្រាប់កាំភ្លើងធំរបស់កូរ៉េខាងជើង ទៅលើកោះYeongpyeongដែលឋិតនៅក្នុងដែនសមុទ្ររបស់កូរ៉េខាងត្បូង ហើយដែលបានបណ្តាលឲ្យមានមនុស្សស្លាប់ទាំងអស់៤នាក់ តើលោកប្រធានាធិបតីអាមេរិកបារ៉ាក់អូបាម៉ាគិតដោះស្រាយវិបត្តិកូរ៉េ ទាំងពីរដោយវិធីណា?
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ក្រោយពីមានការវាយប្រហាររបស់កងកម្លាំងយោធាកូរ៉េខាងជើងកាលពីថ្ងៃអង្គារកន្លងទៅដែលបានបាញ់បំផ្លោងគ្រាប់កាំភ្លើងធំជាច្រើនគ្រាប់ទៅលើ កោះYeongpyeongដែលឋិតនៅក្នុងដែនសមុទ្ររបស់កូរ៉េខាងត្បូង ហើយដែលបានបណ្តាលឲ្យមានមនុស្សស្លាប់ទាំងអស់៤នាក់ សំណួរមួយបានលេចឡើងចោទសួរថា តើអាមេរិកគួរចាប់មានកិច្ចចរចាឡើងវិញជាមួយប្រទេសកូរ៉េខាងជើងដែរឬទេ? នៅក្នុងករណីដែលប្រទេសកូរ៉េខាងជើងជាអ្នកឈ្លានពានហើយបន្ថែមពីលើនេះជាអ្នកកំពុងរង់ចាំជំនួយសេដ្ឋកិច្ចពីសហគមន៍អន្តរជាតិផងទៀត។
ឬមួយក៏គេត្រូវធ្វើហាក់ដូចជាឧប្បត្តិហេតុយោធាដែលកើតមាននៅពេលថ្មីៗកន្លងទៅនេះជាបញ្ហាតូចតាច ដែលទាំងនេះអាចនាំឲ្យទីក្រុងផ្យុងយ៉ាងយល់ច្រឡំហើយអាចធ្វើការបាញ់បំផ្លោងមកលើកូរ៉េខាងត្បូងជាថ្មីម្តងទៀត។
ក៏ប៉ុន្តែបើភាគីអាមេរិកាំងនិងកូរ៉េខាងត្បូងដំឡើងសម្លេងនិងធ្វើការដំឡើងសាច់ដុំសំញែងដាក់គ្នា វាអាចនាំឲ្យមានការផ្ទុះអាវុធវាយប្រហារគ្នារវាងប្រទេសកូរ៉េទាំងពីរ។
លោកប្រធានាធិបតីអាមេរិកបារ៉ាក់អូបាម៉ាបានតាមដានស្ថានការណ៍នៅឧបទ្វីបកូរ៉េយ៉ាងជាប់ស្អិត ហើយរដ្ឋបាលអាមេរិកាំងក៏បានពិនិត្យតាមមើលបញ្ហាកូរ៉េទាំងពីរទាំងយប់ទាំងថ្ងៃ។
មកទល់ពេលនេះ គេនៅពុំទាន់ដឹងនៅឡើយថា លោកអូបាម៉ាគិតជ្រើសយកនយោបាយណាមួយនៅឡើយដើម្បីឆ្លើយតបតទៅនឹងទង្វើឈ្លានពានដ៏គឃ្លើនរបស់ទីក្រុងផ្យុងយ៉ាង។
សូមបញ្ជាក់ថា នៅថ្ងៃពុធម្សិលមិញសហរដ្ឋអាមេរិកបានប្រកាសប្រាប់ឲ្យដឹងពីការគាំទ្រប្រទេសកូរ៉េខាងត្បូងយ៉ាងមុតមាំ ហើយកងកម្លាំងយោធាអាមេរិកនិងកូរ៉េខាងត្បូងនឹងត្រូវធ្វើសមយុទ្ធរួមគ្នាពីថ្ងៃអាទិត្យទៅទល់ថ្ងៃពុធខាងមុខនេះ ដោយមានការចូលរួមពីសំណាក់នាវាផ្ទុកយន្តហោះដ៏ទំនើបរបស់សហរដ្ឋអាមេរិកUSS George Washington ផងទៀត។ ទាំងនេះ ដើម្បីបង្ហាញឲ្យឃើញពីការគោរពកិច្ចសន្យារបស់សហរដ្ឋអាមេរិកក្នុងការរក្សាឲ្យមានស្ថិរភាពនៅក្នុងតំបន់ឧបទ្វីបកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ