ភូមាជាប្រទេសតែមួយគត់ដែលនៅបន្តដាក់បង្កប់គ្រាប់មីនក្នុងដី
បន្ទាប់ពីរុស្ស៉ី បានសម្រេចចិត្តឈប់ប្រើគ្រាប់មីនបង្កប់ក្រោមដីមក អង្គការក្រៅរដ្ឋាភិបាលឈ្មោះ”យុទ្ធនាការអន្តរជាតិប្រឆាំងគ្រាប់មីន បានអបអរសាទរនៅក្នុងរបាយការណ៍ប្រចាំឆ្នាំរបស់ខ្លួនដែលចេញផ្សាយ នៅថ្ងៃពុធ ២៤វិច្ឆិកានេះ។ ប៉ុន្តែអង្គការដដែលនេះ បានគូសបញ្ជាក់ថា នៅលើលោកនេះមានតែភូមាមួយគត់ដែលនៅបន្តដាក់បង្កប់គ្រាប់មីនក្នុង ដី។
ចុះផ្សាយនៅថ្ងៃ៖
សេចក្តីរាយការណ៍របស់ នុយ ប៊ែរណាដែត
ភូមាជាប្រទេសតែមួយគត់ក្នុងលោកដែលនៅបន្តដាក់បង្កប់គ្រាប់មីនក្នុងដី។ នេះបើយោងតាមរបាយការប្រចាំឆ្នាំរបស់អង្គការក្រៅរដ្ឋាភិបាលមួយឈ្មោះ “យុទ្ធនាការណ៍អន្តរជាតិប្រឆាំងគ្រាប់មីន(ICBL) ដែលចេញផ្សាយថ្ងៃពុធ២៤វិច្ឆិកា២០១០នេះ ។ ពេលនេះ គឺជាលើកទីមួយដែរ ដែលរុស្ស៊ីលែងមានឈ្មោះជាប្រទេសដែលប្រើប្រាស់យ៉ាងសកម្មគ្រាប់មីន។
សញ្ញាគួរឲ្យលើកទឹកចិត្តមួយទៀត គឺក្នុងបច្ចុប្បន្ននេះ -មានប្រទេសតែ៣គត់ដែលនៅបន្តផលិតគ្រាប់មីនយ៉ាងសកម្មបំផុតគឺ-ឥណ្ឌា ភូមា និង ប៉ាគីស្តង់។ ចំណែក នេប៉ាល់វិញលែងផលិតគ្រាប់មីននេះទៀតហើយ។ ប៉ុន្តែ ក្រុមប្រដាប់អាវុធនៅក្នុងអាហ្វហ្កានិស្តង់ កូឡុមប៊ី ឥណ្ឌា ប៉ាគីស្តង់និងយេម៉ែន នៅតែបន្តដាក់បង្កប់គ្រាប់មីន។ គ្រាប់មីនដែលសម្លាប់ដែលមនុស្ស ៣៩៥៦នាក់ក្នុងឆ្នាំ ២០០៩ គឺមានចំនួន ២៨% តិចជាងក្នុងឆ្នាំ ២០០៨។
ក្នុងពេលនេះ មានប្រទេសចំនួន ១៥៦ ដែលផ្តល់សច្ចាប័នលើអនុសញ្ញាOttawaបង្កើតឡើងក្នុងឆ្នាំ១៩៩៧ស្តីពីគ្រាប់មីន--បន្ទាប់ពីអនុសញ្ញានេះចូលជាធរមាននៅក្នុងឆ្នាំ ១៩៩៩។
អនុសញ្ញា Ottawa នេះ ទាមទារឲ្យធ្វើការដោះគ្រាប់មីន នៅក្នុងតំបន់បង្កប់គ្រាប់មីននៅអំឡុងពេល ១០ឆ្នាំនៅក្នុងតំបន់ក្រោមការត្រួតត្រារបស់រដ្ឋនិមួយៗ និង ធ្វើការកំទេចបំផ្លាញចោលគ្រាប់មីនដែលរដ្ឋស្តុកទុកក្នុងអំឡុងពេល៤ឆ្នាំ។ គ្រាប់មីនចំនួនជាង ៤៣លានគ្រាប់ ត្រូវបានប្រទេសហត្ថលេខីនៃអនុសញ្ញាកំទេចចោល។ មួយវិញទៀត បណ្តារដ្ឋទាំងអស់នៅទ្វីបអាមេរិក បានផ្តល់សច្ចាប័នលើកលែងតែប្រទេសគុយបា និងសហរដ្ឋអាមេរិកតែប៉ុណ្ណោះ។
ក៏ប៉ុន្តែ ទីក្រុង វ៉ាស៊ីនតោន -ជាអ្នកផ្តល់វិភាគទានហិរញ្ញវត្ថុដ៏សំខាន់មួយ ក្នុងចំណោមប្រទេសចំនួន៥ ដែលមាន គណកម្មការអ៊ឺរ៉ុប ជប៉ុន-Norvège និងអាឡឹម៉ង់ ដើម្បីធ្វើសកម្មភាពដោះគ្រាប់មីន នៅក្នុងពិភពលោក។ ប្រទេសអាហ្វហ្កានិស្តង់ គឺជាអ្នកដែលបានទទួលថវិកាដ៏សន្ធឹកសន្ធាប់ជាងគេរហូតដល់ ១០៧លានដុល្លារសំរាប់ប្រតិបត្តិការដោះគ្រាប់មីន។
ម្យ៉ាងទៀត ចាប់ពីថ្ងៃទី ២៩វិច្ឆិការហូតដល់ថ្ងៃទី៣ធ្នូខាងមុខ បណ្តាប្រទសជាសមាជិកនៃអនុសញ្ញា ស្តីពីគ្រាប់មីន នឹងរួមប្រជុំគ្នាជាប្រចាំឆ្នាំ នៅទីក្រុង Genèveនិងច្បាស់ជាស្នើសុំ បន្តធ្វើការដោះគ្រាប់មីននៅក្នុងតំបន់គ្រាប់មីន សំរាប់ប្រទេសកូឡុមប៊ី ដានឹម៉ាកGuinée Bissau Mauritanie Tchad និង Zimbabwé៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ