វេទិកាសេដ្ឋកិច្ច APEC ចង់បានវិធានការជាក់ស្តែងក្នុងការផ្តោះប្តូរពាណិជ្ជកម្មដោយសេរី
២១ប្រទេសជាសមាជិកវេទិកាសេដ្ឋកិច្ចតំបន់អាស៊ី-ប៉ាស៊ីហ្វិកហៅកាត់ថា APEC បានយល់ព្រមព្រៀងគ្នា នៅថ្ងៃចុងក្រោយនៃជំនួបកំពូលនេះ ១៣វិច្ឆិកាម្សិលមិញ ក្នុងការពន្លឿនដំណើរវិវឌ្ឍន៍ឆ្ពោះទៅរកមណ្ឌលផ្តោះប្តូរពាណិជ្ជកម្ម ដោយសេរី។ ក៏ដូចជាក្រុមប្រទេស G-20អ៊ីចឹងដែរ គេបានសន្យាថា នឹងចៀសវាងការប្រកួតប្រជែងគ្នាក្នុងការបញ្ចុះតម្លៃរូបិយវត្ថុរបស់ ខ្លួន។ប៉ុន្តែ សំរាប់ប៉េកាំង កំណើនសេដ្ឋកិច្ចពិភពលោកឡើងវិញ នៅតែមានលក្ខណៈមិនប្រាកដប្រជា។
ចុះផ្សាយនៅថ្ងៃ៖
សេចក្តីរាយការណ៍របស់Frédéric Charles ពីទីក្រុងតូក្យូប្រែសម្រួលដោយវីនស្តុន រតនា
វេទិកាសេដ្ឋកិច្ចតំបន់អាស៊ី-ប៉ាស៊ីហ្វិកហៅកាត់ថា APEC នឹងបង្កើតលំហដ៏ធំធេងមួយនៃការផ្តោះប្តូរពាណិជ្ជកម្មដោយសេរី នៅតំបន់អាស៊ី-ប៉ាស៊ីហ្វិក។ ដោយហេតុតែប្រទេសចិននិយមចូលចិត្តចរចារវាងអាស៊ីដូចគ្នា ជាជាងលំហបែបនេះហើយ ស.រ.អា.ចង់បង្ខំឱ្យទទួលយកភាពជាដៃគូផ្ទាល់របស់ខ្លួន នៅឯនាយមហាសាគរប៉ាស៊ីហ្វិក វេទិកាAPECសំរេចចិត្តផ្អែកទៅលើគម្រោងការនានាក្នុងតំបន់កំពុងមានសព្វថ្ងៃ ប្រកបដោយក្តីសង្ឃឹមថា នៅថ្ងៃណាមួយ ប៉ុន្តែគ្មាននរណាដឹងថា នៅពេលណាទេ គ្មានប្រតិទិនណាមួយត្រូវបានកំណត់ទេ ក្នុងការរំលាយបញ្ចូលគ្នាគម្រោងការទាំងអស់នេះ និងសំរេចឱ្យបានមណ្ឌលមួយដែលគ្មានរបាំងតារាងតម្លៃ។
បន្ទាប់ពីជំនួបកំពូលG-20នៅទីក្រុងសេអ៊ូលមក វេទិកាសេដ្ឋកិច្ចAPEC នៅទីក្រុងជប៉ុនយ៉ូកូហាម៉ា អំពាវនាវឱ្យមានកំណើនសេដ្ឋកិច្ចប្រកបដោយសមតា នៅក្នុងតំបន់ប្រកបដោយអភិវឌ្ឍន៍សេដ្ឋកិច្ចខ្លាំង។ ជាក់ស្តែង គេត្រូវបាញ់សំដៅឱ្យបានតិចជាងមុនទៅរកការនាំចេញនិងតមខ្លួនកុំប្រកួតប្រជែងគ្នាក្នុងការបញ្ចុះតម្លៃរូបិយវត្ថុរបស់ខ្លួន។
លោកប្រធានាធិបតីចិន Hu Jintaoថ្លែងថា ប្រទេសចិននឹងផ្តល់លក្ខណៈសេរីនិយមជាលំដាប់លំដោយឱ្យដល់អត្រាប្តូរប្រាក់របស់ខ្លួន។ គាត់ពោលបន្ថែមទៀតថា កំណើនសេដ្ឋកិច្ចពិភពលោកឡើងវិញ នៅតែមានលក្ខណៈមិនប្រាកដប្រជា ហើយរដ្ឋនានាបានចុះញ៉មរួចស្រេចទៅហើយ នៅចំពោះមុខនយោបាយការពារផលប្រយោជន៍សេដ្ឋកិច្ចជាតិផ្ទាល់។ គាត់រំលឹកប្រាប់ថា កម្លាំងថាមពលនៃកំណើនសេដ្ឋកិច្ចចិនបានជួយជ្រោមជ្រែងក្នុងការទ្រទ្រង់មិនឱ្យលិចលង់សេដ្ឋកិច្ចពិភពលោក ក្នុងអំឡុងពេលមានវិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ