ពន្លឺនៃការដោះលែងលោកស្រី អ៊ុងសាន ស៊ូជីលេចចេញកាន់តែច្បាស់
លោកស្រីអ៊ុងសាន ស៊ូជី មេដឹកនាំបក្សប្រឆាំងដ៏មានប្រជាប្រិយភាពរបស់ប្រជាជនភូមា នឹងត្រូវដោះលែងឲ្យមានសេរីភាព នៅថ្ងៃសៅរ៍ស្អែកនេះ។ តាមប្រភពមិនផ្លូវការពីអាជ្ញាធរភូមា ឯកសារស្តីពីការដោះលែងម្ចាស់ជ័យលាភីណូបែលសន្តិភាព ត្រូវបានចុះហត្ថលេខារួចរាល់ហើយ ដោយគេនៅរង់ចាំតែពេលវេលាមកដល់តែប៉ុណ្ណោះ។ ក្រុមអ្នកគាំទ្ររបស់លោកស្រីអ៊ុងសាន ស៊ូជីនៅតែមិនទាន់ទុកចិត្តនឹងដំណឹងស្តីពីការដោះលែង និងបារម្ភថា របបសឹកអាចនឹងរកលេសចាប់ដាក់ឃុំមេដឹកនាំបក្សប្រឆាំង ជាបន្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
ដំណឹងស្តីពីការដោះលែងលោកស្រីអ៊ុងសាន ស៊ូជីបានលេចឮតាំងពីថ្ងៃពុធម្ល៉េះ។ ជាផ្លូវការ ការឃុំក្នុងគេហដ្ឋានរយៈពេល ១៨ខែ ទៅលើមេដឹកនាំបក្សប្រឆាំងភូមា ត្រូវផុតកំណត់ នៅថ្ងៃសៅរ៍ស្អែកនេះ។ ចាប់តាំងពីថ្ងៃនេះ គេឃើញសន្តិសុខនៅជុំវិញគេហដ្ឋានរបស់លោកស្រីស៊ូជីត្រូវបានគេពង្រឹងយ៉ាងខ្លាំង។ ប៉ូលិសជាច្រើនរយនាក់ ត្រូវបានពង្រាយនៅជុំជិតគេហដ្ឋានរបស់លោកស្រីស៊ូជី ក្នុងក្រុងRangoun។
បើទោះជាមិនទាន់មានដំណឹងផ្លូវការពីរបបសឹកភូមា ប៉ុន្តែអាជ្ញាធរថ្នាក់ក្រោមដែលសុំមិនបញ្ចេញឈ្មោះ បានបញ្ជាក់ថា លោកស្រី អ៊ុងសាន ស៊ូជីនឹងត្រូវគេដោះលែងដោយប្រាកដ។ ទោះយ៉ាងណា គេមិនបានដឹងច្បាស់ទេថា តើការដោះលែងលើកនេះ នឹងមានជាប់មកជាមួយនឹងលក្ខខណ្ឌពីរបបសឹកដែរឬទេ។
គួរដឹងថា កាលពីឆ្នាំ ២០០២ លោកស្រីស៊ូជីដែលត្រូវបានដោះលែងឲ្យមានសេរីភាព ម្តងហើយ ប៉ុន្តែ មានលក្ខខណ្ឌ ហាមមិនឲ្យជួបនឹងប្រជាជនដែលគាំទ្រលោកស្រី។ ការដែលក្បួនរថយន្តដឹកលោកស្រីទៅជួបប្រជាជន ត្រូវបានជនមិនស្គាល់មុខវាយប្រហារ និងសម្លាប់ប្រជាជនជាច្រើននាក់ កាលពីឆ្នាំ ២០០៣បានធ្វើឲ្យរបបសឹកយកលេសចោទ លោកស្រីថា បានបង្កឲ្យមានភាពរញ៉េរញ៉ៃក្នុងសង្គម និងសម្រេចចាប់លោកស្រីស៊ូជី ដាក់ឃុំក្នុងគេហដ្ឋាន រហូតមក។
លើកនេះ គេបារម្ភថា របបសឹកអាចនឹងមានកលនយោបាយដូចមុន នោះក៏ព្រោះថា គ្រាន់តែជិតដល់ថ្ងៃដោះលែងរបស់ខ្លួន លោកស្រីអ៊ុងសាន ស៊ូជីតាមរយៈមេធាវីរបស់ខ្លួន បាននិយាយថា ក្នុងសន្និសីទកាសែត នៅថ្ងៃសៅរ៍ស្អែក លោកស្រី នងលើកឡើងពីការចាប់ដាក់ឃុំលោកស្រីដោយខុសច្បាប់ និងបរិហារពីការបោះឆ្នោតដែលសំបូរដោយការបន្លំសន្លឹកឆ្នោត។
នៅពេលនេះ របបសឹកសម្រេចដោះលែងលោកស្រីអ៊ុងសាន ស៊ូជី ដើម្បីអាចយកមុខមាត់ និងការកោតសរសើរពីសហគមន៍អន្តរជាតិ។ ម្យ៉ាងទៀត លោកស្រីអ៊ុងសាន ស៊ូជីនឹងមិនអាចធ្វើជាឆ្អឹងទទឹងករបស់ខ្លួនទៀតទេ ព្រោះថា មេដឹកនាំបក្សប្រឆាំងរូបនេះ ត្រូវដោះលែង នៅក្រោយការបោះឆ្នោត ដែលរៀបចំកាលពីថ្ងៃអាទិត្យ និងដែលសហគមន៍អន្តរជាតិបានរិះគន់ជាទូទៅ។
ក្នុងរយៈពេល ២០ឆ្នាំដែលខ្លួនមានវត្តមានក្នុងប្រទេសភូមា លោកស្រីអ៊ុងសាន ស៊ូជី បានចំណាយពេល ១៥ឆ្នាំហើយ នៅក្នុងការឃុំឃាំងដែលបញ្ជាដោយរបបសឹកភូមា។ លោកស្រីត្រូវបានកាត់ផ្តាច់ទាំងស្រុងពីការទាក់ទងពីពិភពខាងក្រៅ។ គេបារម្ភថា លោកស្រីអាចនឹងមិនដឹងពីការវិវឌ្ឍន៍ជាក់ស្តែងក្នុងសង្គមភូមាបច្ចុប្បន្ន។
ប៉ុន្តែ បើតាមមេធាវីរបស់លោកស្រីស៊ូជី នៅបន្ទាប់ពីការដោះលែង មេដឹកនាំប្រឆាំងភូមាមានគម្រោងចង់បង្កើតBlog Twitterក្នុងអ៊ិនធ័រណេត ដើម្បីអាចទាក់ទង និយាយជាមួយយុវជនភូមា និងពិភពលោកទាំងមូល។
អ្នកវិភាគនយោបាយភូមាមើលឃើញថា លោកស្រីស៊ូជីអាចនៅឆ្ងាយពីស្ថានភាពជាក់ស្តែង ប៉ុន្តែ លោកស្រីនៅតែជាវីរនារីក្នុងកែវភ្នែករបស់ប្រជាជនភូមា។ លោកស្រីនឹងត្រលប់ មកធ្វើនយោបាយវិញ ជាប្រាកដ។ ប៉ុន្តែ អ្វីដែលគេប៉ាន់ស្មាននោះគឺថា លោកស្រីប្រហែលជាត្រូវការកំលាំងថ្មីសម្រាប់ធ្វើការប្រឆាំងនឹងរបបសឹក ពោលគឺយុវជនដែលមានសក្តានុពលក្នុងការអនុវត្តគោលនយោបាយរបស់លោកស្រី។
ប្រវត្តិនៃការចាប់ដាក់ឃុំលោកស្រីអ៊ុងសាន ស៊ូជី៖
-នៅឆ្នាំ ១៩៨៩ លោកស្រីអ៊ុងសាន ស៊ូជីត្រូវបានចាប់ដាក់ឃុំក្នុងគេហដ្ឋាន។ នោះ គឺបន្ទាប់ពីលោកស្រីបានសម្រេចបង្កើតគណបក្សសម្ព័ន្ធដើម្បីលទ្ធិប្រជាធិបតេយ្យ ដែលជាគណបក្សប្រឆាំង ដ៏មានប្រជាប្រិយភាព និងឈ្នះឆ្នោតនៅភូមា នាឆ្នាំ ១៩៩០។ ប៉ុន្តែ របបសឹកមិនដែលទទួលស្គាល់ជ័យជំនះ និងសុខចិត្តផ្តល់អំណាចទៅឲ្យគណបក្សដឹកនាំដោយលោកស្រីអ៊ុងសាន ស៊ូជីទេ។ លោកស្រីត្រូវដោះលែងឲ្យមានសេរីភាពឆ្នាំ ១៩៩៥។
-នៅឆ្នាំ ១៩៩៨ លោកស្រីស៊ូជីបានប្រាប់ទៅរដ្ឋាភិបាលឲ្យកោះប្រជុំតំណាងរាស្រ្តដែលជាប់ឆ្នោត ឆ្នាំ ១៩៩០។ នៅខែកញ្ញា ឆ្នាំ ២០០០ លោកស្រីត្រូវរបបសឹកដាក់ឲ្យស្ថិតនៅក្រោមការឃ្លាំមើលជាថ្មីពីអាជ្ញាធរ។ នៅខែឧសភា ២០០២ លោកស្រីត្រូវបានដោះលែង និងទទួលស្វាគមន៍យ៉ាងខ្លាំងក្លាពីសំណាក់អ្នកគាំទ្រ និងអ្នកកាសែតបរទេស។
-នៅ ឆ្នាំ ២០០៣ ក្បួនរថយន្តដឹកលោកស្រី និងសមាជិកគណបក្សប្រឆាំងត្រូវជនមិនស្គាល់មុខបាញ់ប្រហារ។ តាមការប៉ាន់ស្មាន ការវាយប្រហាររៀបចំដោយរបបសឹក។ តាមអាជ្ញាធរមានមនុស្សបួននាក់ស្លាប់ ប៉ុន្តែបើតាមគណបក្សប្រឆាំង មានមនុស្សជាងមួយរយនាក់បាត់បង់ជីវិតក្នុងការវាយប្រហារ។ លោកស្រីស៊ូជី និងសមាជិករបស់គណបក្សប្រឆាំងត្រូវចាប់ខ្លួន។ លោកស្រីស៊ូជីត្រូវគេចាប់ដាក់ឃុំក្នុងគេហដ្ឋាន។ នៅខែ ឧសភា ២០០៩ នៅពេលគេសង្ឃឹមថា លោកស្រីនឹងត្រូវដល់ពេលគេដោះលែង ស្រាប់តែមានជនជាតិអាមេរិកាំងម្នាក់បានហែលទឹកចូលទៅក្នុងផ្ទះលោកស្រី។ លោកស្រីស៊ូជីត្រូវតុលាការភូមាចោទពីបទរំលោភច្បាប់ឃុំខ្លួនក្នុងគេហដ្ឋាន និងសម្រេចបន្តឃុំខ្លួនលោកស្រីរយៈពេល ១៨ខែបន្តទៀត។ ច្បាប់បោះឆ្នោត ឆ្នាំ ២០១០ដែលរៀបចំដោយរបបសឹកភូមាបានសម្រេចដាក់លោកស្រីឲ្យនៅក្រៅសៃវៀននយោបាយ។ ច្បាប់នេះបានសម្រេចថា អ្នកដែលមានជាប់ទោសនយោបាយមិនអាចឈរឈ្មោះជាបេក្ខជនក្នុងការបោះឆ្នោតសភាភូមាទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ