កិច្ចសន្យានិងសិទ្ធិមនុស្សគឺជាចំណុចសំខាន់២ក្នុងដំណើរទស្សនកិច្ចរបស់លោកCameronនៅប្រទេសចិន
លោកនាយករដ្ឋមន្ត្រីអង់គ្លេសបានចាត់ទុកទស្សនកិច្ចនេះថាជា” បេសកកម្មពាណិជ្ជកម្មដ៏សំខាន់ជាអាយុជីវិត “និងគឺជាកិច្ចសន្យាតម្លៃជាង១០០០លានដុល្លារដែលលោកDavid Cameronសម្រេចបាននៅទិវាទីមួយនៃទស្សនកិច្ចរបស់គាត់ នៅប្រទេសចិន។លោកប្រមុខរដ្ឋាភិបាលត្រូវអមដំណើរដោយគណៈប្រតិភូមាន រដ្ឋមន្ត្រី៤រូបនិងប្រធានសហគ្រាសឩស្សាហកម្មអង់គ្លេស៥០រូប។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
ចុះកិច្ចសន្យាជាមួយប្រទេសចិនពុំឃាត់ឃាំងដល់ការនិយាយស្តីអំពីសិទ្ធិមនុស្សនោះទេ។ នេះហើយជាសារដែលក្រុមអ្នកជំនិតរបស់លោកនាយករដ្ឋមន្ត្រីអង់គ្លេសចង់ឱ្យគេដឹងឮ នៅឱកាសទស្សនកិច្ចរយៈពេល២ថ្ងៃនេះ។ បញ្ហាសិទ្ធិមនុស្សនេះត្រូវបានលើកឡើងដោយចំពោះនៅឱកាសជួបពិភាក្សាគ្នាជាមួយលោកនាយករដ្ឋមន្ត្រីចិន វេន ជាប៉ាវ នៅថ្ងៃអង្គារម្សិលមិញ៩វិច្ឆិកា។ បញ្ហាដដែលនេះ ក៏នឹងត្រូវលើកឡើងម្តងទៀតនៅរសៀលថ្ងៃពុធ១០វិច្ឆិកានេះនៅឱកាសថ្លែងសុន្ទរកថានៅពីមុខនិសិ្សតនៃសកលវិទ្យាល័យប៉េកាំង។
ស្របតាមសេចក្តីដកស្រង់ចុះផ្សាយដោយមន្ទីរក្រសួងរបស់គាត់ លោក David Cameron ត្រូវអំពាវនាវនៅឱកាសនេះសូមឲ្យរដ្ឋអំណាចចិន” បើកចំហនយោបាយឲ្យបានធំទូលាយជាងមុន”។ ប៉ុន្តែគេពុំដឹងជាតើគាត់បាននិយាយអំពីករណីលោក លីវ ស៊ាវប៉ូឬទេ?? ប្រមុខរដ្ឋាភិបាលអង់គ្លេសជាអ្នកទទួលខុសត្រូវនយោបាយលោកខាងលិចទីមួយដែលបានអញ្ជើញមកកាន់ប៉េកាំង បន្ទាប់ពីមានការប្រកាសផ្តល់រង្វាន់ណូបែលផ្នែកសន្តិភាពឲ្យអ្នកប្រឆាំងរឹងរូសនឹងរដ្ឋអំណាចចិនកំពុងជាប់ឃុំឃាំងក្នុងពន្ធនាគារ។
សិល្បករចិនឈ្មោះ Ai Wei Wei ដែលស្នាដៃរបស់គាត់នៅខណៈនេះកំពុងដាក់តាំងបង្ហាញនៅវិចិត្រសាល Tate Galleryនៅទីក្រុង Londres និងត្រូវចុះផ្សាយនៅទំព័រទីមួយនៃទស្សនាវដ្តីរូបភាពនៅប្រទេសអង់គ្លេស បានអំពាវនាវយ៉ាងច្បាស់លាស់នៅថ្ងៃចន្ទម្សិលម្ង៉ៃ សូមឲ្យលោកខាងលិច សំដែងកាយវិការគាំទ្រពួកអ្នកការពារសិទ្ធិមនុស្សនៅប្រទេសចិន។
ប៉ុន្តែនៅខណៈនេះ លោកនាយករដ្ឋមន្ត្រីអង់គ្លេសត្រូវគេមើលឃើញ ជាពិសេសនៅទីនេះ គឺនៅទីក្រុងប៉េកាំងជា Businessman។ “ Cameron means buisness” នេះជាចំណងជើងនៃកាសែត Global Timesចេញផ្សាយនៅព្រឹកថ្ងៃពុធនេះ។ « គាត់បានមករកលុយនៅប្រទេសចិន » នេះជាសំដីរបស់និសិ្សតចិនម្នាក់នៅពេលក្រឡេកឃើញចំណងជើងកាសែតចិនQuotidien du Peupleតាំង លក់នៅ លើ រានអ្នក លក់ កាសែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ