អាមេរិក និងរុស្ស៊ីត្រូវបានអញ្ជើញឲ្យចូលរួម នៅពិធីបើកជំនួបកំពូលអាស៊ីបូព៌ា
ជំនួបកំពូលអាស៊ីបូព៌ាបានចាប់ផ្តើមជាផ្លូវការហើយនៅថ្ងៃសៅរ៍ ទី៣០ តុលានេះ នៅក្នុងទីក្រុងហាណូយ ប្រទេសវៀតណាម។ ជំនួបកំពូលដែលចូលរួមដោយប្រទេសអាស៊ានទំាង ១០ និងប្រទេសដៃគូប្រពៃណីរបស់អាស៊ានទំាង ៦។ អ្វីជាការកត់សម្គាល់ឆ្នំានេះ គឺវត្តមានរបស់អាមេរិក និងរុស្ស៊ីដែលត្រូវបានគេអញ្ជើញឲ្យចូលរួម។ អាមេរិក និងរុស្ស៊ីដែលកំពុងតាមដានដោយយកចិត្តទុកដាក់អំពីជម្លោះដែនដីរវាងចិន និងបណ្តាប្រទេសមួយចំនួនទៀតនៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គួច គន្ធារ៉ាពីទីក្រុងហាណួយ ប្រទេសវៀតណាម
លោកស្រីប្រមុខការទូតអាមេរិក Hillary Clinton និងលោកប្រមុខការទូតរុស្ស៊ី Sergueï Lavrov ត្រូវបានគេអញ្ជើញឲ្យចូលរួមជំនួបកំពូលអាស៊ីបូព៌ាឆ្នំានេះ ក្នុងនាមជាភ្ញៀវកិត្តិយស។ តែសម្រាប់ជំនួបកំពូលអាស៊ីបូព៌ានៅឆ្នំា ២០១១ ក្នុងប្រទេសឥណ្ឌូនេស៊ី អាមេរិក និងរុស្ស៊ីនឹងត្រូវចូលរួមពេញសិទ្ធិនៅក្នុងជំនួបកំពូលនេះ ព្រោះថា អាស៊ានបានអនុម័តទទួលយកប្រទេសមហាអំណាចទំាងពីរចូលជាមួយក្រុមប្រទេសដៃគូប្រពៃណីទំាង៦ របស់ខ្លួនរួមមាន ចិន ជប៉ុន កូរ៉េខាងត្បូង ឥណ្ឌា អូស្រ្តាលី និងនូវែលហ្សេឡង់។ ក្រៅពីវត្តមានប្រមុខការទូតរុស្ស៊ី គេក៏ឃើញមានវត្តមានលោកប្រធានាធិបតីរុស្ស៊ី Dmitri Medvedev ផងដែរ។
ជំនួបកំពូលប្រទេសអាស៊ានទំាង ១០ និងប្រទេសដៃគូប្រពៃណីទំាង ៦របស់អាស៊ានពេលនេះបានធ្វើឡើង ជួនចំពេលដែលជម្លោះដែនដីរវាងចិន និងបណ្តាប្រទេសមួយចំនួនក្នុងតំបន់កំពុងតានតឹង។
កាលពីថ្ងៃសុក្រ ម្សិលមិញ វិបត្តិរវាងប្រទេសជប៉ុន និងចិនបានធ្លាក់ចុះមួយកំរិតទៀត បន្ទាប់ពីទីក្រុងប៉េកំាងបានចោទទីក្រុងតូក្យូ ថាបានធ្វើឲ្យខូចបរិយាកាសដែលនំាឲ្យគ្មានការជួបគ្នារវាងប្រមុខរដ្ឋាភិបាលនៃប្រទេសទំាងពីរ ចិន ជប៉ុនក្នុងទីក្រុងហាណូយ។ គួររម្លឹកជូនថា វិបត្តិចិន ជប៉ុនបានចាប់ផ្តើមកាលពីខែកញ្ញាកន្លងទៅ ក្រោយពីកងនាវាល្បាតជប៉ុនបានចាប់កប៉ាល់នេសាទ និងឃុំអ្នកនេសាទចិននៅក្បែរទីប្រជុំកោះ Senkaku ស្ថិតក្នុងសមុទ្រចិនខាងកើត និងដែលប្រទេសទំាងពីរកំពុងដណ្តើមគ្នាកាន់កាប់។
ម្យ៉ាងទៀត ជម្លោះដែនដីស្រដៀងគ្នានេះក៏ចិនមានជាមួយបណ្តាប្រទេសអាស៊ានចំនួន ៤ទៀត នៅក្នុងសមុទ្រចិនខាងត្បូង ទាក់ទងនឹងប្រជុំកោះ Paracel និងSpratly។ ក្នុងសំណុំរឿងនេះ គេសង្កេតឃើញមានការធូរស្រាលមួយចំនួន បន្ទាប់ពីចិនបានសម្តែងឲ្យឃើញពីឆន្ទៈរបស់ខ្លួនក្នុងការដោះស្រាយបញ្ហា ទៅតាមករណីជាក់ស្តែងនីមួយៗ។ ក៏ប៉ុន្តែ ចិននៅតែបន្តទាមទារឲ្យមានដំណោះស្រាយជាលក្ខណៈទ្វេភាគី ដែលវាផ្ទុយនឹងឆន្ទៈរបស់ប្រទេសពាក់ព័ន្ធមួយចំនួនដែលគំាទ្រដោយអាមេរិក ចង់បានដំណោះស្រាយជាពហុភាគី។
លោកនាយករដ្ឋមន្រ្តីចិន វ៉េង យ៉ាបាវបានបញ្ជាក់យ៉ាងច្បាស់ថា « យើងនឹងធ្វើការរួមគ្នាដើម្បីរក្សាសន្តិភាព និងស្ថិរភាពនៅក្នុងសមុទ្រចិនខាងត្បូង យើងនឹងធ្វើការចរចាជាឧភតោភាគីដើម្ប ស្វែងរកដំណោះស្រាយសមស្របដែលទទួលយកបានទំាងអស់គ្នា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ