លោកអាភីស៊ីតនឹងទៅនិយាយការពារគណបក្សរបស់ខ្លួន នៅចំពោះមុខតុលាការ
នៅថ្ងៃចន្ទស្អែកនេះ នាយករដ្ឋមន្ត្រីថៃ លោកអាភីស៊ីត វីចាជីវ៉ានឹងចូលទៅបង្ហាញខ្លួន នៅតុលាការធម្មនុញ្ញ ដើម្បីនិយាយការពារគណបក្សប្រជាធិបតេយ្យរបស់លោក។ ប្រសិនបើតុលាការធម្មនុញ្ញរកឃើញថា គណបក្សរបស់លោកអាភីស៊ីតមានជាប់ពាក់ព័ន្ធនឹងរឿងពុករលួយមែននោះ គេនឹងប្រកាសរំលាយគណបក្ស ចំណែកលោកអាភីស៊ីត នឹងមិនត្រូវគេអនុញ្ញាតចូលប្រលូកក្នុងឆាកនយោបាយរយៈពេល៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
នៅថ្ងៃស្អែក លោកអាភីស៊ីត នឹងទៅបង្ហាញខ្លួន នៅតុលាការធម្មនុញ្ញ ក្នុងនាមជាសាក្សីរបស់គណបក្សប្រជាធិបតេយ្យដែលជាចុងចោទ។ ក្នុងបទប្រកាន់អំពីពុករលួយ គណបក្សប្រជាធិបតេយ្យដែលជាគណបក្សដ៏មានវ័យចំណាស់របស់ថៃ អាចនឹងត្រូវគេប្រកាសរំលាយចោល។ នៅក្រោយសវនាការនៅថ្ងៃចន្ទនេះ សាលក្រមនឹងត្រូវគេប្រកាស នៅខែវិច្ឆិកាខាងមុខនេះ។
លោកអាភីស៊ីត ឯណោះវិញ និងអ្នកទទួលខុសត្រូវជាន់ខ្ពស់មួយចំនួនរបស់គណបក្សប្រជាធិបតេយ្យក៏នឹងអាចត្រូវគេដកសិទ្ធិមិនឲ្យរួមក្នុងនយោបាយ ប្រសិនបើ តុលាការធម្មនុញ្ញនៅរក្សាបទប្រកាន់។
សូមរំលឹកថា កាលពីខែមេសា ក្នុងអំឡុងពេលបាតុកម្មតវ៉ារបស់ក្រុមអាវក្រហម ក្នុងក្រុងបាងកក គណៈកម្មាធិការរៀបចំការបោះឆ្នោតថៃបានស្នើឲ្យរំលាយ គណបក្សប្រជាធិបតេយ្យដែលមានលោកអាភីស៊ីតជាប្រធាន។ គណៈកម្មាធិការរៀបចំការបោះឆ្នោតថៃបានរកឃើញថា គណបក្សប្រជាធិបតេយ្យថៃបានបន្លំប្រាក់ ជាង ២៩លានបាត ក្នុងឆ្នាំ ២០០៥។ ចំណែកលោកអាភីស៊ីតវិញ ត្រូវទទួលរងចោទថា បានទទួលយកលុយសន្ធឹកសន្ធាប់ពីបុគ្គលឯកជនមា្នក់ដើម្បីទ្រទ្រង់គណបក្ស ដែលការនេះវាខុសនឹងច្បាប់បោះឆ្នោត។
អ្នកវិភាគមួយវាយតម្លៃថា គណបក្សប្រជាធិបតេយ្យនឹងមិនអាចត្រូវគេរំលាយចោលដោយងាយៗឡើយ។ គួបញ្ជាក់ថា លោកអាភីស៊ីតបានចូលកាន់តំណែងជានាយករដ្ឋមន្រ្តី ក៏ដោយសារមានការគាំទ្រពីយោធា និងគ្រួសារព្រះរាជវង្សដែលមានអំណាចខ្លាំងក្នុងប្រទេសថៃ។
ទន្ទឹមគ្នានេះ គេក៏ត្រូវដឹងដែរថា ក្នុងប្រទេសថៃ តុលាការធម្មនុញ្ញ ក៏មានទឹកមាត់ប្រៃណាស់ដែរ។ ក្នុងករណីនេះ មេដឹកនាំយោធាថៃអាចសុខចិត្តឲ្យមានគេរំលាយគណបក្សរបស់លោកអាភីស៊ីត ដើម្បីធ្វើឲ្យក្រុមអាវក្រហមថមថយកំហឹងមួយកម្រិត។ ប៉ុន្តែ ព័ត៌មានល្ហៀងៗបានឲ្យគេដឹងថា ប្រសិនបើគណបក្សប្រជាធិបតេយ្យត្រូវគេរំលាយមែននោះ សមាជិកគណបក្សនឹងសម្រេចបង្កើតភ្លាមៗគណបក្សថ្មីមួយ។ នោះគឺដើម្បីអាចចូលរួមឲ្យបានទាន់ពេលការបោះឆ្នោត នៅចុងឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ