របាយការណ៍ដែលចោទកូរ៉េខាងជើងថាបានបាញ់ពន្លិចនាវាចម្បាំងកូរ៉េខាងត្បូង
នៅថ្ងៃចន្ទទី១៣កញ្ញានេះ ក្រសួងការពារជាតិកូរ៉េខាងត្បូងបានផ្សព្វផ្សាយជាសាធារណៈ លទ្ធផលនៃការស៊ើបអង្កេតអន្តរជាតិ ដែលសន្និដ្ឋានថា កូរ៉េខាងជើងជាអ្នកបានបាញ់ពន្លិចនាវាចម្បាំងរបស់កូរ៉េខាងត្បូង កាលពីថ្ងៃទី ២៦មីនាកន្លងទៅនេះ។ តាមរយៈការផ្សព្វផ្សាយរបាយការណ៍នេះ រដ្ឋាភិបាលកូរ៉េខាងត្បូងចង់ឲ្យប្រជាពលរដ្ឋរបស់ខ្លួនយល់ដឹងនូវការពិតជុំវិញឧប្បត្តិហេតុដ៏ធ្ងន់ធ្ងរដែលបានកើតឡើង កាលពី ៦ខែមុន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
របាយការណ៍ដែលមានកម្រាស់៣០០ទំព័រនេះ គឺជាលទ្ធផលនៃការស៊ើបអង្កេតរួមគ្នាមួយរវាងកូរ៉េខាងត្បូង សហរដ្ឋអាមេរិក ស៊ុយអែដ អូស្រ្តាលី និងអង់គ្លេស។ ការស៊ើបអង្កេតនេះបង្ហាញថា កូរ៉េខាងជើងជាអ្នកបានបាញ់ពន្លិចនាវាចម្បាំងកូរ៉េខាងត្បូងមួយគ្រឿងកាលពីថ្ងៃទី២៦មីនា កន្លងទៅនេះ។
សូមជម្រាបថា ក្រោយការលិចនាវាដែលបានបណ្តាលឲ្យស្លាប់នាវិកកូរ៉េខាងត្បូង៤៦នាក់ ទីក្រុងSéoul បានចោទប្រកាន់កូរ៉េខាងជើងថាជាអ្នកទទួលខុសត្រូវ។ ក៏ប៉ុន្តែ មកទល់ពេលនេះ មហាជនកូរ៉េខាងត្បូងភាគច្រើននៅតែមិនព្រមជឿសំដីរបស់រដ្ឋាភិបាលខ្លួន។ អ៊ីចឹងហើយបានជានៅព្រឹកថ្ងៃចន្ទទី១៣កញ្ញានេះ ក្រសួងការពារជាតិកូរ៉េខាងត្បូងពន្យល់ ថាការផ្សព្វផ្សាយរបាយការណ៍នេះមានគោលដៅពន្យល់ការពិតដល់មតិសាធារណៈកូរ៉េខាងត្បូងនិងសហគមន៍អន្តរជាតិ ដើម្បីកុំឲ្យយល់ច្រឡំនិងកុំឲ្យមានការសង្ស័យតទៅទៀត។
ការបាញ់ពន្លិចនាវាចម្បាំងកូរ៉េខាងត្បូងកាលពីជិត៦ខែមុនដែលបានជម្រុញក្រុមប្រឹក្សាសន្តិសុខរបស់អង្គការសហប្រជាជាតិ ឲ្យថ្កោលទោសទៅលើកូរ៉េខាងជើងកាលពីខែកក្កដាកន្លងទៅនេះ គឺជាឧប្បត្តិហេតុធ្ងន់ធ្ងរជាងគេបង្អស់មួយដែលបានកើតឡើងរវាងកូរ៉េទាំងពីរតាំងពីចប់សង្គ្រាមកូរ៉េនៅឆ្នាំ ១៩៥៣មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ