ពិព័រណ៍ពិភពលោក៖ ៤ខែក្រោយពីពេលបើក មនុស្សនៅតែសម្រុកចូលទស្សនា
ពិព័រណ៍ពិភពលោក ឆ្នាំ២០១០ នៅទីក្រុងសៀងហៃ ប្រទេសចិន បានចាប់ផ្តើមបើកធ្វើ តាំងពីថ្ងៃទី១ ខែឧសភា មកម៉្លេះ។ រហូតមកទល់ពេលនេះ ជាង ៤ខែហើយ មនុស្សនៅតែពពាក់ពពូននាំគ្នាចូលទស្សនា។ គេរំពឹងថា ពិព័រណ៍ពិភពលោកនៅសៀងហៃនេះអាចនឹងមានអ្នកចូលទស្សនាសរុបដល់ទៅ ៧០លាននាក់ ដែលជាចំនួនច្រើនបំផុតមិនធ្លាប់មាន ក្នុងពិព័រណ៍ពិភពលោកមុនៗ។
ចុះផ្សាយនៅថ្ងៃ៖
សេចក្តីរាយការណ៍របស់សេង ឌីណាពីទីក្រុងសៀងហៃ
គិតមកត្រឹមថ្ងៃចន្ទ ទី៦ កញ្ញានេះ ពិព័រណ៍ពិភពលោកនៅសៀងហៃ មានមនុស្សចូលទស្សនាសរុបដល់ទៅជិត ៤៩លាននាក់ហើយ។ គិតជាមធ្យម ក្នុងមួយថ្ងៃៗ មានអ្នកចូលទស្សនាប្រមាណជា ៤០ម៉ឺននាក់។ ថ្ងៃខ្លះ ចំនួនអ្នកចូលទស្សនាមានរហូតដល់ទៅ ៦០ម៉ឺននាក់ក៏មាន។
ពិព័រណ៍ពិភពលោកក្រុងសៀងហៃ ត្រូវបានគេរៀបចំធ្វើ នៅលើផ្ទៃដីជាង ៥គីឡូម៉ែត្រការ៉េ ស្ថិតនៅត្រើយសងខាងទន្លេ ហ៊័ងពូ (Huangpu) និងនៅចន្លោះស្ពានពីរ ដែលឆ្លងកាត់ទន្លេនេះ។ បើសិនជាយើងក្រឡេកមើលពីស្ពាន លូប៉ាន (Luban) ទីតាំងពិព័រណ៍ពិភពលោកប្រៀបបានទៅនឹងកូនទីក្រុងតូចមួយ ដែលពោរពេញទៅដោយសំណង់អគារចម្លែកៗ ខុសពីធម្មតា។ អគារទាំងនោះ គឺជាផ្ទះ (Pavillion) តំណាងប្រទេស ឬតំណាងអង្គការអន្តរជាតិនានា ដែលមានចំនួនសរុបទាំងអស់ ជាង ២៤០ ក្នុងនោះក៏មានកម្ពុជាផងដែរ។ នៅក្នុងបរិវេណទីតាំងពិព័រណ៍នេះ មធ្យោបាយដឹកជញ្ជូនសាធារណៈមានគ្រប់ប្រភេទ៖ មានទាំងរថយន្តក្រុង ទាំងរថភ្លើងក្រោមដី និងទូកសម្រាប់ឆ្លងកាត់ទន្លេពីត្រើយម្ខាង ទៅត្រើយម្ខាងទៀត។
ពិព័រណ៍ពិភពលោកក្រុងសៀងហៃ គឺជាពិព័រណ៍ធំជាងគេបំផុត មិនធ្លាប់មាន គិតទាំងទំហំផ្ទៃដី និងទាំងចំនួនប្រទេសចូលរួម។ អ្នកចូលទស្សនាក៏ទំនងជាអាចមានចំនួនច្រើនជាងពិព័រណ៍ពិភពលោកមុនៗដែរ។ គេព្យាករថា នៅពេលបិទពិព័រណ៍ នៅថ្ងៃទី៣១ តុលា ចំនួនអ្នកចូលទស្សនាសរុបអាចនឹងមានដល់ទៅ ៧០លាននាក់។ គួរបញ្ជាក់ថា កន្លងមក ពិព័រណ៍ពិភពលោក ដែលមានចំនួនអ្នកចូលទស្សនាច្រើនជាងគេ គឺពិព័រណ៍នៅទីក្រុងអូសាកា ប្រទេសជប៉ុន កាលពីឆ្នាំ១៩៧០ ដែលមានអ្នកចូលទស្សនាសរុបជាង ៦០លាននាក់។
រហូតមកទល់ពេលនេះ ជាង ៤ខែហើយ ដែលពិព័រណ៍ពិភពលោកក្រុងសៀងហៃបានបើកទ្វារឲ្យសាធារណជនចូលទស្សនា ប៉ុន្តែ អ្នកចូលទស្សនានៅតែមានចំនួនច្រើន។ កាលពីថ្ងៃអាទិត្យ ម្សិលមិញ អ្នកចូលទស្សនាពិព័រណ៍មានចំនួនជិត ៣០ម៉ឺននាក់។
នៅគ្រប់ច្រកចូលទាំងអស់ គេឃើញមនុស្សពពាក់ពពូន ឈរតម្រង់ជួរចាំចូលទៅក្នុងបរិវេណពិព័រណ៍។ ជាមួយនឹងវិធានការសន្តិសុខដ៏តឹងរ៉ឹងផងនោះ ពេលខ្លះ គេត្រូវឈរតម្រង់ជួរនៅខាងក្រៅរាប់ម៉ោង ទម្រាំបានចូល។ ពេលចូលទៅដល់ខាងក្នុងបរិវេណពិព័រណ៍ហើយ គេត្រូវឈរតម្រង់ជួរយ៉ាងយូរទៀត ដើម្បីចូលទស្សនាការតាំងពិព័រណ៍ នៅខាងក្នុងផ្ទះតំណាងប្រទេស ឬអង្គការនីមួយៗ។
ពិព័រណ៍ពិភពលោកក្រុងសៀងហៃ ត្រូវបានគេរៀបចំឡើងក្រោមប្រធានបទ “Better City, Better Life” ពោលគឺការប្រាថ្នាចង់ឃើញការរៀបចំក្រុង ដែលអាចឲ្យអ្នករស់នៅក្នុងក្រុងនេះ មានជីវិតកាន់តែប្រសើរឡើង។ ការតាំងពិព័រណ៍ នៅក្នុងផ្ទះតំណាងប្រទេស ឬអង្គការនីមួយៗត្រូវបានធ្វើឡើងក្រោមប្រធានបទប្លែកៗពីគ្នា។ “ជីវិតវប្បធម៌ក្នុងទីក្រុង” គឺជាប្រធានបទ នៃការតាំងពិព័រណ៍របស់ផ្ទះខ្មែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ