មនុស្សស្លាប់ ៥៥នាក់នៅក្នុងការវាយប្រហាររបស់កងទ័ពទៅលើពួកតាលីបង់
កាលពីយប់ថ្ងៃអង្គារម្សិលមិញ កងទ័ពប៉ាគីស្តង់ ធ្វើការទម្លាក់គ្រាប់បែកទៅលើជំរកដែលគេសង្ស័យថាជារបស់ក្រុម អត្តឃាតជនតាលីបង់នៅប៉ែកពាយ័ព្យប្រទេសប៉ាគីស្តង់។ យោងតាមការជូនដំណឹងរបស់អាជ្ញាធរក្នុងតំបន់នាថ្ងៃពុធនេះ មនុស្សស្លាប់មានចំនួនយ៉ាងតិច ៥៥នាក់ក្នុងនោះក៏មានប្រជាជនស៊ីវីលផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
យន្តហោះប្រដេញរបស់កងទ័ពប៉ាគីស្តង់ ធ្វើការទម្លាក់គ្រាប់បែកកាលពីយប់ថ្ងៃអង្គារទី ៣១សីហាម្សិលមិញទៅលើជំរំហ្វឹកហ្វឺនមួយរបស់ពួកតាលីបង់នៅស្រុក Khyber ក្នុងតំបន់កុលសម្ព័ន្ធជាប់ព្រំដែនជាមួយ អាហ្វហ្កានិស្តង់។
យោងតាមកងកម្លាំងសន្តិសុខប៉ាគីស្តង់ ក្រុមឧទ្ទាមតាលីបង់ប្រើប្រាស់ជំរំនេះសម្រាប់រៀបចំយានជំនិះដែលផ្ទុកពេញទៅដោយគ្រឿងផ្ទុះក៏ព្រមទាំងអ្នកបើកបរយានជំនិះដែរដើម្បីធ្វើភេរវកម្មនាសប្តាហ៍នេះ។ នាខណៈដែលនាយទាហាននៃកងកម្លាំងសន្តិសុខប៉ាគីស្តង់ អះអាងថា ពួកឧទ្ទាមតាលីបង់ស្លាប់អស់ចំនួន ៣០នាក់ អាជ្ញាធរក្នុងតំបន់វិញ បានបង្ហើបឲ្យគេដឹងថា ក្នុងចំណោមអ្នកស្លាប់ក៏មានប្រជាជនស៊ីវីលជាច្រើននាក់ដែរ។ ចំណែក តួលេខនៃជនរងគ្រោះស្លាប់ដោយការវាយប្រហាររបស់កងទ័ពប៉ាគីស្តង់ មានរហូតដល់ទៅ ៥៥នាក់។
ក្រុមឧទ្ទាមតាលីបង់ បានយកប្រជាជនស៊ីវីលក៏ព្រមទាំងក្រុមគ្រួសារគេ មកធ្វើជាខែលបាំងមុខរបស់ពួកគេ ជាហេតុបណ្តាលឲ្យប្រជាជនស៊ីវិលស្លាប់អស់យ៉ាងតិចចំនួន ១២ នាក់នៅក្នុងការទម្លាក់គ្រាប់បែករបស់កងទ័ពប៉ាគីស្តង់ទៅលើក្បួនយានជំនិះមួយខ្សែ។ នេះ បើយោងតាមការអះអាងរបស់បណ្តាអ្នកទទួលខុសត្រូវនៃយោធាប៉ាគីស្តង់មួយចំនួនដោយសុំមិនបញ្ចេញឈ្មោះ។
តំបន់កុលសម្ព័ន្ធដែលជាប់ព្រំដែនជាមួយប្រទេស អាហ្វហ្កានិស្តង់ សុទ្ធសឹងជាបន្ទាយរបស់ក្រុមឧទ្ទាមតាលីបង់។ ពួកតាលីបង់ដែលជាសម្ព័ន្ធរបស់ក្រុមបណ្តាញភេរវនិយម Al-Qaïda ក៏ជាអ្នកបង្កអំពើភេរវកម្មយ៉ាងច្រើនបំផុតដែរនៅក្នុងប្រទេសប៉ាគីស្តង់។ អំពើភេរវកម្មភាគច្រើន ជាអំពើភេរវកម្មអត្តឃាត ដែលសម្លាប់ជីវិតមនុស្សអស់ជិត ៣៦០០នាក់នៅក្នុងប្រទេសប៉ាគីស្តង់ក្នុងរយៈពេលតែ ៣ឆ្នាំប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ