ប្រធានាធិបតីគីម ជុងអ៊ីលជួបប្រាស្រ័យជាមួយប្រធានាធិបតីចិនហ៊ូ ជិនតាវ
គឺជាដំណើរទស្សនកិច្ចជាលើកទីពីរហើយ នៅប្រទេសចិនក្នុងរយៈពេលតែបួនខែប៉ុណ្ណោះ របស់អគ្គមគ្គទេសក៍កូរ៉េខាងជើង លោក គីម ជុងអ៊ីល (Kim Jong-Il)។ លោក គីម ជុងអ៊ីល បានជួបសន្ទនាជាមួយលោកប្រធានាធិបតីចិន ហ៊ូ ជិនតាវ (Hu Jintao) នៅក្នុងសណ្ឋាគារមួយដែលស្ថិតនៅក្រុង Changchun ប៉ែកឦសានប្រទេសចិន មុនវិលត្រឡប់មកកាន់កូរ៉េខាងជើងវិញ។ នេះបើយោងតាមមធ្យោបាយឃោសនាមហាជនកូរ៉េខាងត្បូងនាថ្ងៃសៅរ៍ ២៨សីហា ២០១០នេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
ក្នុងដំណើរទស្សនកិច្ចប្រកបដោយអាថ៌កំបាំងបំផុតនៅក្នុងប្រទេសចិន អគ្គមគ្គទេសក៍កូរ៉េខាងជើង គីម ជុងអ៊ីល ប្រហែលជាបានទទួលការយល់ព្រមហើយពីសំណាក់សម្ព័ន្ធមិត្តចិនរបស់ខ្លួន ចំពោះគម្រោងការដែលលោកប្រធានាធិបតីកូរ៉េខាងជើង ចង់លើកស្ទួយកូនប្រុសពៅរបស់គាត់ឲ្យឡើងគ្រប់គ្រងប្រទេសកូរ៉េខាងជើង ស្នងតំណែងបន្តពីរូបគាត់នាពេលខាងមុខ។
គឺជាទស្សនកិច្ចលើកទីពីរហើយ បន្ទាប់ពីដំណើរទស្សនកិច្ចលើកទី ១របស់ លោក គីម កាលពីខែឧសភាមុននៅក្នុងប្រទេសចិន។ អមដំណើរ លោកគីម ជុងអ៊ីល- ក៏ប្រហែលជាមានវត្តមានកូនប្រុសពៅរបស់គាត់ដែរ។ កូនប្រុសពៅរបស់លោកគីម ជុងអ៊ីល ឈ្មោះ គីម ជុនអ៊ុន នេះ ដែលដំណឹងលេចឮកាន់តែខ្លាំងឡើងៗ ថាជាអ្នកត្រូវស្នងតំណែងបន្តពីរូបគាត់។
លោកប្រធានាធិបតីចិន ហ៊ូ ជិនតាវវិញដែលកំពុងស្ថិតនៅតំបន់ប៉ែកឦសានប្រទេស បានអញ្ជើញទៅកាន់ក្រុង Changchun និងប្រហែលជាបានជួបចរចាជាមួយលោកប្រធានាធិបតីគីម ជុងអ៊ីលកាលពីថ្ងៃសុក្រម្សិលមិញនេះ។ ម្យ៉ាងទៀត តាមធម្មតា លោកប្រធានាធិបតី គីម ជុងអ៊ីល ប្រហែលជានឹងវិលត្រឡប់មកកាន់ទីក្រុង ព្យុងយ៉ាងវិញតាមរថភ្លើងពិសេសរបស់លោក ចាប់ពីថ្ងៃសៅរ៍នេះដែរ។
មួយវិញទៀត យោងតាម ទូរទស្សន៍ YTN និងទីភ្នាក់ងារព័ត៌មានកូរ៉េខាងត្បូង Yonhap បានប្រាប់ឲ្យដឹងថា ក្បួនរថយន្តប្រមាណជា ២០គ្រឿង អមការពារដោយយានជំនិះសន្តិសុខចិនចំនួន ១០គ្រឿង បានចាកចេញពីសណ្ឋាគារនៅ Changchun នាព្រឹកមិញនេះ និងឆ្ពោះទៅកាន់សកលវិទ្យាល័យកសិកម្មនៅក្នុងក្រុងនេះ។ មុនពេលនេះបន្តិច រថយន្តធំមួយគ្រឿងដែលទុកសំរាប់ដឹកជញ្ជូនអីវ៉ាន់របស់ក្រុមលោកគីម ជុងអ៊ីល បានចេញដំណើរឆ្ពោះទៅកាន់ចំណតរថភ្លើងនៅ Changchun ដែលជាទីចំណតនៃរថភ្លើងពិសេសរបស់អគ្គមគ្គទេសក៍ កូរ៉េខាងជើង។
ចំណែក បណ្តាអ្នកទទួលខុសត្រូវផ្សេងៗទៀត របស់កូរ៉េខាងត្បូងវិញ បានអះអាងដែរ ថា លោក គីម ជុងអ៊ីល ត្រូវត្រឡប់មកកាន់ព្យុងយ៉ាងវិញនាថ្ងៃសៅរ៍នេះ បន្ទាប់ពីលោក បានទទួលនូវជំនួយការទូតនិងសេដ្ឋកិច្ចដ៏សន្ធឹកមួយពីប្រទេសចិន ដើម្បីជួយទប់ទល់សេដ្ឋកិច្ចដ៏ ទ្រុឌទ្រោមរបស់កូរ៉េខាងជើង ដែលបានរងគ្រោះដោយទឹកជំនន់ដ៏ធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ