ទាហានបារាំងពីរនាក់ស្លាប់នៅអាហ្វហ្កានិស្តង់
ទាហានបារាំង២នាក់បានស្លាប់ នៅថ្ងៃចន្ទ២៣សីហាម្សិលមិញ នៅអាហ្វហ្កានិស្តង់ ៣នាក់ទៀតត្រូវរបួសនិងកំពុងទទួលការព្យាបាលនៅមន្ទីរពេទ្យ។ដោយសរុប មានទាហាន៥នាក់បានស្លាប់គឺបារាំង២នាក់ ហុងគ្រីម្នាក់និងអាមេរិកាំង២នាក់។ទាហានបារាំងទាំង២នាក់បានស្លាប់ នៅឱកាសប្រតិបត្តិការប្រឆាំងនឹងពួកឩទ្ទាមបះបោរនៅខាងត្បូងស្រុក Tagab នៅក្នុងខែត្រ Kapisa នៅប៉ែកឦសានក្រុងកាប៊ូល។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
ប្រទេសបារាំងបានជាប់ពាក់ព័ន្ធនៅអាហ្វហ្កានិស្តង់ចាប់ពីឆ្នាំ២០០១មកម៉្លេះ។ជនចំនួនជិត៤០០០នាក់មានវត្តមាន នៅក្នុងប្រទេសនេះ ភាគច្រើននៅក្នុងផ្ទៃ Isaf គឺកងកម្លាំងទ័ពអន្តរជាតិជំនួយដល់សន្តិសុខរបស់អូតង់ស្ថិតក្រោមអំណាចបញ្ជាការអាមេរិកាំងនិងបានទទួលអាណត្តិពីអង្គការសហប្រជាជាតិ។មានទាហានប្រមាណជា៥០សញ្ជាតិដែលក្នុងចំណោមនេះ ២៥សញ្ជាតិមកពី២៧ប្រទេសនៃសហភាពអឺរ៉ូបចូលរួមក្នុងកងកម្លាំងទ័ពអន្តរជាតិនេះ។
ប៉ុន្តែគឺពួកទាហានអាមេរិកាំងទេតើដែលមានមុខច្រើនជាងគេ នៅលើដែនដីអាហ្វហ្កានិស្តង់ ដោយហេតុថា ពួកគេមានចំនួន២/៣នៃចំនួនទាហានបរទេសទាំងអស់១៤ម៉ឺននាក់ជាប់ពាក់ព័ន្ធ នៅក្នុងប្រទេសនេះ។
ក្រៅពីការរួមចំណែករបស់ខ្លួនក្នុងកងកម្លាំងទ័ព Isaf កងទ័ពបារាំងកេណ្ឌទាហានជាច្រើនរយនាក់ទៀត ដើម្បីបំពេញបេសកកម្មអប់រំបង្ហាត់ហ្វឹកហ្វឺនកងទ័ពអាហ្វហ្កានិស្តង់។ស្របតាមក្រសួងការពារជាតិ តម្លៃសរុបនៃអន្តរាគមន៍បារាំងនៅអាហ្វហ្កានិស្តង់មានចំនួនជាទឹកប្រាក់៥០០លានអឺរ៉ូក្នុងមួយឆ្នាំនិងទាហានបារាំង៤៧នាក់បានស្លាប់ក្នុងអំឡុងពេល៩ឆ្នាំ។
នៅពេលដែលប្រទេសហូឡង់ទើបនឹងចាប់ផ្តើមដកកងទ័ពរបស់ខ្លួន ប្រទេសបារាំងវិញមិនងាយនឹងប្រមើលទុកការនេះទេ ដ្បិត “កងទ័ពបារាំងត្រូវតែស្ថិតនៅ ពីព្រោះគ្មានដំណោះស្រាយដទៃទៀតឡើយ “ -នេះជាការថ្លែងរបស់លោករដ្ឋមន្ត្រីក្រសួងការពារជាតិបារាំង Hervé Morin នៅដើមខែសីហានេះ។
ចំណែកឯស.រ.អា.វិញ ការដកកងទ័ពរបស់ខ្លួនត្រូវបានប្រមើលទុកជាផ្លូវការ នៅខែកក្កដាឆ្នាំ២០១១។ជាកាលបរិច្ឆេទដែលលោកឩត្តមសេនីយ Petraeus ជាមេបញ្ជាការនៃកងកម្លាំងទ័ពអាមេរិកាំងនិងអន្តរជាតិ ប្រចាំនៅអាហ្វហ្កានិស្តង់ បានចោទបំផុសជាបញ្ហាឡើងវិញ នៅសប្តាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ