លោកនាយករដ្ឋមន្ត្រីចិនស្នើចង់ឱ្យមានកំណែទម្រង់នយោបាយ
ប្រទេសចិនត្រូវតែបន្តដើរលើមាគ៌ាកំណែទម្រង់នយោបាយ ដើម្បីការពារសុខភាពនៃសេដ្ឋកិច្ចរបស់ខ្លួន -នេះជាប្រសាសន៍របស់លោកនាយករដ្ឋមន្ត្រី វេន ជាប៉ាវ ថ្លែងនៅឱកាសបំពេញទស្សនកិច្ច នៅទីក្រុង Shenzhen។
ចុះផ្សាយនៅថ្ងៃ៖
សេចក្តី រាយការណ៍របស់វីនស្តុន រតនា
លោកវេន ជាប៉ាវដែលប្រសាសន៍របស់គាត់ត្រូវបានចុះផ្សាយដោយទីភ្នាក់ងារព័ត៌មានជាផ្លូវការចិនថ្មី ពុំបានថ្លែងឱ្យបានលម្អិតទេអំពីកំណែទម្រង់ដែលគាត់យល់ឃើញថាត្រូវតែធ្វើជាចាំបាច់ខានមិនបាន។ប៉ុន្តែ ការអំពាវរបស់គាត់គឺជាប្រតិកម្មតបចំពោះការធ្វើវិភាគដែលថា បើសិនជាគ្មានកំណែទម្រង់នៃគណបក្សកុម្មុយនិស្តទេ ទោះបីជាមានកំរិតក្តី នោះអំពើពុករលួយនិងការរំលោភបំពានផ្សេងៗ ប្រហែលអាចនឹងបំផ្លាញមូលដ្ឋាននៃកំណើនសេដ្ឋកិច្ចចិនដ៏ឆាប់រហ័ស។
“ បើសិនជាមិនការពារការធ្វើនយោបាយតាមទម្រង់ថ្មីទេ នោះប្រទេសចិនប្រហែលជាអាចនឹងបាត់បង់អ្វីដែលខ្លួនបានទទួលដោយការធ្វើសេដ្ឋកិច្ចតាមទម្រង់ថ្មី ហើយគោលដៅនៃការចាប់ផ្តើមធ្វើនវូបនីយកម្មរបស់ខ្លួន ប្រហែលអាចនឹងត្រូវខកខានពុំបានសម្រេច “ នេះជាប្រសាសន៍របស់លោកវេន ជាប៉ាវ។
“ គេត្រូវតែធានាអះអាងចំពោះសិទ្ធិប្រជាធិបតេយ្យនិងត្រឹមត្រូវតាមច្បាប់របស់ប្រជាជន “ -គាត់បានពោលបន្ថែម។
លោកប្រមុខរដ្ឋាភិបាលក៏បានទាំងសំដែងសេចក្តីប្រាថ្នាចង់ “ បង្កើតកាលៈទេសៈ “ ដែលនឹងអនុញ្ញាតឱ្យប្រជាជនអាចទិតៀនរិះគន់និងត្រួតពិនិត្យមើលលើរដ្ឋាភិបាល ដើម្បីដោះស្រាយ “ បញ្ហាក្តោបក្តាប់អំណាចខ្លាំងហួសហេតុដែលជាប់ទាក់ទងនឹងអភិបាលគ្មានប្រសិទ្ធិភាព “ ។
លោកវេន ជាប៉ាវដែលនឹងចាកចេញពីមុខតំណែងខ្លួននៅដើមឆ្នាំ២០១៣ បានឱ្យដឹងឮក្នុងរយៈពេលចុងក្រោយថា គាត់ប្រហែលអាចនឹងឩទ្ទិសអវសាននៃអាណត្តិរបស់ខ្លួនចំពោះការកែលម្អរបបសន្តិសុខសង្គម ការបណ្តុះបណ្តាលកំណើនសេដ្ឋកិច្ចប្រកបដោយលំនឹងជាងមុននិងប្រកបដោយសមធម៌ជាងមុន ហើយនិងការគន់គិតដល់ក្តីទោមនស្សរបស់បណ្តាជនចំពោះពួកអ្នកគ្រប់គ្រងរដ្ឋរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ