មានករណីអាសន្នរោគមួយ-កើតមាននៅមណ្ឌលលិចទឹក
អសប បានបញ្ជាក់អះអាងនៅថ្ងៃសៅរ៍នេះ អំពីករណីអាសន្នរោគមួយកើតមាននៅប៉ាគីស្តង់ ដែលរងគ្រោះដោយទឹកជំនន់ដ៏អាក្រក់បំផុតចាប់តាំងពី ៨០ឆ្នាំមក និងបានប្រកាសបង្កើនសកម្មភាពខ្លួន ដើម្បីមើលព្យាបាលជនដែលកើតរោគរាករូសខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់វីនស្តុន រតនា
ទឹកជំនន់ បណ្តាលមកពីភ្លៀងធ្លាក់ខ្លាំងបង្កដោយខ្យល់រដូវ បានបណ្ដាលឲ្យមានអ្នករងគ្រោះស្លាប់ជាង ១៦០០នាក់គ្មានទីជម្រក ២លាននាក់ និងជនរងគ្រោះជាង ១៤លាននាក់ត្រូវប្រមាណជា៨% នៃបណ្តាជនដែលក្នុងចំណោមនេះ ៦លាននាក់ នៅតែត្រូវការស្បៀងអាហារ និងទឹកស្អាត។
រដ្ឋាភិបាលដែលវិលស៊ុងនឹងទំហំនៃវិនាសកម្ម ទទួលរងការទិតៀនរិះគន់ដោយហេតុយឺតយ៉ាវក្នុងការឆ្លើយតបចំពោះវិបត្តិមនុស្សធម៌ដោយទុកឲ្យកងទ័ព និងអង្គការមនុស្សធម៌អន្តរជាតិចាត់ចែងសភាពការណ៍។
ក្តីទោមនស្សកាន់តែរីកធំឡើងដែលអាចបង្កឲ្យកើតមានចលាចលក្នុងសង្គម ប៉ុន្តែ ស្របតាមក្រុមអ្នកធ្វើវិភាគ កងទ័ពកំពុងជាប់ដៃក្នុងការប្រយុទ្ធទល់នឹងពួកតាលីបង់ប៉ាគីស្តង់ ដើម្បីចូលជ្រៀតជ្រែក ក្នុងជីវិតនយោបាយ និងប៉ុនប៉ង ក្តាប់យកអំណាចវិញ។
អសប បានបញ្ជាក់ប្រាប់ថា ជំនួយមនុស្សធម៌ ពុំគ្របដណ្តប់ សេចក្តីត្រូវការរបស់ពួកអ្នករងគ្រោះបានទេ។ ជន ៦លាននាក់ នៅតែពុំទាន់បានទទួលជំនួយ និងទឹកស្អាត។ ជិតមួយភាគបីនៃដែនដីប៉ាគីស្តង់ ត្រូវបានលិចទឹក គឺ ស្មើនឹងផ្ទៃដីនៃប្រទេសអឺរ៉ូបមួយ។
លោកអគ្គលេខាធិការអសប Ban Ki-moon ត្រូវអញ្ជើញទៅកាន់ប៉ាគីស្តង់ នៅថ្ងៃសៅរ៍ ១៤សីហានេះដើម្បីពិភាក្សាជាមួយថ្នាក់ដឹកនាំអំពីវិធានការត្រូវចាត់ជាបន្ទាន់។
អសប ខ្វល់ខ្វាយកាន់តែខ្លាំងឡើងនឹងរោគបណ្តាលមកពីការប្រើទឹកមិនស្អាត។ មានករណីអាសន្នរោគមួយត្រូវបានបញ្ជាក់អះអាងនៅក្នុងមន្ទីរពេទ្យមួយនៃជ្រលងភ្នំ Swat នៅប៉ែកខាងជើងប្រទេស ហើយអង្គការមនុស្សធម៌របស់អសប លោក Maurizio Giuliano បានបញ្ជាក់ប្រាប់ថា ជន ៣ម៉ឺន ៦០០០នាក់កើតរោគរាករូសខ្លាំង។ “ដោយហេតុអាសន្នរោគ គឺជាហានិភ័យធំ ជារោគប្រកបដោយគ្រោះថ្នាក់ និងអាចនាំឲ្យស្លាប់ជាជាងធ្វើតេស្តទៅលើមនុស្សម្នាទាំងឡាយ យើងបានសំរេចចិត្តមើលព្យាបាលទាំងអស់គ្នាប្រឆាំងនឹងអាសន្នរោគ” នេះជាសំដីរបស់លោក Giuliano៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ