ជប៉ុនសុំទោសកូរ៉េពីអតីតអាណានិគមកិច្ចរបស់ខ្លួន
លោកនាយករដ្ឋមន្ត្រីជប៉ុនNaoto Kan បានសុំទោសនៅថ្ងៃអង្គារនេះពីទោសកំហុសរបស់ជប៉ុន ដែលបានប្រព្រឹត្តទៅលើប្រជាជនកូរ៉េនៅសម័យអាណានិគមកិច្ចអស់រយៈពេល៣៥ឆ្នាំរបស់ខ្លួននៅដើមសតវត្សរ៍ទី២០ ដែលបានធ្វើឲ្យប្រជាជនកូរ៉េរងទុក្ខវេទនាយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
លោកនាយករដ្ឋមន្ត្រីជប៉ុនNaoto Kan បានសុំទោសកូរ៉េនៅពេលនេះ ចំពោះទង្វើដែលជប៉ុនបានប្រព្រឹត្តនៅសម័យអាណានិគមកិច្ចអស់រយៈពេល៣៥ឆ្នាំរបស់ខ្លួននៅដើមសតវត្សរ៍ទី២០ ដែលបានធ្វើឲ្យប្រជាជនកូរ៉េរងទុក្ខយ៉ាងសែនវេទនា ក៏ដោយហេតុតែនៅខែសីហានេះធ្លាក់ចំពេលប្រារព្ធខួបទីមួយរយឆ្នាំនៃសន្ធិសញ្ញាឧបសម្ព័ន្ធយកទឹកដីកូរ៉េភ្ជាប់មកប្រទេសជប៉ុន។ ហើយម្យ៉ាងទៀត ដោយហេតុតែលោកនាយករដ្ឋមន្ត្រីជប៉ុនNaoto Kan ជាអ្នកនយោបាយមកពីគណបក្សកណ្តាលនិយមលំអៀងឆ្វេង ម៉្លោះហើយលោកតែងមានការយល់ដឹងច្រើនពីទុក្ខវេទនារបស់ប្រជាជន ហើយនិងចេះគោរពសេចក្តីថ្លៃថ្នូររបស់មនុស្ស។
ហេតុដូច្នេះហើយបានជាលោកNaoto Kanប្រកាសថា “ខ្ញុំមានវិប្បដិសារីយ៉ាងខ្លាំងនិងធ្វើការសុំទោសយ៉ាងស្មោះជាទីបំផុតដល់ប្រជាជនកូរ៉េចំពោះទោសកំហុសនិងទុក្ខវេទនាដែលជប៉ុនបានប្រព្រឹត្តទៅលើប្រជាជនកូរ៉េនៅសម័យអាណានិគមកិច្ចរបស់ខ្លួន។
សន្ធិសញ្ញាឧបសម្ព័ន្ធយកទឹកដីកូរ៉េភ្ជាប់មកប្រទេសជប៉ុនបានចុះហត្ថលេខានៅថ្ងៃទី២២សីហាឆ្នាំ១៩១០ ហើយចាប់មានសុពលភាពនៅថ្ងៃទី២៩ខែសីហានៅឆ្នាំ១៩១០។
ចំណែកឯអាណានិគមកិច្ចជប៉ុនទៅលើកូរ៉េបានបិទបញ្ចប់នៅថ្ងៃទី១៥សីហាឆ្នាំ១៩៤៥ ទន្ទឹមគ្នានឹងការសុំចុះចាញ់របស់ប្រទេសជប៉ុននៅពេលបិទបញ្ចប់សង្គ្រាមលោកលើកទី២។ ហើយចាប់តាំងពីពេលនោះមក ឧបទ្វីបកូរ៉េបានត្រូវគេពុះចែកជាពីរ ម្ខាងប្រទេសកូរ៉េខាងជើងប្រកាន់យករបបកុម្មុយនិស្ត ម្ខាងទៀតប្រទេសកូរ៉េខាងត្បូងប្រកាន់យករបបមូលធនសេរីនិយម។
ប្រទេសជប៉ុនបានទទួលស្គាល់ប្រទេសកូរ៉េខាងត្បូងនៅឆ្នាំ១៩៦៥ ដោយបានផ្តល់ជំនួយសេដ្ឋកិច្ចយ៉ាងច្រើនសន្ធឹកសន្ធាប់ ក្នុងគោលបំណងធ្វើជាថ្នូរប្តូរនឹងការពុំទាមទារឲ្យទីក្រុងតូក្យូសងជម្ងឺចិត្តកូរ៉េចំពោះទោសកំហុសនិងទុក្ខវេទនាដែលជប៉ុនបានប្រព្រឹត្តទៅលើប្រជាជនកូរ៉េនៅសម័យអាណានិគមកិច្ចអស់រយៈពេល៣៥ឆ្នាំនៅដើមសតវត្សរ៍ទី២០។ ក៏ប៉ុន្តែទីក្រុងតូក្យូគ្មានទំនាក់ទំនងជាផ្លូវការឡើយជាមួយប្រទេសកូរ៉េខាងជើង។
ក្រោយពីការប្រកាសឲ្យដឹងពីការសុំទោសរបស់លោកនាយករដ្ឋមន្ត្រីជប៉ុនNaoto Kanនៅថ្ងៃអង្គារនេះរួចមក លោក Naoto Kanក៏បានទូរស័ព្ទសន្ទនាជាមួយលោកប្រធានាធិបតីកូរ៉េខាងត្បូងLee Myung-Bak។ ក៏ប៉ុន្តែទីក្រុងសេអ៊ូលទទួលការសុំទោសរបស់ប្រទេសជប៉ុនដោយប្រយ័ត្នប្រយែងជាទីបំផុត។ ហេតុដូច្នេះហើយបានជាអ្នកនាំពាក្យនៃក្រសួងការបរទេសកូរ៉េខាងត្បូងថ្លែងប្រាប់ថា “គេសង្ឃឹមថាប្រជាជនជប៉ុនទាំងអស់មានទស្សនៈយល់ឃើញដូចលោកនាយករដ្ឋមន្ត្រីរបស់ខ្លួន”។
គួរកត់សម្គាល់ថា នៅពេលកន្លងទៅ មានអ្នកទទួលខុសត្រូវជប៉ុនជាច្រើននាក់ហើយដែលបានសម្តែងឲ្យដឹងពីការសោកស្ដាយនិងវិប្បដិសារីរបស់ខ្លួនចំពោះទោសកំហុសនិងទុក្ខវេទនាដែលប្រទេសជប៉ុនបានប្រព្រឹត្តទៅលើប្រជាជនអាស៊ីនៅក្នុងរបបយោធានិយមជប៉ុននៅដើមសតវត្សរ៍ទី២០។
នៅថ្ងៃទី១៥សីហាឆ្នាំ១៩៩៥ លោកអតីតនាយករដ្ឋមន្ត្រីជប៉ុនមកពីបក្សសង្គមនិយម លោកTomiichi Murayamaធ្លាប់បានសម្ដែងឲ្យដឹងពីវិប្បដិសារីរបស់ខ្លួននិងសុំទោសដល់ប្រជាជនអាស៊ីទាំងអស់ដែលបានរងគ្រោះនឹងទង្វើយង់ឃ្នងរបស់ជប៉ុននៅក្នុងរបបយោធានិយមជប៉ុននៅដើមសតវត្សរ៍ទី២០។
ក៏ប៉ុន្តែទោះជាមានការសុំទោសជាផ្លូវការយ៉ាងណាក៏ដោយ ក៏គេនៅតែពុំភ្លេចពីអ្នកដឹកនាំជប៉ុនខ្លះដែលមកបក្សអភិរក្សនិយមនៅតែបន្តបដិសេធពុំព្រមទទួលស្គាល់ទោសកំហុសរបស់ខ្លួន ហើយនៅតែទៅគោរពវិញ្ញាណក្ខន្ធយោធាជប៉ុនស្លាប់ដើម្បីប្រទេសជប៉ុននៅសម័យសង្គ្រាមលោកលើកទីពីរនៅវិហារYasukuniនៅទីក្រុងតូក្យូ។ នៅក្នុងចំណោមយោធាជប៉ុនស្លាប់ទាំងនោះមាន១៤នាក់ជាឧក្រិដ្ឋជនសង្គ្រាមដែលបានទទួលទោសប្រហារជីវិតពីបក្សសម្ព័ន្ធដែលបានឈ្នះសង្គ្រាមលោកលើកទីពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ