ក្រុងព្យុងយ៉ាងគំរាមធ្វើសង្គ្រាមនុយក្លេអ៊ែរ
ប្រឈមមុខនឹងការធ្វើសមយុទ្ធយោធា អាមេរិក-កូរ៉េខាងត្បូង នៅក្នុងសមុទ្ទជប៉ុន ដែលគ្រោងនឹងចាប់ផ្តើមនៅថ្ងៃអាទិត្យទី ២៥ កក្កដា ២០១០ កូរ៉េខាងជើងបានប្រកាសធ្វើ "សង្គ្រាមសងសឹក"ប្រឆាំងនឹងសហរដ្ឋអាមេរិក និងកូរ៉េខាងត្បូង ដោយប្រើអាវុធនុយក្លេអ៊ែរដ៏មានថាមពលរបស់ខ្លួន។ប៉ុន្តែពាក្យគំរាមកំហែងទាំងនេះ មិនបានធ្វើឲ្យបណ្តាជនកូរ៉េខាងត្បូងភ្ញាក់ផ្អើលអ្វីសោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
សមយុទ្ធអាមេរិក-កូរ៉េខាងត្បូងក្នុងសមុទ្រជប៉ុន នៅថ្ងៃស្អែក បានធ្វើឲ្យក្រុងព្យុងយ៉ាងឆេះរោលដោយកំហឹងយ៉ាងសន្ធោសន្ធៅ ! អាមេរិក និងកូរ៉េខាងត្បូងមានទម្លាប់ធ្វើសមយុទ្ធរួមគ្នា តាំងពី៣០ឆ្នាំមកហើយ ហើយដូចជាសព្វមួយដង នៅរាល់ពេលមុនចាប់ផ្តើម កូរ៉េខាងជើងតែងដំឡើងសំឡេងប្រកាសសង្គ្រាម។
ម្សិលមិញ ក្រុងព្យុងយ៉ាងសន្យានឹងមានឈាម និងសាកសព ប្រសិននរណាហ៊ានឈ្លានពានចូលក្នុងទឹកដីរបស់ខ្លួន។ ហើយនៅថ្ងៃនេះ គណៈកម្មការការពារជាតិ ដែលជាស្ថាប័នកំពូលរបស់របបកុម្មុយនិស្តព្យុងយ៉ាង បានអះអាងថាត្រៀមជាសេ្រចនឹងបញ្ឆេះ “សង្គ្រាម សងសឹកដ៏ធំ” ដោយប្រើអាវុធនុយក្លេអ៊ែរដ៏មានថាមពលរបស់ខ្លួន ប្រឆាំងនឹងអ្វីដែលកូរ៉េខាងជើងហៅថា “ចក្រពត្តិអាមេរិក និងអាយ៉ងកូរ៉េខាងត្បូង”។
លំហាត់យោធា នៅថ្ងៃស្អែក ដែលមានទំហំធំបំផុត មិនធ្លាប់មានក្នុងប្រវត្តិសមយុទ្ធកូរ៉េខាងត្បូង-អាមេរិក ត្រូវបានរបបស្តាលីន ចាត់ទុកថាអំពើបង្កហេតុ រករឿងចង់បិទខ្ទប់កូរ៉េខាងជើងតាមរយៈកម្លាំងយោធា។
នៅកូរ៉េខាងត្បូង ការគំរាមកំហែង របស់ក្រុងព្យុងយ៉ាងនេះ បានក្លាយទៅជាពាក្យដដែល ឡើងជ្រេញត្រចៀក និងស្ទើរក្លាយទៅជាទម្លាប់ទៅហើយ ដូច្នេះពេលនេះក្រុងសេអូល ទទួលដឹងឮកំហឹងរបស់កូរ៉េខាងជើងជាបងប្អូនបង្កើតគូសត្រូវ ដោយស្ងប់ស្ងាត់បំផុត និងគ្មានការភ្ញាក់ផ្អើលឡើយ។
កាលពី១៥ឆ្នាំមុន បណ្តាជនកូរ៉េខាងត្បូងជ្រួលច្របល់ រត់ជាន់គ្នាទៅរកទិញទឹក ទិញអង្ករ និងស្បៀងអាហារ ស្តុកទុក ព្រោះកូរ៉េខាងជើងបានគំរាម កម្ទេចក្រុងសេអូលឲ្យខ្ទេចខ្ទីក្រោមអណ្តាតភ្លើង ក៏ប៉ុន្តែលើកនេះ នៅតាមទីផ្សារ ក្នុងក្រុង ក៏ដូចនៅតាមព្រំដែនជាប់ជាមួយនឹងកូរ៉េខាងជើង គេពុំសង្កេតឃើញមានសកម្មភាពអ្វីប្លែកខុសពីទម្លាប់ប្រចាំថ្ងៃទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ